Read kirikeni 2 Amanyanapụ Sịkị Mịẹaye Ma 7 Bible Online

2 Amanyanapụ Sịkị Mịẹaye Ma 7 - kirikeni bible

2 Amanyanapụ Sịkị Mịẹaye Ma 7

¹Amanyanaḅọ Sọlọmọn ḅe oria tẹkẹ mị kọn famaso sịkị, fịnị soḅie ḅụ koroḅo ini mịẹ agbama dọkịmamẹ se Nyanaḅọ Ḅe ori omi-ẹ nwọḅẹ tọrụda enekuḅu Oputẹkẹwarị mị ḅie ḅeinmẹ.

²Tọrụda enekuḅu mị warị ḅie ḅeinye gose agbamịẹapụma ini ineda anịa ḅie sọkẹ.

³Izrẹlapụma soḅie koroḅo fịnị mị na pịkị Oputẹkẹwarị mị ḅie ḅein enekuḅu mị na nwọ ọrị sịkị, ini ḅịkịkoro tọrụ seni ini mịẹ warị mị kelemaye mị ọgọnọ iḅo se Tamụnọ Ḅe tẹkẹmẹ, pịkị ò tokonimẹ oria iḅimịẹ ma na pịkị oria sime gbaso ḅẹlẹma ma na gose.

⁴Anịsịkị Sọlọmọn ḅe na pịkị tomoni mamgba na agbamịẹ Nyanaḅọ Ḅe pịrịmẹ.

⁵Nambulo mama poku na jie ẹndẹ na pịkị anana jie-a poku na ọ̀ nwọse nwẹngịgboloma agbamịẹmẹ. Se ori na pịkị tomoni mamgba na Oputẹkẹwarị mị mịẹfịafịamamẹ tẹkẹḅụ.

⁶Agbamịẹapụma inia fịrị kirima ḅụ chịẹmẹ, se Livaị apụma pịkị tọrụ se inida chịẹmẹ, se Amanyanaḅọ Devid ḅe nyanakoroma se nime chuchu farịfarị ayema ini nwọse nime chu Nyanaḅọ Ḅe tokonimẹ, “Oria ḅẹlẹma ma sime gbasomẹ!” se Devid ḅe tọn koroma ini pịrị fịrịma sime ḅaraḅụ, agbamịẹapụma oḍu ma ofuro àrị sịkị tomoni mamgba chịẹ simemẹ.

⁷Sọlọmọn ḅe ḅẹrẹkọn warị mị sime odo kuḅu mị anị Oputẹkẹwarị mị tọrọkọ mịẹfịafịamamẹ, se ori anịjuḅụ bebema dọkịma agbama nwọ mịẹmẹ, ḍiepịrịye agbama na, pịkị nwẹngịgboloma agbamịẹye ma ḅụ ḅẹlẹkị ma na. Ò gose ọkọmịẹye, anịatịḅị ọ̀ mịẹ alapẹlẹka agbamịẹ ẹbẹ mị opuma ịrụmẹ, anị ineda maye mamgba deki ẹkẹ.

⁸Sọlọmọn ḅe na bebe tomoni mamgba na sọnọma ḍin nwọse Oguruguru Alalị mị fịmẹ. Tọn-a ḅaka apụ tụtụ Hamat Ḅọrọnyọ ọgọnọju daọrụ ḅụ na pịkị Ijipt apụ eke ḅụ chukuju daọrụ ḅụ na sime ḅomẹ.

⁹Ini sọnọma ḍin seni tẹkẹḅụ agbamịẹ ẹbẹ mị mịẹfịafịamamẹ, pịkị jịn sọnọma ḍin seni alalị mị fịmẹ. Kuluma ene mị ḅie ini alalị mị gbẹịn mịẹmịẹye nwọ mịẹmẹ,

¹⁰pịkị anị ḅe eneḅa, anị sọnọma akalụ mị ḅie sitẹrẹfịnjị karama ene mị ḅie, Sọlọmọn ḅe tomonima ḅẹ seni ini so warị mun mẹ. Inia ḅieḅẹlẹmẹ, Nyanaḅọ Ḅe seni oria tomoni Izrẹlapụma na Devid ḅe na, pịkị Sọlọmọn ḅe na pịrịsa ḅẹlẹma mamgba na gose.

¹¹Amanyanaḅọ Sọlọmọn ḅe Oputẹkẹwarị mị na pịkị amanyanaḅọ warị mị na namaso sịkị, arịa ḅụ ọ̀ mịẹ ḅi aye mamgba ọ̀ deinma nwọ mịẹ famaso sịkị,

¹²Nyanaḅọ Ḅe ḍin ḅie ḅụ seni ò ḍiemẹ. Ọ̀ nwọse ọ̀ ḅẹmẹ, “Àrị ị́ya tẹkẹma naasam, à pịkị mịn Oputẹkẹwarị mị ọkị sam anị ini agbama mịẹ ị̀ pịrịpịrịḅịa nyọ ḅaraḅụ.

¹³Àrị ene mị ọlọchịẹma anịkanịka igurube ma fịrịma seni àrị chịnmgbọlụma fị ḅaa-ẹ, anịkanịka ama nwẹngị obi seni ị̀ya tomonima gbin sịkị goyegoye,

¹⁴ini nemikase ị̀ tẹkẹ se siḅụ-pịkị se ini mịẹarị si mị ḅụ vinpịkịmẹ ḅẹḅẹ, anịsịkị anị à soḅie ini naaḅịaye-ẹ, siḅụ ḅarasin ini pịrị, se à pịkị mịẹḅịa inia kirima lọkọlọkọma fịaye pakụmaḅịa.

¹⁵À mị Oputẹkẹwarị mị ḍikiḍiki pịkị ḅụkarakarama mịanga kọn àrị tẹkẹ goyegoye naaḅịa,

¹⁶anịatịḅị àrị anị sẹlẹọkị pịkị anị mịẹfịafịamasam, anị ini ị̀ tẹkẹ gbasoḅịa nyọ ḅaraḅụ. Àrị anị ḍikiḍiki pịkị tọrụ seni anịa ḅụ wẹrị ḅịa sịkịmamgba.

¹⁷Ị́rị́ ị́ nemikase ḅereninyana ḅara seni fịrịnwẹngị ị̀ pịrịmẹ anị ị́ ḍa Devid ḅe mịẹọkụ mị, ị̀ya olokoma koko, pịkị à tọn aye goyegoye nwọ mịẹmẹ ḅẹḅẹ,

¹⁸à ḅereni ị́ ḍa Devid ḅe pịrị na ò furoḅie apụma sịkịmamgba ḅẹrẹtọn Izrẹl mị pịrịḅịa à nwọḅẹye mị, àrị anị kokoḅịa.

¹⁹Ọkụma nemikase ị́rị́ na ị́ya tomonima na sịkịmamgba à chụa ọ́ pịrị olokoma na à tọn ọ́ pịrị ayema na nwọ ḍukonwẹngịkẹ se jịn-a oru ma tẹkẹmẹ ḅẹḅẹ,

²⁰anịọkụma à seni ọ́ pịrị ama mị ḅieḅụ àrị ómine desinḅịa, à pịkị mị à mịẹfịafịamasa Oputẹkẹwarị mị sịkịḅịa anị ini ị̀ tẹkẹtẹkẹḅịa nyọ mị. Nyọnyọ ḅụ sime apụ anị seni kpọti pịkị anị seni papaye mịẹḅịa.

²¹“Oputẹkẹwarị mị mịọkụ anị opuma osi nyana waraḅẹ, ọkụma anịsịkị ḅụ nwẹngị anị ḅọrọḅọ goyegoye ijira nụḅọ ḅụ saraḅịa se nwọ gbelaḅịa, ‘Cheye gose Nyanaḅọ Ḅe mị ḅara se mị ama mị na mị Oputẹkẹwarị mị na mịẹ?’

²²Tomoni pẹkẹrẹ se nwọḅẹḅịa, ‘Anịatịḅị ini ini Nyana inia Tamụnọ Ḅe sịkịmẹ, anị Ijipt ḅieḅụ inia olomuḍapụ ma ḅọrọma pakụmaḅo ḅọ ḅe. Ini nyanaḅereni jịn-a oru ma pịrị pịkị àrị tẹkẹmẹ. Anịẹrẹchị Nyanaḅọ Ḅe mị fa mị ọkịḅo inia ọgọnọ gbanamẹ.’”