Read kirikeni 2 Amanyanapụ Sịkị Mịẹaye Ma 36 Bible Online

2 Amanyanapụ Sịkị Mịẹaye Ma 36 - kirikeni bible

2 Amanyanapụ Sịkị Mịẹaye Ma 36

¹Juda apụma ini Josaya tọkụ Joahaz ḅe sẹlẹ ḅo se, pulo seni ọ̀ tịḅị sara se ò seni Jerusalẹm amanyanaḅọ mịẹmẹ.

²Joahaz ḅe sitẹrẹ-a kụra fịnjị ọ̀ nwọ lase ò ḅo Juda amanyanaḅọ sọmẹ, ọ̀ pịkị tẹrẹ akalụ nwọseni Jerusalẹm ḅie ḅẹrẹtọnmẹ.

³Ijipt amanyanaḅọ Niko ḅe ò kunso mun ikoliḅọ mịẹmẹ se ò Juda mị mịẹmẹ gbẹịnye ḅaraḅụ ini seleḅa okpokpo ẹndẹ sọnọasi fịnjị ofori gbọrị poku na pịkịna goli okpokpo sọnọfa iniasi na nwọ gbẹịnmẹ.

⁴Niko ḅe, Joahaz numbireowu Ẹlaịakịm ḅe ò nwọseni Juda amanyanaḅọ mịẹmẹ, se ori oria ẹrẹ ḍinma Jẹhoịakim seni ọ̀ chịnmẹ. Niko ḅe ò Joahaz ḅe se so Ijipt mun mẹ.

⁵Jẹhoịakim ḅe sisọnọ-a kụra fịnjị ọ̀ nwọ lase ò Juda amanyanaḅọ sọmẹ, oyigbọrị kụra fịnjị ọ̀ pịkị nwọse Jerusalẹm ḅie ḅẹrẹtọnmẹ. Nyanaḅọ, ọ̀ Tamụnọ Ḅe ḅụ ò simịẹmẹ.

⁶Babilọn Amanyanaḅọ Nebukadneza ḅe, ori owu seni Juda mị paka se ò Jẹhoịakim ḅe kun, ikoli seni ori ịkasị se ò seni so Babilọn mun mẹ.

⁷Da ngọ Oputẹkẹwarị ḅie Nebukadneza ḅe ọ̀ nwọ dekiso mun Babilọn ḅie oria amanyanaḅọ warị ḅie koromamẹ.

⁸Jẹhoịakim ḅe mịẹaye goyegoye, ọ̀ pịkị mịẹmịẹ ḅụrụaye ma na oru-a mịẹmịẹaye ma na, Izrẹl na Juda na Amanyanapụ Olomu ḅẹrẹ-a ḍiri ma ḅie gịẹịn waraḅẹ. Oria tọkụ Jẹhoịakin ḅe amanyanaḅọ sọ oria kiri ọkịmẹ.

⁹Jẹhoịakin ḅe mama kụra fasi ọ̀ nwọ lase ò Juda amanyanaḅọ sọmẹ, tẹrẹ akalụ na oyi-a ḍin ọ̀ pịkị nwọse Jerusalẹm ḅie ḅẹrẹtọnmẹ. Ori sọnị Nyanaḅọ Ḅe ḅụ ò simịẹmẹ.

¹⁰Kụra mị ḅo ịrụa sịkị lasịkị Nebukadneza ḅe ori ikoliḅọ ḅaraḅụ Jẹhoịakin ḅe se so Babilọn mun mẹ, ọ̀ pịkịna Oputẹkẹwarị ḅie sime ngọ mamgba dekisomẹ. Anịsịkị Nebukadneza ḅe, ò Jẹhoịakin numbireowu sẹnịḅọ Zẹdẹkaya ḅe seni Juda na Jerusalẹm na amanyanaḅọ nwọ mịẹmẹ.

¹¹Zẹdẹkaya ḅe sigbọrị kụra fịnjị ọ̀ nwọ lase ò Juda amanyanaḅọ sọmẹ, Jerusalẹm ḅie ọ̀ pịkị oyigbọrị kụra fịnjị nwọ seni ḅẹrẹtọnmẹ.

¹²Nyanaḅọ Ḅe ḅụ ò simịẹmẹ, ọ̀ pịkị ḅụiderima ịkịankoro Jerimaya ḅe poki pokikẹ anị Nyanaḅọ Ḅe ọkwẹịn ma kọnkọnḅọ ḅe.

¹³Zẹdẹkaya ḅe ori Amanyanaḅọ Nebukadneza ḅe na tụḅụrụmẹ, anị kụrọ ḅaraḅụ ọ̀ ḅẹ na Tamụnọ Ḅe ẹrẹḅụ yekarịfị na ori iḅi ḍumokọnḅịa nwọḅẹḅọ ḅe. Ọ̀ kọngọ kụrọma se ngịsị siḅụ vinpịkị Nyanaḅọ Izrẹl Tamụnọ Ḅe damaḅokẹ.

¹⁴Anị ḅe jịnye, Juda tịḅịnịma na agbamịẹapụma na, pịkị tomonima na, ini kelema sẹma tẹkẹarị oru ma mị ini ḍikima tẹkẹarịye-ẹ, anịḅụ Nyanaḅọ Ḅe ḅarana mịẹfịafịamasa Oputẹkẹwarị mị ini pụlamamẹ.

¹⁵Nyanaḅọ inia ḅieju-aḍapụma Tamụnọ Ḅe ọ̀ pa mbikia-mbikiama ịkịankoroapụ seni oria tomonima ḅerijinejineaḅẹ, anịatịḅị ini na Oputẹkẹwarị mị na gose ò ḅimẹ ò yeḅụḅarasin ini pịrị.

¹⁶Ọkụma ini Tamụnọ okunwẹngịapụ ma seni kpọtitimẹ, oria ọkwẹịn ma ini sịkịmẹ, ini pịkịna oria ịkịankoroapụma ḍẹrịaḅẹ, kuluma ḅụ Nyanaḅọ Ḅe oria ịganị oria tomonima ḅụ opuma ḅakaso ọkụma ini pọkọ soso ọkụ ḅarị ofori-ẹ.

¹⁷Anịẹrẹchị Nyanaḅọ Ḅe Babilọn amanyanaḅọ ḅe ọkịḅo se ori owu seni ini pakamẹ. Amanyanaḅọ ḅe Juda asẹmẹnị ma ori ini ḅaamẹ, Oputẹkẹwarị ḅie sime apụma sọnị ọ̀ ḅaamẹ. Ò ḍikitịḅịfoin nyana pịrị gbọrịḅọ sọnị ofori-ẹ, ayamburama awọ na olomuapụ na, owuapụ na eremeni na, obiapụ na kpụrụkpụrụapụ na. Tamụnọ Ḅe inimgba seni ọ̀ ḅaraḅie dẹrịmẹ.

¹⁸Babilọn amanyanaḅọ ḅe, Oputẹkẹwarị mị ori anị ọfọịnmẹ, Oputẹkẹwarị ḅie ngọma na, amanyanaḅọ ḅe nyana ayema na pịkị oria tịḅịnịma ayema na, arịmgba ori ọfọịnso Babilọn mun mẹ.

¹⁹Oputẹkẹwarị mị na opuama mị na, bebe amanyanaḅọ odo mị na anịa ngọ mamgba na, ọ̀ dọkịma kiripịrịmẹ, ọ̀ pịkị ini nama opuama mị kelema onu mị kansaramẹ.

²⁰Fịkapụ mamgba ori ini se so Babilọn mun mẹ, anịjuḅụ ini omoniapụ ḅara nwọ seni fịrịnwẹngị ori na ò furoḅie apụma na pịrị nweni Pesia sẹ mị ḅo kụrọ nyana sịkị lamẹ.

²¹Anịḅụ Nyanaḅọ Ḅe ịkịankoro Jerimaya ḅe ḅụ ḅọrọ ḍuko na mị tọrọkọju mịẹḅịa nwọḅẹye mị ḅo mịẹ ḅeinmẹ: “Ama mị nweni angakaḅụ anị papa sara sime mun kụra-tesi-oyi-fịnjị laḅịa, anị ịnyọsara sime ini kokokokoka Saḅaḅọrọ Alalị-a ḍin ma pịrịmẹ.”

²²Saịrọs ḅe Pesia sẹ mị da tatarị kụra mị ḅie, Nyanaḅọ Ḅe ọ̀ mịẹmẹ ịkịankoro Jerimaya ḅe ḅụ ọ̀ ḅọrọ ḍukosaye mị ḅo kọkọmaye sọmẹ. Nyanaḅọ Ḅe tọn Saịrọs ḅe pịrịmẹ na ori ekere gbolo pịkị mà olokoma seni ḍiri ḅie gịẹịn seni ori ḍikiḍikiarị sẹ mị ḅie ama ama fịrịma se ini oloku pụkọ seni àrị gopakụma:

²³“Mị anị Pesia sẹ mị da Saịrọs ḅe pịrị kụrọ mị-ẹ. Nyanaḅọ, Soḅie Tamụnọ Ḅe ị̀ mịẹsam na, ị̀rị̀ ḅẹrẹtọn bebe tomonikiri mị mgba nwọ pịrị, ọ̀ pịkịna Juda ḅie sime Jerusalẹm ḅie Oputẹkẹwarị nama ọ̀ pịrị fịrị mị se ị̀ pịrịmẹ. Mịọkụ ómine Tamụnọ-a tomonima ó so anịju mun, se ye Nyanaḅọ ọ́mịna Tamụnọ Ḅe ómine na sime.”