Read kirikeni Ẹzra 9 Bible Online

Ẹzra 9 - kirikeni bible

Ẹzra 9

¹Ma mamgba ḅo mịẹ ḅọrọso sịkị, Izrẹlapụma ḅie tịḅịnịma ḅụ dapụ ḅo ḍuko ị̀ pịrịmẹ na, tomonima na, agbamịẹapụma na, Livaị apụma na, ini inina-kpekima anga sẹma, anị Amọn na Moab na, Ijipt na, Kenan na, Hitaị na, Pẹrizaị na Jebus na pịkị Amọraị apụma na ḅụ, ma ini pa pua sikimakẹ. Ini pa mịnapụma mịẹmịẹ ḅụngụngụmaye ma mịẹ-aḅẹ.

²Ju owuapụma ini jịn sẹ eremeni simeaḅẹ, anịẹrẹchị Tamụnọ-a fịafịa tomonima, iniḅo pụlasapụ sọsam. Tịḅịnị ma na fịrịtịḅịdapụ ma na mị si mị mịẹtẹịnmẹ.

³À mịn mị naa sịkị, kuḅie siḅụ, àrị ị̀ya ḅụchụayema kanmẹ, ị̀ tịḅị inime ma na ị̀ ḅapuko ọgụrẹ ma na à nwọ burasinmẹ se yeḅụosọ ḅụ à kururu ḅụ yawụma simemẹ.

⁴Àrị anịnyọ ngịrị ḅụ sime nweni saso ḅiri agbamịẹ sịkị mị ḅo lamẹ, se tomonima ḅo sakị koḅirima ị̀ kelemamẹ—Izrẹl Tamụnọ Ḅe ini desin se pịkịmaḅo apụma ḅụ ḍuko sima gose inimgba inia ḅalafaḅẹ.

⁵Saso agbamịẹ sịkị mị ḅo lasịkị, àrị ngịrị sime nyọ ḅụ à sịsẹmẹ, ị̀ya ḅụchụaye kan ayema pa ị̀ ḅụ omi-ẹ, à kpẹrẹkị, ị̀ ḅarama dekichịẹma Nyanaḅọ ị̀ Tamụnọ Ḅe da se tẹkẹmẹ.

⁶À nwọḅẹmẹ, “Yei! Tamụnọ, ị̀ ḅụ opuma gereremẹ ị́ tọrụkuḅu ị̀ tịḅị dekichịẹma. Mịna sima àrị kpokponima se gele mịna tịḅị ma nẹngị mun so mị lamẹ.

⁷Mịna ḅieju-aḍapụma enema ḅie ọkịḅo mịọkụ mine ị́ya tomonima sịkị la, wa ḅakama si mịẹsam. Mịna sima gose mine na, mịna amanyanapụma na, agbamịẹapụma na, wa ḅịkị mun jịn sẹ amanyanapụ ḅara ḅie sọmẹ, se ini wa ḅaafama, wa furu, pịkị wa dekisomẹ ikoliapụ ḅaraḅụ. Wa jokoma ḅụgerere ḅụ sọmẹ anị mịmgba sọ wa pa sime ọkụ-ẹ.

⁸Mịọkụ, Yei Nyanaḅọ mịna Tamụnọ, kala sịkị ḅụ ị́ ḍikitịḅịfoin nyana wa pịrịmẹ, ị́ pịkị mịẹmẹ, mịnaḅụ dapụ omoni ḅara ḅie pọkọ pakaḅo, se mị fịafịa nyọ mị ḅụ deinma simemẹ. Ị́ mịẹmẹ wa omoniapụ sọ ḅụ pọkọ pakaḅo ịwọ ḍumo ḅie sọmẹ.

⁹Mine omoniapụ-ẹ ọkụma ị́ ḅereni wa pịrịkẹ omoniapụ ḅara ḅụ wa ḅụfụka da, ị́ Pesia amanyanapụma mịẹmẹ, se mịna mịẹmịẹaye inia ḅụḅẹlẹye sọmẹ, se ini ḅereni wa pịrịmẹ na wa pa anga ma mun, se ị́ya Oputẹkẹwarị kangulugulusaye mị wa kpoto nwọ nama se ḅo mịanga Juda ḅie na Jerusalẹm ḅie na, ḅụfụka ofori ḅaraḅụ deinma simemẹ.

¹⁰“Mịọkụ, Yei! Tamụnọ, wa pịkị cheḍukoḅe nwọ pakasaye mamgba ḅụ? Wa pịkị ị́ tọn wa pịrịayema kokokẹ

¹¹anị ị́ya fịrịnwẹngị ịkịankoroapụma ḅụ, ị́ ḅọrọ ḍuko wa pịrịayema. Ini ḍuko wa pịrịmẹ na, wa mun ọkị anga-ẹmun-arị ama mị si ama-ẹ, anịatịḅị anịa ḅie angapụma ini ísí ịkọlị ọkịmun ísí ịkọlị la, ḅụngụngụma siamịẹmịẹye se ama mị ḅie ḅeinmasam.

¹²Ini ḍuko wa pịrịmẹ na wa ini na eresime gbolomama, wa ḅọrọ ḅimẹ na wa ama mị ḅe ḅẹlẹ ọrị pịkị anị ḅọrọma mịna awọma pịrị se ini anịa ḅie anga gbasoḅịa ḅẹḅẹ, wa ḅereni ini ama mị ḅie angapụma pịrị ma se ye ini na lọkọlọkọ.

¹³Mịna si mịẹmịẹaye ma na, mịẹirima ma na, mịna ḅụ pakasaye ma ḅụ na pịkị wa da fomuḅara mamgba na, sọnị wa nemimẹ na, ị́rị́ mịna Tamụnọ Ḅe wa la gbẹịn fomuḅara ị́ nwọse wa pịrịkẹ, ị́ pịkị ḅereni wa pịrị, se wa ḍumomẹ.

¹⁴Anịọkụma cheye ẹrẹchị wa pịkị ineda ị́ya olokoma kọkọrọḅọrọ se mun mịna sitịḅịnyanapụma na ama-na-ere-na sime kọnḅịa ọkụ? Wa nemikase ọkọmịẹ ọkụma, ị́ya ịganị mịnaḅụ opuma ḅakaḅịa se mine mgba ị́ wa ḅaafamaḅịa gbọrịḅọ sọ pịkị kọn ẹkẹ.

¹⁵Nyanaḅọ, Izrẹl Tamụnọ, ị́rị́ karakaraḅọ-ẹ, ị́ mịẹse wa ḍumomẹ, mịna mịẹirima ma wa ḍukopakụma ị́ pịrịsam, ị́ tọrụkuḅu ḅo mị wa gbẹịnkẹ.”