Read kirikeni 2 Amanyanapụ Sịkị Mịẹaye Ma 5 Bible Online

2 Amanyanapụ Sịkị Mịẹaye Ma 5 - kirikeni bible

2 Amanyanapụ Sịkị Mịẹaye Ma 5

¹Amanyanaḅọ Sọlọmọn ḅe Oputẹkẹwarị fịrị mamgba nwọ nwẹngị fama sịkị, ḍawu Devid ḅe seni osiḅụ wẹrị Nyanaḅọ Ḅe pịrịaye mamgba ọ̀ nwọ ọkị seni Oputẹkẹwarị ḅie yekoko ḅie mị ḅie kura koromamẹ—seleḅa na, goli na, pịkị jịn-a ngọ na.

²Anịsịkị Amanyanaḅọ Sọlọmọn ḅe bebe Izrẹl sẹma na, sẹsẹ tịḅịda apụ mamgba na chịnḅo Jerusalẹm mị ḅieḅụ koḅirimamẹ Zaịyọn, Devid Opuama mị ḅie Nyanaḅọ Ḅe Ọḅọkụ Igbe mị dekiso Oputẹkẹwarị mị munḅịa ẹrẹchị.

³Inimgba ḅo koḅirimamẹ Tịḅịkiki Ma Alalị sịkị mị ḅụ.

⁴Tịḅịnị mamgba ḅo koḅirima sịkị, Livaị apụma Ọḅọkụ Igbe mị dekichịẹmamẹ

⁵se anị deki Oputẹkẹwarị ḅie mun mẹ. Agbamịẹapụma na Livaị apụma na, Nyanaḅọ Ḅe pakaḅoḅo Ikowarị mị na anịa fịrịnwẹngịaye ma na nwọ ọkịso Oputẹkẹwarị ḅie mun mẹ.

⁶Amanyanaḅọ Sọlọmọn ḅe na bebe Izrẹlapụma na Ọḅọkụ Igbe mị tọrọkọ koḅirimamẹ, se tọn-a kịẹnḅịa ọkụ ofori anana na nambulo na se agbamịẹmẹ.

⁷Anịsịkị agbamịẹapụma Nyanaḅọ Ḅe Ọḅọkụ Igbe mị deki mun Oputẹkẹwarị ḅie chu se anị seni Fịafịa Tẹịn Nyọ mị ḅụ, ini tẹmẹ pamba nyana ayema chukuḅie koromamẹ.

⁸Arịa pamba ma finjima mun Ọḅọkụ Igbe mị na ini seni anị dekideki-a chịnma na gbẹịnmẹ.

⁹Gbụkụkụma Fịafịa Tẹịn Nyọ mị tọrọkọ chịẹḅọ goyegoye ineda chịnma ḅịpị okolo ọrịḅịa, ọkụma ị́ ineda jịn angaḅụ chịẹ àrị ọrịẹkẹ. (Chịn ma mịmgba sọnị àrị pa omi-ẹ.)

¹⁰Ọḅọkụ Igbe mị ḅie gbọrịye sọnị ofori-ẹ Moziz ḅe Saịnaị Tụndụ mị ọgọnọ ḅụ seni ḅie chụa yeḅụ-gịẹịn mama ḍụparị pẹkẹrẹma sikima ọkụma, anị Nyanaḅọ Ḅe Izrẹlapụma na ọḅọkụ fị sịkị, ini Ijipt ḅie pakaḅoarị sịkịḅụ.

¹¹Ini kiri ḅụ sime agbamịẹapụ mamgba inia ḅụ ma mịẹfịafịamamẹ, ini sime pịrị kpo mị abalaka ḅaraḅụ. Livaị apụma ḅie nimeni mamgba—Esaf ḅe na, Heman ḅe na, pịkị Jẹdutọn ḅe na, pịkị inia sẹma ḅie apụma na—ini lọkọ ḅịtẹ ḅiriaye ḅirimẹ. Livaị apụma ini agbamịẹ ẹbẹ ḅụ, ịrụapakapaka nyọ daọrụ ḅụ kpekima chịẹmẹ, ḅarafarị ayema na, ọbọ ma na, agbamịẹapụ ḅụ kịnị-a sonioasi inia ḅie sime oḍu ofuro aḅẹ. Nime chu apụma, oḍu na ḅarafarị aye na pịkị jịn farị aye na, jụmḅọ jụmḅọ irimaka ḅaraḅụ gbọrịḅụ ini na chu Nyanaḅọ Ḅe tokoni aḅẹ: “Ọ́ Nyanaḅọ Ḅe tokoni, anịatịḅị ori iḅimẹ, Oria ḅẹlẹma pịkị sime gbasomẹ.” Agbamịẹapụma Oputẹkẹwarị ḅie pakasoarị sịkịḅụ, bẹkẹma ḅaraḅụ tomoni tọrụda soḅuno Nyanaḅọ Ḅe tọrụkuḅu warị ḅie ḅeinmẹ, se ini ḅarị ineda tẹkẹ fịrị mị deki nwẹngịma munkẹ.