Read kirikeni Nẹhimaya 4 Bible Online

Nẹhimaya 4 - kirikeni bible

Nẹhimaya 4

¹Mine Juapụma pịkịna kpoto onu mị nama aḅẹ Sanbalat ḅe nwọ naa sịkị, anị opuma ori ịganịmamẹ se ọ̀ sakị wa seni ḍẹrịye mịẹmẹ.

²Ori na nwẹngịapụma na, Sameria owunima na tọrọkọ ọ̀ nwọḅẹmẹ, “Mà mịẹḅịa-ọkụ-ofori Juapụma cheye ini nwọ mịẹ-ao? Inia ḅie tọnmẹ na ini kpoto mị opuama mị namaḅịa? Agbamịẹ ḅụ ini ineda gbọrị ene se fịrị mị nwẹngị soḅịa ini nwọ chịn? Nwọ dọkị kansarasa ḍụparị kpo ma ḅie, ini ineda ḍụparị ọkịpakụmaḅo ye namaḅe?”

³Tobaya, Amọnḅọ ḅe anịnyọ ori-anga-sịkị ọ̀ chịẹ sime se nwọḅẹmẹ, “Ndende sime onu ini ineda nwọ namaḅe? Pụnụ pembe ineda anị ḅakụ gbinḅịa!”

⁴À tẹkẹmẹ, “Ini poki wa seni kpọtiarịapụ ma, Yei Tamụnọ! Ye ini wa seni kpọtiarị ọkụ mị inia tịḅịogbo sime. Ye ini nyanaye layelaye tomoni àrị furusin, se ye ikoliapụ ḅara ini nwọse ini kunso jịn sẹ mun.

⁵Ini mịẹ siaye ma ḅarasin ini pịrịma pịkịna inia sima se ḅieḅaramama, anịatịḅị mine nyọ mị namarịapụ ma ini wa ḍukosimasam.”

⁶Anịẹḅẹsọ wa pa onu mị namama mun aḅẹ, ḅọlọkẹ anịa gele mị ḅo mamaju gbasị lamẹ, anị jokoma gele laḅịa ḅara mị ḅụ. Anịatịḅị tomonima ini ḅụkarakarama fịrịnwẹngị mị pịrịmẹ.

⁷Sanbalat ḅe na, Tobaya ḅe na, pịkịna Arab apụma na, Amọn apụma na pịkịna Ashdọd apụma na, naamẹ na wa kpoto Jerusalẹm onu mị namarị fịrị mị tọrọkọ-tọrọkọ mun aḅẹ, pịkịna anịaḅụ sime ẹmbẹ mamgba wa pụnmasosam ḅẹye mị opuma ini ịganịmamẹ.

⁸Anịẹrẹchị inimgba gboloma ḅịpị-se-ogbo-chụamẹ, ḅo owu seni Jerusalẹm paka se ḅụḅalaḅala pakaḅịa ḅara,

⁹ọkụma wa mịna Tamụnọ Ḅe tẹkẹmẹ, seni nyọ koruapụ se ḍin-na-enekaka na ḅụ koroma ini ọbịmẹ.

¹⁰Judapụma chuchu gbọrị nime omi-ẹ: “Ikuye pụra ḅụ mịnaḅụ lọkọmẹ; Dekisinḅịa siaye opuma ḅakamẹ. Nde wa ineda onu mị namaḅịa ọkụ mịmgba?”

¹¹Mine-na-tarakapụ ma nwọ chịnmẹ na, wa ini ọrị ẹkẹ anịkanịka mịẹarịye wa nwọ nemi-ẹkẹ seni iniḅo wa gbẹịnmachịẹ seni wa ḅaa se fịrị mị ḅo dachịẹḅịa.

¹²Ọkụma sịkịna sịkịnaḅụ mine-na-tarakapụ ma ḅie angarị Juapụma ḅoḅo mine-na-tarakapụ ma tọn tọn wa pịrịarịye ma ḍuko ḍuko wa pịrịaḅẹ.

¹³Anịẹrẹchị kongo na, angwa na, lubu na, ḍẹịn na, à nwọse tomonima pịrịmẹ, sẹsẹ ḅụ ini onu mị ọḅụju ḅụ anị koru kelema ma pa namasoka nyọma ḅụ.

¹⁴À ḍọkịḅo ọrịmẹ na tomonima ḅụḅalaḅala inia ḅie sọmẹ, anịẹrẹchị àrị inia tịḅịnịma na pịkị fịrịtịḅịnị ma na ḅẹmẹ, “Mine-na-tarakapụ ma ómine ini ḍikiḅalafama. Ó ḅiekoroma Nyanaḅọ Ḅe ò ḍụḅa pịkịna ḅalafama la-ọkụ, anịgose ómine owusọ ọ́mịna sẹ mị na, ọ́mịna awọmẹnịma na, ọ́mịna erema na, pịkị ọ́mịna amama na, warịma na pịrị.”

¹⁵Mine-na-tarakapụ ma naamẹ na ini tọn wa pịrịayema wa nemisam anị iniaḅụ okoromẹ na Tamụnọ Ḅe ori ini tọn ayema nẹngịmasam. Anịḅụ minemgba pịkịna mun kpoto onu mị namamẹ.

¹⁶Anịsịkị ọkị tọrọkọ mun ị̀ya tomonima ḅụ pẹkẹrẹ fịrị mị nwẹngịmẹ, pẹkẹrẹ pịkịna owuniaye ḅiri, angwa na, agbọ na, lubu na ḍẹịn na ọlọ chịẹ nyọ mị koruaḅẹ. Mịna tịḅịnịma sọnị pịkịna kuḅie-laḅaraḅụ tomonima kuḅie kụrọmamẹ

¹⁷anị onu mị namarị apụ ma-ẹ. Fịrịnwẹngịaye ma pụrarịapụ ma sọnị, gbọrị ḅara ini nwọse fịrịnwẹngị pịkị ísí ḅara mị seni owuniaye ọlọmẹ,

¹⁸onu mị namarịḅọ goyegoye kongo nwọse nụḅọ konju kpọmẹ. Yepakasam ọ́ ḅụkarakarama-ẹ nwọḅẹ oḍu mị ofuroarịḅọ ḅe ori ị̀rị̀ na simemẹ.

¹⁹À ḍuko tomonima na fịrịtịḅịnị ma na pịkị ḅẹrẹtọn apụma na pịrịmẹ na, “Fịrị mị opuma wasama-ḅọlọ-nyọ la ẹrẹchị wa jịnḅọ jịnḅọ ḅụ sikimamẹ onu mị ḅụ.

²⁰Ó nemikase oḍu mị fie se naamẹ ḅẹḅẹ, ó koḅirima ị̀ kelema. Mịna Tamụnọ Ḅe owu mị sọ wa pịrịḅịa.”

²¹Anịẹrẹchị ene ḅene-ḅene, dede ḅie dedeḅie ọkịmun ḍinḅie lolia ma paka sịkị la, mịna ḅie pẹkẹrẹ onu mị ḅụ fịrịnwẹngịarị sịkị ísí pẹkẹrẹ mị angwa ọlọ chịẹ nyọ mị koruaḅẹ.

²²Mịn sịkị mị ḅụ à ḍuko kụrọ mị nyana apụma pịrịmẹ na, ini na pịkịna ḅarachụa ini pịrịarịapụ mamgba na, ini Jerusalẹm ḅie sime ḍin mị ḅụ, mịẹse wa ineda ḍin mị ḅụ opuama mị koru pịkịna enekaka ḅụ fịrịnwẹngịḅịa ḅara.

²³Ị̀ya ḅụchụayema à sinkẹ ḍin ḅie sọnị, anị ḅọrọ ị̀rị̀na-nwẹngịapụ ma-o, ị̀ya fịrịnwẹngịapụ ma-o, pịkịna ị̀ koruarịapụ ma sọnị. Minemgba mịna owuniaye mịna ḅaraḅie omi-ẹ.