Read kirikeni Ẹsta 1 Bible Online

Ẹsta 1 - kirikeni bible

Ẹsta 1

¹Susa Pesia sẹ mị ḅụ tịḅịnị opuama mị, pịkị Amanyanaḅọ Zakzis ḅe oria amanyanaḅọ ngada mị sime nyọ mị ḅụ, mị Amanyanaḅọ Zakzis ḅe ḅẹrẹtọn se tẹrẹfa sonioasi oyi fịnjị sẹma pịrịye-ẹ. Sẹ ma, àrị India ḅụ ọkịmun Sudan mị lamẹ.

³Ori ama nyana tẹrẹ karama kụra mị ḅie, mị ori alalị fịaye chụọ oria fịrịnwẹngịapụma na, sẹ mị ḅie pẹkẹrẹ kịrịkịrị ḅụ ḅẹrẹtọn apụma na nwọ pịrịye-ẹ. Pesia na Midia na ḅe owunima na, gọvịnapụ ma na, pịkị sẹma ḅie ḅịpịḅẹrẹlapụ mamgba, ini simemẹ.

⁴Bebe sonio-a akalụ na gbasịye, ọ̀ nwọse amanyanaḅọ warị mị ḅe opu na anịa pẹrẹ mị la ḅara na nwọ ḍiepakụmamẹ.

⁵Anị ḅọrọ sịkị, Amanyanaḅọ ḅe ori alalị fịaye chụọ sara Susa tịḅịnị opuama mị ḅie owuapụ mamgba nwọ pịrịmẹ, alapụ na, igwein apụ na. Anị ọkịmun sọnọma ḍin mgba nwọ lamẹ, amanyanaḅọ ḅe odo mị ḅie mị anị kiri ọkịye-ẹ.

⁶Bulu ḅịtẹ na, abalala ḅịtẹ na, ini nwọse ḅọkọ ma na pẹlẹḅọkọ ma na kikima ḅịtẹ mịẹse amanyanaḅọ ḅe warị mị ḅirimamẹ; iḅi awụwụ lọkọ ḅịtẹ ini nwọse mun mabụl ḍụparị ini nwọse tẹmẹ ogbo chịn ọkụ simeye ma ḅụ sime ini seleḅa seni tẹmẹ ijikila na kịkịnaye ma ḅụ kpọmẹ. Ini goli na seleḅa na se mịẹ ngada ini nwọse odo mị ḅie koromamẹ. Anga anga ḅụ, ḅịaḅịa mabụl na, pulo-pulo fẹldspa na, jaịnma ḅịarị pal na, pịkị bulu tọkwọịs na, ini nwọse odo mị ḅirimamẹ.

⁷Kịrịkịrị goli ọmọngọ mị ini se igoni kọnye-ẹ; jịnye jịnye na kịkịnaye ofori-ẹ, amanyanaḅọ ḅe ọ̀ ḅara finjima iru pịrịmẹ.

⁸Ọ̀ pakụmaḅo iru ma, àrị kịẹnḅịpị nyanakẹ, ini ineda ḅu famakẹ; amanyanaḅọ ḅe ọ̀ tọn oria fịrịnwẹngịapụma pịrịsam na ọrụḅọḅọ nụḅọ ḅi ḅara nwọ ọkị.

⁹Mayema mịẹarị sịkị, amanyanaḅọ ta, Vashti ma, á warị ḅieju alalị fịaye chụọ sara eremeni ma pịrịaḅẹ.

¹⁰Amanyanaḅọ ḅe, ori alalị fịaye chụọ sara sọnọma ḍin karama ene ḅụ, ori iruḅu se ḅieḅẹlẹarị sịkị mị ḅụ, mị ori ò ḅiekoru ini po sọnọma owuapụma chịnye-ẹ. Mịn ini-ẹ: Mẹhuman ḅe na, Bizta ḅe na, Habona ḅe na, Bigta ḅe na, Abagta ḅe na, Zẹta ḅe na, pịkị Kakas ḅe na.

¹¹Ọ̀ tọn ini pịrịmẹ na Amanyanaḅọ ta, Vashti ma, árịa amanyanaḅọ ta chu mị á tịḅị sime ḅụ, árị ọ̀ dama mun; á tọrụ iḅi kọnmẹ, se anị ḅụ ori á se oria fịrịnwẹngịapụma na igoniapụma na ḍie ḍọkịmẹ.

¹²Ọkụma, fịrịnwẹngịapụma amanyanaḅọ ḅe tọnye mị ḍuko á pịrị sịkị, á mun ḍụkụkẹ. Mịn mị anị amanyanaḅọ ḅe ịganịmamẹ.

¹³Anị amanyanaḅọ ḅe mịẹmịẹye sọmẹ na, oloko na, ye sime ḅara gbolomaye ḅụ, ò nweni-a koroma gbela nemi ḍọkịḍọkịmẹ; anị ḅụ, tetema se ọ̀ pịrịpịrịapụ ma, mịẹ na gbẹịnye nemiapụ ma, ọ̀ nwọ chịn se gbelamẹ.

¹⁴Ori opuma tọrụ pịkị da se tetema ọkịkịapụ ma sọnọmapụ-ẹ. Mịn ini-ẹ: Kashena ḅe na, Shẹta ḅe na, Admata ḅe na, Tashish ḅe na, Merẹs ḅe na, Masena ḅe na, pịkị Mẹmukan ḅe na. Mịna sọnọmapụ ma, Pesia na Midia na ḅie apụ-ẹ, ini mị pịkị amanyanakiri mị ḅie geletẹịn kirima ḅụ simeye-ẹ.

¹⁵Ọ̀ nwọse mịna owuapụma ḅẹmẹ, “Ị̀rị̀, Amanyanaḅọ Zakzis ḅe, ị̀ya fịrịnwẹngịapụma se Amanyanaḅọ ta Vashti, ma fịrịma se tọnmẹ na á ḅo-ẹ, se árị ị̀ ḅịpị sịkịmẹ. Oloko mị anị che ḍuko se ḅara wẹrịma árị na mịẹḅịa ḅara?”

¹⁶Mẹmukan ḅe nwọse Amanyanaḅọ ḅe na oria fịrịnwẹngịapụma na ḅẹmẹ: “Amanyanaḅọ ta ma, amanyanaḅọ ḅe ngẹrị á nwọ wọlọkẹ, ọkụma, oria fịrịnwẹngịapụma sọnị-ẹ, anị sime ḅara, árị amanyanakiri mị ḅie sime owuapụ mamgba pịkị nwọ wọlọmẹ!

¹⁷Sẹ mị ḅie sime eremeniḅọ goyegoye sakị nụḅọ deḅọ ḍiki-alịmaḅịa, ini Amanyanaḅọ ta ma mịẹye mị na kirikiri. Ini nwọ ḅẹḅịa, ‘Amanyanaḅọ Zakzis ḅe ọ̀ tarọ Vashti ma, fịrịmamẹ, se á mun ḍụkụkẹ.’

¹⁸Pesia na Midia na amanyanaḅọ warịma ḅie, fịrịnwẹngịapụma erema ḅo mayema naaḅịa sịkị, ini bebe ene mịmgba se anịa ḅẹrẹ nwọ ḍuko se inia deapụ pịrịḅịa. Nyọ nyọ ḅụ eremeni ḅarị osi seni inia deapụ pịrị-ẹkẹ, se owuapụ ḅarị inia erema na fịa-ẹkẹ.

¹⁹Anị Amanyanaḅọ ḅe ḅụḅẹlẹḅịa ọkụma ori oloko chụa na Vashti ma á ḅarị jenejene amanyanaḅọ ḅe tọrọkọ ḅoma. Mịẹ anị Pesia na Midia na olokoma ḅie gịẹịn, mịẹso ọkụma anị ḅarị ngịsị pịkị ẹka ọkụ. Anịsịkị, árịa amanyanaḅọ ta kiri mị se jịn iḅitẹịn eremeniḅọ pịrị.

²⁰Mịn amanyanakiri mị mgba ị́ chụaḅịa oloko mị naasa ḅẹḅẹ, eremeniḅọ goyegoye sakị nụḅọ deḅọ osiḅịa, anị ḅọrọ pẹrẹḅọ-ẹ, igweinḅọ sọnị.”

²¹Mịn tetema mị anị amanyanaḅọ ḅe na oria fịrịnwẹngịapụma na ḅụ na deinmẹ; se amanyanaḅọ ḅe ò Mẹmukan ḅe ḍukoye mị nwọ mịẹmẹ.

²²Amanyanaḅọ ḅe, ori oku mị se amanyanakiri mị ḅie sime ama goyegoye, inia ọkwẹịn ḅụ na ọkwẹịn gịẹịn ḅara ḅụ na nwọ fịrịmamẹ; anịa ḅie ọ̀ nwọ ḅẹmẹ, na deḅọ goyegoye mịna warị ḅie ḅẹrẹtọn ḅọ nwọ sọ se pịkị yetọn pẹlẹ kụrọ nwọ nyana.