Read kirikeni Ẹsta 3 Bible Online

Ẹsta 3 - kirikeni bible

Ẹsta 3

¹Sịkị ḅo ḅọrọ ḅụ, Amanyanaḅọ Zakzis ḅe, Haman nwọ chịn gbọrị owuḅọ oria fịrịkiri ḅụ, ọ̀ nwọ deki gololoma ọ̀ palịḅịaḅọ kiri koromamẹ. Haman ḅe Hamẹdata ya-ẹ. Hamẹdata ḅe Egag ḅe furo ḅie ḅọ-ẹ.

²Amanyanaḅọ ḅe tọn oria fịrịnwẹngịapụ mamgba pịrịmẹ na osi seni Haman ḅe pịrị ḅara ḅụ, ini kpẹrẹkị tịḅịtu ọ̀ pịrịpịrị. Mọdẹkaya ḅe sikima, inimgba ini ọkọ mịẹmịẹmẹ.

³Amanyanaḅọ ḅe oria fịrịkiri ḅụ sime fịrịnwẹngịapụma ò gose amanyanaḅọ ḅe ḅịpị sịkịye mị nwọse ò gbelamẹ;

⁴ene sotọrụ ḅa-ene-ḅa-ene, ini pa ọ̀ ḅẹaḅẹ, ọkụma, ori inia ḅịpị pokikẹ. “Ị̀rị̀ Juḅọ-ẹ,” ò ḍuko ḅelema ini pịrịmẹ, “àrị ineda tịḅịtu Haman ḅe pịrị-ẹkẹ.” Anị ini mịn mị ḍuko Haman ḅe pịrịye-ẹ; se ini pịkị koromaḅẹ nwọfa Mọdẹkaya ḅe ḍumo kọn àrị ḅara mị ori ineda anị-ḍiki-tọrụ-sinḅịa.

⁵Anị Haman ḅe kuḅie fụrụmamẹ ò ḅo nemimẹ na Mọdẹkaya ḅe ọ̀ kpẹrẹkị pịkị tịḅịtu ọ̀ pịrịpịrịẹkẹ nwọḅẹye mị nwọ nemi sịkị.

⁶Se ò ḅo nemimẹ na Mọdẹkaya ḅe Juḅọ-ẹ nwọḅẹ sịkị ọ̀ ḅụfụka seni Mọdẹkaya ḅe kẹngẹ pịrị ḍọkịmẹ. Ọ̀ tọnmẹ, Pesia sẹ mị ḅie sime Juḅọ goyegoye ini nwọ ḅaa.

⁷Amanyanaḅọ Zakzis ḅe, amanyana oyimaịn kụra fịnjị karama kụra mị ḅie tatarị akalụ, Nisan ini nwọse chịn akalụ mị ḅie ḅụ, anị Haman ḅe ọ̀ tọnye-ẹ, (na ini “purim” nwọ chịn) ịkịan wakị; mịẹse ọ̀ tọnye mị kiri ọkịḅịa sịkị nwọ nemiḅịa ẹrẹchị. Ini tọn wẹrịmẹ na Ada akalụ mị ḅie, anị kụra mị ḅie oyimaịn akalụ fịnjị mị ḅie ḅụ, oyitẹrẹ-a ḍin fịnjị karama ene mị ḅie, anị kiri ọkịḅịa.

⁸Anị ḅụ, Haman ḅe ḍuko amanyanaḅọ ḅe pịrịmẹ, “Gbọrị sẹ ḅie apụ ị́ya amanyanakiri mị ḅie na, anịa ḅie sime sẹ goyegoye na ḅie ḅụ galagala waraḅẹ. Inia ama mịẹmịẹaye ma àrị jịn ama mịẹmịẹaye ma ḅụ kịrịmẹ. Anị tẹịn-anga, ini pịkị amanyanakiri mị anịa olokoma kokokẹ; anịgose anị iḅiye seni ị́ mịẹ ẹkẹ, ị́ nemika seni inia ḅụ ḅarasinmẹ ḅẹḅẹ.

⁹Anị amanyanaḅọ ḅe ḅụḅẹlẹḅịa ọkụma ori oloko chụa na ini ini ḅaa. Ị́ anị mịẹmẹ ḅẹḅẹ, àrị ineda mịẹse seleḅa okpokpo poku-a mesi na poku fịnjị na okpokpo oyi ẹndẹ nwọse amanyanaḅọ igbiki koko warị mị ḅie chuḅịa se ini se sẹ mị ḅie fịrịnwẹngịḅịa.”

¹⁰Amanyanaḅọ ḅe ori oria iringi mị sin se Haman, Hamẹdata ya, Egag ḅe furo ḅie ḅọ, pịkị Juapụma na tarakaḅọ ḅe pịrịmẹ. Ini oloko chụa so ọkụma, mịn iringi mị ini nwọse elekima ḅara ḅụ yemịẹkụrọma-kụrọmamẹ.

¹¹Amanyanaḅọ ḅe nwọse ọ̀ ḅẹmẹ, “Tomonima na, inia igbiki ma na, ị́yaye-ẹ; ị́ ḅụḅẹlẹ ḅara nwọse ini na mịẹ.”

¹²Anịgose, tatarị akalụ mị ḅie oyitẹrẹ-a ḍin fịnjị karama ene ḅụ mị Haman ḅe ori amanyanaḅọ ḅe oria ḍiri gịẹịn apụma fịrịma se ini gịẹịnḅịa oloko nwọ go ini pịrịye-ẹ. Mịn oloko mị ini anị seni amanyanakiri mị ḅie sime ama ọkwẹịn goyegoye pịkị inia ọkwẹịn gịẹịn ḅara goyegoye ḅụ gịẹịnmẹ se anị seni ḅẹrẹtọn apụ na, gọvịnapụ na, pịkị fịrịnwẹngịapụ goyegoye mamgba nwọ sẹịnmamẹ. Amanyanaḅọ Zakzis ẹrẹ ḅụ mị ini anị gịẹịn se pịkị oria iringi mị seni àrị ḅakụye-ẹ.

¹³Okunwẹngịapụ ma ini anị seni amanyanakiri mị ḅie sẹ goyegoye nwọ mun mẹ. Oku mị nwọ ḅẹmẹ na, gbọrị ene ḅụ Ada akalụ mị ḅie oyitẹrẹ-a ḍin fịnjị karama ene ḅụ, Juapụ mamgba—iremeni na asẹmẹnị na, pịkị olomuapụ na awọmẹnị na—ini nwọ ḅaaḅịa. Ḍikitịḅịfoin sọnị oforika ḅara ḅụ, ini ini ḅaaḅịa, se ini inia ngọma ọkịḅịa.

¹⁴Oku mị sime ḅara mị ini nwọse sẹ goyegoye ḅie ekere gboloḅịa, mịẹso ọkụma ọrụḅọḅọ anị ene ḅụ ḅụkarakarama anị wẹrịmaḅịa ọkụ.

¹⁵Amanyanaḅọ ḅe kụrọ ḅụ, ini oloko mị seni Susa, tịḅịnị opuama mị ḅie ekere gbolomẹ; anịsịkị okunwẹngịapụ ma pakaye mị seni sẹ goyegoye nwọ mun mẹ. Amanyanaḅọ ḅe na Haman ḅe na ini kpọnjị sime iru ḅuarị sịkị ḅụ, anịsịkị Susa opuama mị anị ḅụḅalaḅala ḅụ sọ waraḅẹ.