Read kirikeni Ẹzra 5 Bible Online

Ẹzra 5 - kirikeni bible

Ẹzra 5

¹Anịsịkịḅụ mama ịkịankoroapụ, Hagaị ḅe na, Ido ya Zẹkaraya ḅe na, Izrẹl Tamụnọ Ḅe ẹrẹ ḅụ ọkwẹịn Juda ḅie na Jerusalẹm na ḅie anga Juapụma pịrịmẹ.

²Shealtịẹl ya Zẹrubabẹl ḅe na, Jẹhozadak ya Jọsụwa ḅe na oku ma naa sịkị ini sakị kpoto Jerusalẹm ḅie Oputẹkẹwarị mị namamẹ, se mama ịkịankoroapụma pịkị ḅarachụa ini pịrịmẹ.

³Anị gbọrị sịkị ḅụ Yufretis mị ḅụ Ịrụasọsọ nyọ ḍikiḍikiarị gọvịna Tatẹnaị ḅe na pịkị Shẹta Bozẹnaị ḅe na pịkị inia juo fịrị tịḅịnịma na so Jerusalẹm mun se ini gbelamẹ: “Tụḅọ kụrọ se ọ́ pịrị se ọ́ mịn Oputẹkẹwarị mị nama se pịkị mịn ḅara se anị karakarama wẹrị?”

⁴Ini pịkị ḅarachụa Oputẹkẹwarị namarịapụ mamgba ẹrẹ ma gbela nemimẹ.

⁵Ọkụma Tamụnọ Ḅe, Juapụ tịḅịnịma, ori ini ḍikiḍikiaḅẹ, pịkị Pesia fịrị tịḅịnịma sọnị ini ḅarị ini na kụrọayemịẹ-ḍọkịkẹ ọkịmun ini ḍiri gịẹịn Amanyanaḅọ Darịọs ḅe sẹịnma se ò se ini pẹkẹrẹ ḅịpị ma ḅo inia ḅara lakasimeogbo.

⁶Mị anị ini gịẹịn Amanyanaḅọ ḅe sẹịnma ḍiri mị-ẹ:

⁷“Amanyanaḅọ Darịọs mị ị́ya ḍiri-ẹ, ye ị́ya ḅẹrẹtọn mị dein ḅụ sime.

⁸“Amanyanaḅọ ị́ nemiḅịa na wa Juda sẹ mị ḅie mun se ḍọkịḅo ọrịmẹ na opu Tamụnọ Ḅe Oputẹkẹwarị mị ini pịkị kpoto opu-a ḍụparị okpokpo nwọse anị namaḅẹ, warị mị dachịẹmaḅịa kụrọ-a chịn pịkị warị agbagba ma ḅụ sọsam, fịrị mị ini iḅiọkụma tọrụkweinma anị nwẹngịaḅẹ, anị pịkị tọrọkọ-tọrọkọ mun aḅẹ.

⁹“Wa tịḅịnịma gbelamẹ na tụḅọ, kụrọ se ini pịrị se ini pịkị kpoto Oputẹkẹwarị mị nama, pịkị nwọse anịkarakarama wẹrị-ẹ nwọḅẹ ḅọ, ini nwọ ḍuko wa pịrị.

¹⁰Wa pịkị inia ẹrẹ ma gbela nemi ḍọkịmẹ mịẹso sịkị fịrị mị ḅe tịḅịdapụ ma ị́ nwọ nemiḅịa ọkụ.

¹¹“Ini pẹkẹrẹmẹ na, ‘Mine anị so-na-kiri-na-tẹmẹ Tamụnọ Ḅe oria fịrịnwẹngịapụ-ẹ, wa kpoto namarị Oputẹkẹwarị mị, gbọrị Izrẹl opu kụrọ amanyanaḅọ tọntọn-a kụra ḅụ jokoma nama so pịkị se ọrụtọn karakarama sosaye-ẹ.

¹²Ọkụma mịna ḅieju-aḍapụma soḅie Tamụnọ Ḅe ịganịmaye gose ò ḅereni ḅụọ-ḅụọḅụ Kaldia amanyanapụma ḅie gbọrịḅọ, Nebukadneza, Babilọn amanyanaḅọ ḅe pịrị se ori ini nẹngịmamẹ. Oputẹkẹwarị mị ini kansinmẹ se pịkị tomonima kunso Babilọn mun mẹ.

¹³Anịsịkị Amanyanaḅọ Saịrọs ḅe amanyanaḅọ ḅaraḅụ Babilọn ḅie ḅẹrẹtọn tatarị kụra mị ḅie. Ori, Saịrọs ḅe kụrọ pịrịmẹ na ini kpoto Oputẹkẹwarị mị nama.

¹⁴Nebukadneza ḅe Jerusalẹm, Oputẹkẹwarị ḅie dekiso goli na seleḅa na fịrịnwẹngịaye na, ò se so mun oru-awarị ma ḅie koromaye ma, Amanyanaḅọ Saịrọs ḅe ori àrị ḅọrọma Shẹshbaza nwọ chịn gbọrị owuḅọ, anị ò se gọvịna mịẹ Juapụma pịrịḅọ ḅe pịrịmẹ.

¹⁵Amanyanaḅọ ḅe ḍuko ọ̀ pịrịmẹ na ori àrị ọkị se mun Jerusalẹm Oputẹkẹwarị ḅie koroma se ọ̀ pịkị kpoto Oputẹkẹwarị mị nama olomuma anị sime kiri mị ḅụ.

¹⁶Anịẹrẹchị Shẹshbaza ḅe mị ḅo anịa chuku sẹkẹ ḍụparịma iseye-ẹ; warị nama fịrị mị anị sịkị ngịsị sakịmẹ ọkịḅo mịọkụ lamẹ, ọkụma ma anị pa kulumakẹ.’

¹⁷“Mịọkụ amanyanaḅọ, anị ḅọrọ nemikase ị́ ḅụḅẹlẹḅịa ọkụma, pa Babilọn ḅie amanyanapụ ḍiri ma ḅie ḍọkị, nwọfa amanyanaḅọ Saịrọs ḅe ọ̀ kọkọma ọkọsime kụrọ pịrị na ini kpoto pịkị Oputẹkẹwarị mị nama Jerusalẹm ḅie, se ḍuko wa pịrị wa mị ḅẹrẹ ḅie ị́ tọnye mị nwọ nemi.”