Read kirikeni Ẹzra 1 Bible Online

Ẹzra 1 - kirikeni bible

Ẹzra 1

¹Saịrọs, Pesia Amanyanaḅọ ḅe tatarị sẹda kụra mị ḅie, Nyanaḅọ Ḅe, ịkịankoro Jerimaya ḅe ḅụ ḅọrọ ḍukoye mị ḅo karakaraye sọmẹ. Ọ̀ tọn Saịrọs ḅe pịrịmẹ na sịkị famaka ḅaraḅụ ọ̀ mà olokoma se ḍiri ḅie gịẹịn se àrị se ò chuku ḅie sime sẹ mamgba sẹịnma ini àrị gopakụma.

²“Mịn anị Saịrọs, Pesia amanyanaḅọ ḅe pịrị kụrọ mịẹ. Nyanaḅọ, Soḅie sime Tamụnọ Ḅe ori ị̀ se bebe tomonikiri mgba ḅie ḅụ ḅẹrẹtọnḅọ mịẹsam, ọ̀ pịkị fịrị se ị̀ pịrịmẹ, na Jerusalẹm, Juda ḅie sime ama mị ḅie àrị Oputẹkẹwarị nama ọ̀ pịrị.

³Ye Tamụnọ Ḅe ómine na sime ómine oria tomoni mamgba. Ó Jerusalẹm mun se kpoto Nyanaḅọ Ḅe oria Oputẹkẹwarị mị namaḅịa, Izrẹl Tamụnọ Ḅe, Jerusalẹm ḅie ini tẹkẹtẹkẹ Tamụnọ Ḅe.

⁴Kụrọ ḅaraḅụ ini desin apụma ḅie pịkịma so ḍọkịarịapụ omi-ẹ ḅẹḅẹ, ini na kpekima angapụma mị ḅarachụa mị nyana ini pịrị. Seleḅa na goli na ini nwọse ini pịrịḅịa, ḍiepịrịaye na yepụra-nama na, ini pịkị se Jerusalẹm, Tamụnọ Oputẹkẹwarị ḅie mịẹḅaka-agba-mịẹḅịa ḍiepịrịaye na se ini pịrị.”

⁵Anịsịkị Juda na Bẹnjamin na sẹma ḅie tịḅịnịma na, agbamịẹapụma na pịkị Livaị apụma na pịkị Tamụnọ Ḅe kuḅie jike na mun Jerusalẹm ḅie oria Oputẹkẹwarị mị nama nwọḅẹ apụ mamgba na.

⁶Ini na kpekima angapụ mamgba ḅakama ye se ini pịrịmẹ, se ḅarachụa ini pịrị gose: se warị angaḅịaye ḅụ, seleḅa aye na goli na ḍiepịrịaye ḅụ, ini ḅiaye na pịkị àrị pụraḅịa namama na, pịkị jịn yela ngọ na, pịkị ini se Oputẹkẹwarị ḅie mịẹḅaka agba ḅẹḅịa ḍiepịrịaye na ini nwọse ini pịrịmẹ.

⁷Amanyanaḅọ, Saịrọs ḅe, Amanyanaḅọ Nebukadneza ḅe, Jerusalẹm Oputẹkẹwarị mị ḅie deki so mun oria oru ma warị ḅie koroma bọlị ma na ọmọngọ ma na ò se pịkị ini pịrịmẹ.

⁸Ori àrị ḅọrọma amanyanaḅọ warị ngọ koko fịrịtịḅịdaḅọ Mitrẹdat ḅe pịrị se ori àrị se gbọrịye-gbọrịye ḅụ ḍiri ḅie chụa se Juda Gọvịna Shẹsbaza ḅe pịrịmẹ,

⁹mà mị ye ma-ẹ: agbamịẹ fịrịnwẹngị goli goli bọlị ma — soi agbamịẹ fịrịnwẹngị seleḅa bọlị ma — mẹndẹ oyiasi fịnjị jịn-a bọlị — gbọrịyefa soi goli goli bọlị kalaye ma — soi seleḅa bọlị kalaye ma — ẹndẹ na oyi jịn-a fịrịnwẹngịaye — mẹndẹ oyiasi fịnjị

¹¹Shẹsbaza ḅe na ori na ini kụrọḅara ḅụ desin Babilọn mun se pịkịmaso apụma se ḅo goli-a bọlị ma na seleḅa bọlị ma na pịkị jịn-a ngọ na àrịmgba oyitẹrẹ ẹndẹ fịnjị na oyi-a si na-ẹ.