Read kirikeni Nẹhimaya 6 Bible Online

Nẹhimaya 6 - kirikeni bible

Nẹhimaya 6

¹Sanbalat ḅe na, Tobaya ḅe na, Gẹshẹm Arab ḅọ ḅe na pịkị kirikọn mine-na-tarakapụ mamgba na, naamẹ na onu mị wa namasosam, anịaḅụ pụnka ẹmbẹ pịkị ofori-ẹ, onu ḅọkọ ma sọnị ma wa chụakẹ nwọḅẹ sọnị.

²Anịḅụ Sanbalat ḅe na Gẹshẹm ḅe na oku seni ị̀ fịrịma seni nwọḅẹmẹ, na à kele mun ini na ịrịa Ono Ḅele nyọ mị ḅụ sime gbọrị ịwọ ama ḅie. Mịn anị ini seni yese-ị̀-lamaḅịa epele-ẹ.

³Oku fịrịnwẹngịapụ à nwọse ini fịrịmamẹ, se ḍuko ini pịrịmẹ na, “À yela fịrịnwẹngịaḅẹ, à pịkị ineda anịnyọ ḅoẹkẹ. Ḅo ómine-na-ịrịa kẹngẹ gose fịrị mị dachịẹma mị àrị ineda mịẹ-ẹkẹ.”

⁴Inein-a sịkị ini nwọse anị gbọrị fịrị mị seni ị̀ fịrịmamẹ, ị̀rị̀ sọnị pịkịna anị gbọrị pẹkẹrẹ ḅịpị mị seni ini pẹkẹrẹ pẹkẹrẹmẹ, oku mị ḅosịkị-ḅosịkị.

⁵Anịsịkị Sanbalat ḅe sọnọ-a sịkị karama sịkịḅụ oria fịrịnwẹngịḅọ fịrịma seni oku mị se ḅo ị̀ pịrịmẹ, mịn mị ini ye seni oḅoloka ḍiri pẹkẹrẹ-ẹ.

⁶Anị nwọḅẹmẹ: “Gẹshẹm ḅe ḍuko ị̀ pịrịmẹ na, iriaḅa mine-na-kpekima angapụma ḅie ḅọrọ aḅẹ na, ị́rị́na-Juapụ ma na ọ́ kọngọ kụrọmaḅịa ẹrẹchị mị ó gose kpoto onu mị namarịye-ẹ. Ọ̀ pịkịna nwọḅẹmẹ na ị́ tọnmẹ ị́ ḅụ seni amanyanaḅọ mịẹḅịa

⁷anịẹrẹchị ini pịkịna da ịkịankoroapụ na tọnpẹlẹsam na, Jerusalẹm ḅie ini ḍuko finjima na ị́rị́ anị Juda amanyanaḅọ ḅe-ẹ. Pikipikiye ofori-ẹ Amanyanaḅọ ḅe mịn mị gbolomaye mị ọ̀ naaḅịa, anịẹrẹchị à koromaḅomẹ na ị́rị́na-ị̀rị̀ na ḅo gboloma seni mị ḅẹrẹ mị ḍuko seni anị ḅọrọ.”

⁸À pẹkẹrẹ ḅịpị seni ọ̀ fịrịmamẹ: “Ị́ ḍukoarịye ma ḅie gbọrị karakaraye sọnị ofori-ẹ. Arịmgba ị́rị́ ngẹrị koromaḅoaye-ẹ.”

⁹Ini mịna ḅalafamaye mịẹmẹ wa fịrị mị dachịẹmaḅịa ẹrẹchị. À tẹkẹmẹ, “Ọkụma mịọkụ, Tamụnọ ị̀ mịẹ à kụrọ!”

¹⁰Nwọ pembe sịkịḅụ à mun toluma Mẹhẹtabẹl tọkụ Dilaịya ḅe yi tọkụ, Shẹmaịya ḅe ḍiki-ẹmunmẹ, anị ineda oria warị mị wẹrịsokaḅọ ḅe. Ọ̀ nwọse ị̀ ḅẹmẹ, “Ị́rị́na-ị̀rị̀ na wa gboloma mun Oputẹkẹwarị mị ḅie Osi Nyana nyọ mị ḅieḅụ ḅọịḅịa se ḅọkọ ma ịkasịḅịa, anịatịḅị iniḅo ị́ ḅaa-ẹ ḅoaḅẹ. Mịọkụ mị ḍin mị ḅie sakị iniḅo ị́ ḅaaḅịa.”

¹¹À nwọ pẹkẹrẹmẹ, “Ị̀rị̀ mangị mun ḅọịḅọị-apụ ma kịkẹḅọkẹ. Ị́ koroma ḅara àrị ineda ị̀ya ḍumo mị ḍụaḅe mun Oputẹkẹwarị ḅie ḅọị mị ḅụ? À mịẹ ẹkẹ.”

¹²À ḅo anị koroma sịkị, à ḍọkịḅo ọrịmẹ na, Tamụnọ Ḅe ọkwẹịn Shimẹaị ḅe pịrịkẹ, ọkụma Tobaya ḅe na Sanbalat ḅe na ọḅụfị igbiki seni ọ̀ pịrịmẹ na ọ̀ ma ḅerijine-ọkwẹịn ma kọn ị̀ pịrị-ẹ.

¹³Ini ori ọkọmẹ, ori ị̀ ḅalafama seni à mun si ḅiesọḅịa ọkụ, mịẹse à nyana iḅi ẹrẹ mị si seni à ḅo tomoni-a tọrụkuḅu ḅarị yesọkaḅọ sọḅịa ọkụ.

¹⁴À tẹkẹmẹ, “Tamụnọ, Tobaya ḅe na Sanbalat ḅe na mịẹye mị se ḅiekoroma seni fomuḅara se ini pịrị. Árị eremeni ịkịankoroḅọ Noadaya ma na, pịkịna ị̀ ḅalafama ísí ịkịankoroapụ mamgba na se ḅiekoroma.”

¹⁵Ḍin-a mesi oyi fịnjị na mama ḍin wa nwọse bebe onu mị fịrị mị nwẹngị famamẹ. Elul akalụ mị ḅie sisọnọ-a ḍin fịnjị ene mị ḅụ anị fịrị mị kụnụnụye-ẹ.

¹⁶Mine-na-taraka seni wa kelema sẹma mịn mị naa sịkị, ini ḍọkịḅo ọrịmẹ na ḅụgerere inia tọrụ sọsam, ọrụḅọḅọ nemimẹ na Tamụnọ Ḅe ḅarachụa ḅụ fịrị mị nwẹngị sosam nwọḅẹ sịkị.

¹⁷Mịn sịkị mị mgba Juapụ tịḅịnịma, ini Tobaya ḅe na ḍiri-gịẹịn-gịẹịn jụmḅọ jụmḅọ sẹịnmaḅẹ.

¹⁸Juda ḅie tọn-a tomoni ọ̀ ḅụ omi-ẹ anị tarọ ma ḍawu Juḅọ, Ara tọkụ Shẹkanaịya ḅe gose. Pịkị jịnye oria tọkụ Jẹhohanan ḅe Bẹrẹkaya tọkụ Mẹshụlam ḅe oria eremeni tọkụ na simemẹ.

¹⁹Tomoni ị̀ tọrụkuḅu Tobaya ḅe mịẹ iḅiaye layelaye ḍuko ị̀ pịrịḅịa, ini pịkịna à ḍukoaye layelaye ḍuko ọ̀ pịrịḅịa. Seni ọ̀ pa pịkị sịkịmamgba ḍiri pẹkẹrẹ seni ị̀ sẹịnmaḅẹ ị̀ ḅalafaḅịa ọkụ.