Read kirikeni Nẹhimaya 5 Bible Online

Nẹhimaya 5 - kirikeni bible

Nẹhimaya 5

¹Sịkị kele ḅọrọsa sịkịḅụ, Juapụ ama-na-ere-na sakị inia juo Juapụma seni ḅẹrẹ suamẹ.

²Da apụ nwọ ḅẹmẹ, “Mịna furo ḅakamẹ, mịẹse wa ḍumoma munḅịa ịpịamgba wa nwọ ḅimẹ.”

³Jịn apụ nwọ ḅẹmẹ, “Wa mịna ozuma na, iru-mịẹ-chịnmgbọlụ-ozu ma na, warịma na seni onyechịẹmamẹ se ḅakama ịpịamgba nyanamẹ ḅuru wa ḅaa-ẹkaye gose.”

⁴Jịn apụ pa pịkị nwọ ḅẹmẹ, “Wa mịna ozuma na iru-mịẹ-chịnmgbọlụ-ozu ma na se igbiki ḅọlọmẹ, seni amanyanaḅọ ama-ocho-igbiki mị gbẹịnḅịa ẹrẹchị.

⁵Mine na mịna juo Juapụma na gbọrị sẹ ḅie apụ-ẹ. Mịna awọmẹnịma sime iḅiḅara anị inia awọmẹnịma sọnị sime ọkụ anịka? Ọkụma wa mịna awọmẹnịma seni omoniapụ mịẹmẹ. Mịna eremeni awọma ḅie da apụ wa nwọse omoniapụ ḅaraḅụ dẹrịsam. Wa ḅarị mịẹḅịa-ọkụ ofori-ẹ, anịatịḅị mịna ozuma na, iru-mịẹ-chịnmgbọlụ-ozu ma na mịna ḅara ini àrị ọkịsosam.”

⁶Inia ḅẹrẹ ma à nwọ naa sịkị, opuma ị̀ ḅụosọmẹ

⁷anịḅụ à ḅo fịrịnwẹngịmẹ. Tomonima tịḅịnịma na, fịrịtịḅịnị ma na, ḅịpị ḅọkụḅọkụmaka ḅara ḅụ, à ḅelema ḍuko ini pịrịmẹ na, “Ọ́mịna juo Juapụma ọ́ nwọ pụndaḅẹ!” À koḅiria chịnmẹ mị ḅụfụkama ḅẹrẹ mị na gbolomaye gose

⁸se à nwọ ḅẹmẹ, “Anị-sime-ọkụ simeọkụ sọnị wa ineḅịa ḅara ḅụ, mịna juo Juapụ iniaḅụ seni jịn sẹ ḅie omoniapụ ḅara ḅụ dẹrịapụ ma, wa pịkịna nwọ fẹ pịkịma ḅoaḅẹ. Mịọkụ ọ́ kụrọḅara seni ọ́mịna mịnapụma mịẹ-aḅẹ; na ini iniaḅụ seni ómine dẹrị-ẹ, anị ọ́mịna juo apụma!” Tịḅịnị ma ini yawụma simemẹ, ini ineda gbọrịye sọnị ḍukokẹ.

⁹Anịsịkị à nwọ ḅẹmẹ, “Ọ́ mịẹarịye mị siye-ẹ! Anị ḅụgbẹịnmẹ ọ́ Tamụnọ Ḅe ḅịpị poki, seni karakaraye mị mịẹ. Anịḅụ ọ́ ḅarị ẹmbẹ se mine-na-taraka Jịn sẹ apụ pịrị seni ini wa seni ḍẹrịye mịẹ ẹkẹ.

¹⁰À mịẹsam tomonima ị̀ ḅara igbiki na ịpịamgba na ḅọlọmẹ, ị̀rị̀na-nwẹngịapụ ma na pịkịna fịrịnwẹngị ị̀ pịrị apụma sọnị pịkị ọkọmịẹsam. Mịọkụ, wa ḅi seni ini seni wa gbẹịnḅịaye mamgba, wa wẹrịso.

¹¹Ini ọ́mịna ḅara ọlọ sa mamgba ọ́ ḅarasin; anị ḅọrọ—igbiki-o anịkanịka ịpịamgba-o, anịkanịka iru-o, anịkanịka oliv pulo sọnị. Se ọ́ pịkị inia ozuma na, iru-mịẹ-chịnmgbọlụ-ozu ma na, oliv ikpuma na pịkịna inia warịma na wẹrịso ini pịrị mị gbọrị sịkịḅụ!”

¹²Tịḅịnị ma nwọḅẹmẹ, “Ị́ ḍuko ọkụ wa nwọ mịẹḅịa. Wa ngọma seni ini pịrịḅịa, se ḅarị inia ḅara sa ḅi-ẹkẹ.” Àrị agbamịẹapụma chịn ḅomẹ, seni à tịḅịnịma mịẹmẹ inia tọrọkọ ini yekarịfị mịọkụ ini ḅereni se ini mịẹḅịaye mị ḅụ.

¹³Anịsịkị à se ị̀ konju kaka nangwọ ḅịtẹ mị à nwọ fịma se anị gugumẹ. “Mịn ḅara mị Tamụnọ Ḅe ọ́mịna ḅie nụḅọ ḅereniye mị mịẹkaḅọ goyegoye guguḅịa ọkụ-ẹ.” À nwọḅẹmẹ, “Tamụnọ Ḅe ọ́mịna warịma na, ọ́ nyanaye goyegoye mamgba na ori ọkịso, seni gbọrịye sọnị kọnma ómine pịrị-ẹkẹ.” Anịnyọ ḅụ simeḅọ goyegoye nwọḅẹmẹ, “Anị-ọkọ-sime!” se ini Nyanaḅọ Ḅe tokonimẹ. Tịḅịnị ma ini ḅereniaye ma ini kokomẹ.

¹⁴À Juda ḅie gọvịna sọ oyimaịn kụra fịnjị mamgba, Atazakzis ḅe amanyanaḅọ sọ si kụra ọkịḅo kụra soi mama kụra fịnjị nwọla, anị ḅọrọ ị̀ya mịnapụ-o anịkanịka ị̀rị̀ sọnị, gọvịna ḅaraḅụ ị̀ lalama fịaye à fịfịkẹ.

¹⁵Tatarị gọvịna sọ ḅọrọ seni à ḅo sọḅọ goyegoye, ikuye sọ tomonima pụnụmamẹ, ene ḅene-ḅene, iru na fịaye na gose tomonima ḅara seleḅa igbiki pẹkẹrẹ-a mesi pẹkẹrẹ-a mesi ini nwọ ọkịkịmẹ. Inia fịrịnwẹngịapụma sọnị tomonima pụnụma pụnụmamẹ. Ọkụma ị̀rị̀ à kịrị ḅara se yemịẹmẹ. Anịatịḅị à Tamụnọ osimẹ.

¹⁶Ị̀ya ịnyọ mgba à nwọse onu mị nama fịrị mị ḅụ chumẹ, à pịkị ngọ ḅikẹ. Fịrịnwẹngị ị̀ pịrịḅọ goyegoye onu mị nama mị ḅụ ḅarachụamẹ.

¹⁷Wa kelema sẹma ḅie ị̀ lala apụma kịẹnka ḅụ, Juapụ na tịḅịnị na ḅụ ị̀ya dẹbụl ọgọnọ kịnị-a sọnọmasi oyi fịnjị sịkịmamgba yefịfịmẹ.

¹⁸Eneḅeneḅene gbọrị nambulo na, ananama ḅie iḅitẹịn sonio anana na, pịkị tọntọn-a ọḅọkọ na à nwọ ḅaaḅaamẹ, pịkịna oyi-a ḍin goyegoye, àrị ịwọ iḅi iru pakụma ḅoḅomẹ. Anịatịḅị tomonima pụraḅịa ikuye à nemimẹ, anịẹrẹchị gọvịnaḅọ lalama gbẹịnye ḅụ ị̀ lalamaye mị àrị ọkịkịkẹ.

¹⁹Àrị ị́ tẹkẹmẹ, Yei Tamụnọ, à nwẹngị mịnapụma pịrịsa fịrị mamgba ḅụ ị̀ lalama gbẹịnye se ḅiekoroma.