Read kirikeni 2 Amanyanapụ Sịkị Mịẹaye Ma 6 Bible Online

2 Amanyanapụ Sịkị Mịẹaye Ma 6 - kirikeni bible

2 Amanyanapụ Sịkị Mịẹaye Ma 6

¹Anịsịkị Amanyanaḅọ Sọlọmọn ḅe tẹkẹmẹ, “Nyanaḅọ, soḅuno na kanakana na ḅieḅụ anga mị ị́ nwọ sẹlẹọkịsam.

²Mịọkụ amanyanaḅọ gbẹịn Oputẹkẹwarị à nwọ nama ị́ pịrịsam, anị ị́ anga gbasoḅịa nyọ.”

³Bebe Izrẹlapụ mamgba anịju ḅụ ini chịẹ waraḅẹ. Amanyanaḅọ ḅe tọrụ pịkị ini da se Tamụnọ Ḅe oria ḅẹlẹma ḅi inia ọgọnọ gbanamẹ.

⁴Ọ̀ nwọ ḅẹmẹ, “Ọ́ Nyanaḅọ Izrẹl Tamụnọ Ḅe tokoni! Ò ḅereni ị̀ ḍa Devid ḅe pịrịye mị ori anị mịẹsam, ọ̀ nwọse ọ̀ ḅẹmẹ na,

⁵‘àrị Ijipt ḅie ị̀ya tomonima ọkịpakụmaḅo sịkị ngịsị ọkịḅo nwọ la sọnị, Izrẹl ama mị ḅie, à gbọrị opuama sọnị sẹlẹ sikimakẹ, ini Oputẹkẹwarị nama se ị̀ tẹkẹḅịa nyọ, ị̀ya tomoni Izrẹlapụma, à pịkị tịḅịda ini pịrịḅịa gbọrịḅọ sọnị sẹlẹ ini pịrịkẹ.

⁶Ọkụma mịọkụ à Jerusalẹm mị sẹlẹsam ini ị̀ tẹkẹḅịa nyọ ḅaraḅụ, se ị́rị́ Devid ḅe ḅẹrẹtọn ị̀ya tomonima pịrịḅịa.’”

⁷Sọlọmọn ḅe pịkị nwọ ḅẹmẹ, “Ị̀ ḍa Devid, Nyanaḅọ Izrẹl Tamụnọ Ḅe tẹkẹḅịa Oputẹkẹwarị ọ̀ nwọ nama-ẹtọnmẹ,

⁸ọkụma Nyanaḅọ Ḅe nwọse ọ̀ ḅẹmẹ, ‘Ị́ karakaramẹ ị̀ tẹkẹḅịa Oputẹkẹwarị nama ị̀ pịrị ḍọkị mị,

⁹ọkụma ị́rị́ anị nama ẹkẹ ngịsị. Ị́ya tọkụ ḅe-ẹ, jokoma ị́ya tọkụ ḅe, anị ị̀ya Oputẹkẹwarị mị namaḅịaye-ẹ.’

¹⁰“Mịọkụ Nyanaḅọ Ḅe ò ḅereniye mị ọ̀ mịẹsam: Ị̀rị̀ ị̀ ḍaḅe kiriḍinmamẹ Izrẹl amanyanaḅọ ḅaraḅụ, à pịkị Oputẹkẹwarị namasam Nyanaḅọ Izrẹl Tamụnọ Ḅe tẹkẹḅịa gose.

¹¹Àrị Ọḅọkụ Igbe mị seni Oputẹkẹwarị mị ḅie koromasam, anị Nyanaḅọ Ḅe, Izrẹlapụma na fị ọḅọkụ mị, gịẹịn ayema ḅụ sime ḍụparị pẹkẹrẹ ma.”

¹²Anịsịkị tomonima tọrụkuḅu ḅụ Sọlọmọn ḅe mun agbamịẹ ẹbẹ mị tọrọkọ chịẹ se tẹkẹḅụ ọ̀ ḅarama dekichịẹmamẹ.

¹³(Sọlọmọn ḅe ori alapẹlẹka se tomoni tanjị chịẹ ọkwẹịnḅịa gbọrị patalaye nwọ tẹmẹ se anị seni ḅẹrẹkọn odo mị ogboku ḅụ koromamẹ. Anịa ịsụn mị na finji mị na gbasịmẹ, nine-a ḅụọ nine-a ḅụọ-ẹ, se anịa gele mị sọnọ-a ḅụọ-ẹ. Ọ̀ mị chịẹ ọkwẹịnye mị tanjị chịẹmẹ, se kpẹrẹkị mẹ tomoniḅọ goyegoye ineda ori ọrịḅịa ḅaraḅụ, se ọ̀ ḅarama deki so damẹ.)

¹⁴Ọ̀ nwọ tẹkẹmẹ, “Nyanaḅọ Izrẹl Tamụnọ, bebe so mị na sẹkiri mị na ḅie mgba ḅụ ị́ kịkẹ oru ofori-ẹ ngịsị. Ị́ya ọḅọkụ mị ị́ kokomẹ, ị́ya tomonima na ị́rị́ na fị ye mị, ị́ pịkị ị́ya ḅẹlẹma mị ḍiepakụma ini pịrịmẹ ini inia kuḅie la ọkụ mịmgba seni ị́ ḅịpịpoki sịkị ḅụ.

¹⁵Ị́ ḅereni ị̀ ḍa Devid ḅe pịrịye mị ị́ mịẹsam; mịmgba ḅụ, ọkwẹịn goyegoye mịẹḅeinmasam.

¹⁶Mịọkụ, Nyanaḅọ Izrẹl Tamụnọ, pa pịkị ísí ị́ ḅereni ị̀ ḍaḅe pịrịye mị na mịẹ, anị sịkịmamgba ò furoḅie apụma ḅụ gbọrịḅọ Izrẹl amanyanaḅọ ḅaraḅụ ḅẹrẹtọnḅịa ị́ nwọ ḍuko ọ̀ pịrịye mị, anị ini nemikase ori ị́ya Olokoma koko ọkụ mị ini sọnị kpaịnma ọkọmịẹmẹ ḅẹḅẹ.

¹⁷Anịẹrẹchị mịọkụ, Nyanaḅọ Izrẹl Tamụnọ, ye ị́ ḅereni ị́ya fịrịnwẹngịḅọ Devid ḅe pịrịye goyegoye ḅo kọkọmaye sọ.

¹⁸“Ọkụma, Yei Tamụnọ, ị́ ineda kọkọma ama na ere na ogboku anga ḅe sẹkiri ḅie? So mị mgba sọnị anị ḍụḅa la ḅaraḅụ ineda ị́ deki ẹka sịkị, nde anịọkụma, mị à nama Oputẹkẹwarị mị re ndende ḅara ḍụḅa se ineda ị́ dekiḅe?

¹⁹Nyanaḅọ ị̀ Tamụnọ, ị̀rị̀ ị́ya fịrịnwẹngịḅọ-ẹ. À kọn àrị tẹkẹ mị poki se àrị ị́ ḅara ḅiye ma mịẹ ị̀ pịrị.

²⁰Ḍin na enekaka na ḅụ mị Oputẹkẹwarị mị ḍikiḍiki. Ị́ yeḅerenimẹ na mị nyọ ḅụ anị ini ị́ tẹkẹtẹkẹḅịaye-ẹ, anịẹrẹchị ị̀ naa à tọrụ seni mị Oputẹkẹwarị mị da se tẹkẹ sịkị goyegoye ḅụ.

²¹Ị̀ya tẹkẹma naa, pịkị ị́ya tomoni Izrẹlapụma inia tẹkẹma sọnị naa, ini tọrụ seni mị nyọ mị da tẹkẹ sịkị goyegoye ḅụ. Ị́ya ama, so mị ḅieḅụ wa naa se siḅụ-ḅarasin wa pịrị.

²²“Tomoniḅọ jụmḅọ mịẹirimamẹ nwọḅẹ ye ini nwọ ḍuko nụḅọ ọgọnọ gbanamẹ se ini nụḅọ ọkịḅo mịn Oputẹkẹwarị mị ḅie ị́ya agbamịẹ ẹbẹ mị tọrọkọ ḅo ḅụpikima-ẹḅomẹ na ọ̀ mịẹye ofori-ẹ ḅẹḅẹ,

²³Yei Nyanaḅọ, so ḅieḅụ poki se ḅẹrẹkọn ị́ya fịrịnwẹngịapụma pịrị. Ḅẹrẹ ḅarasi ḅọ ḅe ọ̀ gbẹịn fomuḅara seni ọ̀ pịrị se ḅẹrẹ nemikaḅọ ḅe wẹrịso ò so.

²⁴“Ị́ya tomoni Izrẹlapụma, ini na-tarakapụ ini ị́ mịẹirimaye gose ini nẹngịmamẹ, se ini vinpịkị ị́ damaḅo se mị Oputẹkẹwarị ḅie ḅo, ḅụiderima ị́ tẹkẹ siḅụ-ḅarasin pịrị ḅi sịkị goyegoye,

²⁵ini poki soḅie ḅụ, se siḅụ-ḅarasin ị́ya tomonima pịrị se ini ọkị pịkịmaḅo, ị́ seni ini na pịkị inia olomuḍapụ ma na pịrị ama mị ḅieḅụ.

²⁶“Ị́ya tomonima ị́ mịẹirima ẹrẹchị ị́ ene mị dachịẹmamẹ, se ini siḅụ pịkị se tọrụ pịkị mị Oputẹkẹwarị mị damẹ, se ḅụiderima ị́ tẹkẹ sịkị goyegoye,

²⁷Yei Nyanaḅọ, ini poki soḅie ḅụ se siḅụ-ḅarasin ị́ya fịrịnwẹngịapụ Izrẹlapụma pịrị, se karakaraye mị mịẹḅịa ọkụ nwọ seni ini telima. Anịsịkị, Yei Nyanaḅọ, ene seni mị ị́ya ama mị fịrịma, anị ị́ seni ị́ya tomonima pịrị na anị iniaye sọgbasoḅịa nwọḅẹ nyọ mị.

²⁸“Ḅuruḅa ama mị ḅie sime sịkị ḅụ, anịkanịka amanwẹngị-obi, anịkanịka kụrọ fọrụ na igurube ogbo na fịayema ḅaamẹ, anịkanịka ị́ya tomonima inina-tarakapụ owu seni ini paka sịkị, anịkanịka obi inia ogboku simemẹ, anịkanịka ini obiarị sịkịḅụ,

²⁹inia tẹkẹma na. Ị́ya tomoni Izrẹlapụma ḅụ gbọrịapụ nemikase kuḅie laḅara se kururu ḅụ inia ḅarama sụma mị Oputẹkẹwarị mị da tẹkẹmẹ ḅẹḅẹ,

³⁰inia tẹkẹma naa. Ị́ya ama so mị ḅie ini poki se siḅụ-ḅarasin ini pịrị. Ị́rị́ kẹngẹ anị tomoni-a kuḅiemgbọlụma kọn àrị koromama nemiye-ẹ. Ọrụḅọḅọ gbẹịn ḅara seni nụḅọ na anga,

³¹mịẹso sịkị ị́ya tomonima kụn seni ị́ pịrị, pịkị ị́ ḅịpị poki ị́ ḅiḅara nwọ seni anga, ị́ seni inia olomuḍapụma pịrị ama mị ḅie ini anga mun lasịkị lasịkị ḅụ.

³²“Igoniḅọ ḅọlọju sime ama ḅie ị́ya opu mị na, pịkị ị́ya kụrọ mị na la-ọkụ gbolomaye nwọ naa, pịkị sịkịmamgba ị́ ḅụkarakaraye mịẹmịẹ ọkụ nwọ naa, se anịsịkị ḅo mị Oputẹkẹwarị mị ḅieḅụ tẹkẹḅịa ẹrẹchị ḅo sịkị goyegoye,

³³oria tẹkẹ mị poki. Soḅie ị́ anga nyọ ḅụ ọ̀ naa se ori ị́ ḅara ḅi ye mị mịẹ ọ̀ pịrị, mịẹso sịkị bebe tomonikiri mị ḅie sime apụ mamgba ị́ nemi pịkị ị́ ḅịpịpokiḅịa ḅara, anị ị́ya tomoni Izrẹlapụma mịẹarị ọkụ mị. Anịsịkị ini nemiḅịa na, mị à nama Oputẹkẹwarị mị ḅie anị ini ị́ tẹkẹtẹkẹḅịa nyọ-ẹ.

³⁴“Ị́ tọn ị́ya tomonima pịrị na ini mun inina-tarakapụma na owusọ nwọḅẹ sịkị ḅụ, ini sime nyọ goyegoye ḅụ se ini tọrụ se mị ị́ sẹlẹọkịsa opuama mị na pịkị mị à nama ị́ pịrịsa Oputẹkẹwarị mị na da se ị́ tẹkẹ sịkị goyegoye ḅụ,

³⁵inia tẹkẹma poki. Soḅie ḅụ ini na se ọmụḅaraiḅi seni ini pịrị.

³⁶“Ị́ya tomonima ị́ mịẹirima sịkị ḅụ—siyemịẹka gbọrịḅọ sọnị pịkị ofori-ẹ—ị́ya ịganị ḅụ ị́ ḅereni inina-tarakapụma pịrị se ini owuḅie ini nẹngịma se ini ikoliapụ ḅara seni ini kun so jịn ama mun sịkị ḅụ, se anị ama mị ḅọlọmẹ nwọḅẹ sọnị,

³⁷ị́ya tomonima tẹkẹma poki. Nemikase anị ama mị ḅieḅụ ini siḅụ pịkị se ị́ tẹkẹmẹ ḅẹḅẹ, ini simịẹ pịkị sitịḅịnyana la-ọkụ mị ḍukopakụmamẹ ḅẹḅẹ, inia tẹkẹma naa, Yei Nyanaḅọ.

³⁸Nemikase anị ama mị ḅieḅụ ini kọkọmaye ḅụ na pịkị epeleofori ḅaraḅụ na tọrụ se mị ị́ se mịna opu-aḍapụma pịrị ama mị na, pịkị mị ị́ sẹlẹọkịsa opuama mị na, pịkị mị à nama ị́ pịrịsa Oputẹkẹwarị mị na da se tẹkẹ sịkị goyegoye ḅụ,

³⁹anịọkụma inia tẹkẹma poki. Ị́ya ama soḅie ḅụ ini naa pịkị ḍikitịḅịfoin nyana ini pịrị se ị́ya tomonima mịẹasi ma ḅụ ḅarasin ini pịrị.

⁴⁰“Mịọkụ, Yei ị̀ Tamụnọ, wa ḍiki se mịanga wa kọn tẹkẹma poki.

⁴¹Yei Nyanaḅọ Tamụnọ sịsẹ Oputẹkẹwarị mị mun, anị wa Ọḅọkụ Igbe mị se koromasa nyọ mị, anị ị́ya kụrọ mị na elekima mị na ḍiepakụmaye mị. Ị́ya agbamịẹapụma ḅẹlẹma ini mịẹarịaye mamgba ḅụ, se ye ị́ya tomoni mamgba ḅieḅẹlẹ ị́ seni ini mịẹ iḅi ma gose.

⁴²Nyanaḅọ Tamụnọ, ị́ sẹlẹọkịsa amanyanaḅọ ḅe ọ̀ sịkịma. Ị́ nyana ị́ya fịrịnwẹngịḅọ Devid ḅe pịrị ḅẹlẹma ma seni ḅiekoroma.”