Read kirikeni Ẹzra 10 Bible Online

Ẹzra 10 - kirikeni bible

Ẹzra 10

¹Ẹzra ḅe Oputẹkẹwarị tọrọkọ ḅụ tịḅịtu tẹkẹ se owu ma sima gopakụmarị sịkị, Izrẹlapụma ḅụ ḅaka kpo, owuapụ na eremeni na, awọmẹnị na koḅirima ò kelema se ḅụakụ owu kọn aḅẹ.

²Se Ilam sẹ ḅie Shẹkanaịya ya, Jihaịẹl ḅe nwọse Ẹzra ḅe ḅẹmẹ, “Wa nwọ jịn sẹ eremeni simesa sịkị, wa Tamụnọ Ḅe mịẹ simasam, anịẹḅẹsọ, Izrẹl mị pa ḅereni ḅụ kụrọkuḅie nyana waraḅẹ.

³Mịọkụ wa opu osiḅụ ḅụsekiri pịrị se yeḅereni mịna Tamụnọ Ḅe pịrịḅịa na mịna eremeni ma na inia awọmẹnịma na wa ini ḅẹḅịa na ini so, wa ị́rị́ na pịkị osi se Tamụnọ olokoma pịrịarị jịn apụ na se wa tetemaye nwọ mịẹḅịa. Tamụnọ olokoma ḅiye wa nwọ mịẹḅịa.

⁴Ị́ya kiri-ẹ fịrị deki nwẹngị. Ị́ya ọḅụju wa omi-ẹ, anịẹrẹchị fịrị mị sakị, pịkị ọrị na anị ḅụọ nyana chịẹsam.”

⁵Anịẹrẹchị Ẹzra ḅe agbamịẹapụma na Livaị apụma na ḅe tịḅịnị na pịkị ísí kirikọn apụma na ḅẹmẹ na, se Shẹkanaịya ḅe ḍukoye mị mịẹkụrọma ḅụ ini ḅo ọḅọkụ fị.

⁶Se Oputẹkẹwarị mị tọrọkọ ọ̀ sịsẹ so Jẹhohanan, Ẹlaịashib yaḅe warị mun se anịnyọ mọnọ ḅamamẹ, ini desin se pịkịmaḅoapụ ma Tamụnọ Ḅe ḅụ nyanaka ḅereni mị gose, ori ngịrị ḅụ na kuḅie si ḅụ na simemẹ. Gbọrịye sọ ọ̀ fịkẹ ọ̀ pịkị mengi ḅukẹ.

⁷Ini oku fịrịma Jerusalẹm na Juda na sẹịnmẹ na ini desin se pịkịmaḅoapụ mamgba ini Jerusalẹm ḅie koḅirima

⁸anị tịḅịdapụ ma kụrọ pịrị ḅaraḅụ, ḅoka mun tẹrẹ-a ḍin laḅọ goyegoye oria ngọma ini kọrịḅịa, pịkị ori sọnị inia ḅieḅọ-ẹ nwọḅẹ ḅara ini nwọse ori ọkị ẹkẹ.

⁹Esenie akalụ mị ḅie, tẹrẹ-a ḍin ḅụ ọkịmun si ḍin laḅịa sịkị, Juda na Bẹnjamin na sẹma ḅie angapụ mamgba, iniḅo Jerusalẹm Oputẹkẹwarị odo ḅie koḅirimamẹ. Anịsịkị ḅụ, ene opuma koroaḅẹ, ene mị ḅe oḅoku ḅara na, pịkị koḅiria mị ḅe kụrọ ḅara mị na gose nweni mamgba inia oju geregereaḅẹ.

¹⁰Ẹzra agbamịẹḅọ ḅe, sịsẹ chịẹ se ọkwẹịn tomonima pịrịmẹ. Ọ̀ nwọ ḅẹmẹ, “Ó ḅereni nyanakẹ, anị ó gose jịn sẹ eremeni na simeye-ẹ, anị mị ḅụ, ọ́ ḅẹrẹ ḅarasi ọkịḅo Izrẹl mị ọgọnọ gbanasam.

¹¹Mịọkụ ọ́ sakị ọ́ mịẹasi ma go Nyanaḅọ ọ́mịna ḅieju-aḍapụma Tamụnọ Ḅe pịrị, ọ́ pịkị ò ḅieḅẹlẹmaye nwọ mịẹ. Mịna amama ḅie anga jịn sẹ apụma ḅụ ómine ọ́mịnaḅụ pusin ọ́ pịkị ọ́mịna jịn sẹ eremeni ma ḅụ ḅarasin.”

¹²Tomonima oloku se pẹkẹrẹmẹ, “Ị́ ḍukoye goyegoye wa mịẹḅịa.”

¹³Ọkụma ini pịkị nwọ ḅẹmẹ na, “Tomoni kpo mị opuma ḅakamẹ, ene pịkị kụrọma koroaḅẹ, wa ineda mị tịḅịkikimaye oforika nyọ ḅụ chịẹ ẹkẹ. Mịn ye mị anị ineda gbọrị ḍin na mama ḍin na ḅụ ḍuko sinḅịayekẹ, anịatịḅị mịnaḅụ opu pẹkẹrẹ mị si mị ḅie suluku waraḅẹ.

¹⁴Ye mịna ḅie fịrịtịḅịnị ma Jerusalẹm ḅie sime, se tọrụ se mị ḅẹrẹ mị ḍiki. Ye jịn sẹ eremeniḅọ na simeḅọ goyegoye ḅo kịrịkịrị sịkịḅụ, pịkị tịḅịnịma na, ḅẹrẹkọn apụma na, ama ama ḅieḅụ. Mịn ḅara ḅụ mị Tamụnọ Ḅe oria ịganị, mị ḅẹrẹ ḅụ soḅịaye-ẹ.”

¹⁵Mẹshụlam ḅe na Shabetaị Livaịḅọ ḅe na inia ḅụ sọ Jonatan, Asahẹl yaḅe na pịkị Jazeaya, Tikva yaḅe na sakịsikima ini ḍukoye mị ḅụ ini na tụḅụrụḅọ ofori-ẹ.

¹⁶Ini desin se pịkịmaḅoapụ ma sọnị ini ḍukoye mị ini ọkịmẹ, anịẹrẹchị agbamịẹ Ẹzra ḅe sẹsẹ ma ḅie tịḅịdapụ ma ḅụ nweni tọnmẹ, se ini inia ẹrẹ ma se ḍiri ḅie chụamẹ. Oyi akalụ mị ḅie ngei ene ḅụ ini sakị ḅẹrẹ ma chuku ḅie ḍọkịmẹ,

¹⁷ọkịḅo tẹrẹ akalụ laḅịa sịkị jịn sẹ eremeni na sime owuapụ-a ḅẹrẹ ma chuku ḅie ini ḍọkị sosam.

¹⁸Mịn anị jịn sẹ eremeni na sime owuapụma ẹrẹ ma-ẹ: Jọsụwa ḅe na oria mịnapụ owuapụma na sẹ ḅieapụ: Jẹhozadak owuapụ awọma anị Measaya, Ẹleaza, Jerib pịkị Gẹdalaya ḅe na.

¹⁹Ini ḅerenimẹ na ini inia erema na sia ḅịa, se gbọrị ajirima nwọ pakụmaḅomẹ se ini mịẹasi ma ḅe agba mịẹḅịa ẹrẹchị.

²⁰Ima sẹ ḅie apụ: Hananị ḅe na Zẹbadaya ḅe na.

²¹Harim sẹ ḅie apụ: Measaya ḅe na, Ịlaịja ḅe na, Shẹmaịya ḅe na, Jihaịẹl ḅe na pịkị Ọzaya ḅe na.

²²Pashọ sẹ ḅie apụ: Ilaịẹhoinaị ḅe na, Measaya ḅe na, Ishmẹl ḅe na, Netanẹl ḅe na, Jozabad ḅe na pịkị Ẹleasa ḅe na.

²³Jozabad ḅe na, Shimẹaị ḅe na, Keleya (oria jịn ẹrẹ Kelita) Pẹtahaya ḅe na, Juda ḅe na, pịkị Ẹleaza ḅe na.

²⁴Ẹlaịashib. Shalọm ḅe na, Telẹm ḅe na, pịkị Uraị ḅe na.

²⁵Parọsh sẹ ḅie apụ: Remaya ḅe na, Izaịya ḅe na, Malkaịja ḅe na, Mijamin ḅe na, Ẹleaza ḅe na, Malkaịja ḅe na, pịkị Bẹnaya ḅe na.

²⁶Ilam sẹ ḅie apụ: Matanaya ḅe na, Zẹkaraya ḅe na, Jihaịẹl ḅe na, Abdaị ḅe na, Jẹremọt ḅe na, pịkị Ịlaịja ḅe na.

²⁷Zatu sẹ ḅie apụ: Ilaịẹhoinaị ḅe na, Ẹlaịashib ḅe na, Matanaya ḅe na, Jẹremọt ḅe na, Zebad ḅe na, pịkị Aziza ḅe na.

²⁸Bebaị sẹ ḅie apụ: Jẹhohanan ḅe na, Hananaya ḅe na, Zabaị ḅe na, pịkị Atlaị ḅe na.

²⁹Banaị sẹ ḅie apụ: Mẹshụlam ḅe na, Malọk ḅe na, Adaịa ḅe na, Jeshọb ḅe na, Sheal ḅe na, pịkị Jẹremọt ḅe na.

³⁰Pahat Moab sẹ ḅie apụ: Adna ḅe na, Kelal ḅe na, Bẹnaya ḅe na, Measaya ḅe na, Matanaya ḅe na, Bẹzalẹl ḅe na, Binuị ḅe na pịkị Manasẹ ḅe na.

³¹Harim sẹ ḅie apụ: Ẹleaza ḅe na, Ishaịja ḅe na, Malkaịja ḅe na, Shẹmaịya ḅe na, Shimiọn ḅe na, Bẹnjamin ḅe na, Malọk ḅe na, pịkị Shẹmaraya ḅe na.

³³Hashọm sẹ ḅie apụ: Matenaị ḅe na, Matata ḅe na, Zebad ḅe na, Ẹlifẹlẹt ḅe na, Jeremaị ḅe na, Manasẹ ḅe na, pịkị Shimẹaị ḅe na.

³⁴Banaị sẹ ḅie apụ: Madaya ḅe na, Amram ḅe na, Yuẹl ḅe na, Bẹnaya ḅe na, Bẹdiya ḅe na, Keluhaị ḅe na, Vanaya ḅe na, Mẹrimọt ḅe na, Ẹlaịashib ḅe na, Matanaya ḅe na, Matenaị ḅe na, pịkị Jeasu ḅe na.

³⁸Binuị sẹ ḅie apụ: Shimẹaị ḅe na, Shẹlẹmaya ḅe na, Netan ḅe na, Adaịa ḅe na, Maknadebaị ḅe na, Shashaị ḅe na, Sharaị ḅe na, Azarẹl ḅe na, Shẹlẹmaya ḅe na, Shẹmaraya ḅe na, Shalọm ḅe na Amaraya ḅe na, pịkị Josẹf ḅe na.

⁴³Nebo sẹ ḅie apụ: Jeaịẹl ḅe na, Matitaya ḅe na, Zebad ḅe na, Zẹbina ḅe na, Jadaị ḅe na, Joẹl ḅe na, pịkị Bẹnaya ḅe na.

⁴⁴Mịnapụ mamgba jịn sẹ eremeni na simeapụ-ẹ. Ini ini na sia pịkị inia awọma desinmẹ.