Read kirikeni Ẹsta 4 Bible Online

Ẹsta 4 - kirikeni bible

Ẹsta 4

¹Mọdẹkaya ḅe, ò ḅo pakaye mamgba nwọ nemi sịkị, kuḅiesi ḅụ, ori oria ḅụchụayema kanmẹ. Se ò kurukuru ḅụchụaye nwọ chụa, se fọn se ọ̀ tịḅị sara, se ḅụakụ ḅụ, gelele pụkọ se owu opuama mị kelemamẹ,

²se ò ḅo amanyanaḅọ warị onu mị ḅọkọ nwọ lamẹ. Ọ̀ sọ munkẹ, anịatịḅị kurukuru ḅụchụaye chụaḅọ anịa ḅie sọsọkẹ.

³Amanyanaḅọ ḅe chụa olokoma mun la sẹ mamgba ḅụ opu kururu Juapụma ḅie ḅeinmẹ. Ini ḅuru se ḅụḅamamẹ, se pịkị owumẹ, pịkị inia ḅụ opu pẹkẹrẹ kurukuru ḅụchụaye chụa se fọn ḅie taḅo simemẹ.

⁴Ẹsta ma árịa eremeni fịrịnwẹngị awọma na ini poapụ ma na, ini Mọdẹkaya ḅe mịẹarịye ma nwọ ḍuko á pịrị sịkị anị iḅiọkụma á ḅụḅalaḅalamamẹ. Ò se kurukuru ḅụchụayema ḍinmaḅịa ẹrẹchị, á ḅụchụaye se Mọdẹkaya ḅe sẹịnmamẹ ọkụma ori àrị sịkịmẹ.

⁵Anị ḅụ, Hatak, amanyanaḅọ warị mị koruarị ini poapụ ma ḅie gbọrịḅọ pịkị amanyanaḅọ ḅe tọn á pịrị fịrịnwẹngịḅọ ḅe, Ẹsta ma nwọ chịn se ò se Mọdẹkaya ḅe fịrịmamẹ: ori ò gbela na cheye pakasa-otuḅo, pịkị cheye gose ọ̀ nwọ mịẹ-ao?

⁶Hatak ḅe, ori opuama mị ḅie amaogbo mị mun mẹ, se amanyanaḅọ warị mị onu ma anga sịkị ḅụ, Mọdẹkaya ḅe nwọ ọrịmẹ.

⁷Mọdẹkaya ḅe, ori ọ̀ ḅụ pakaye mamgba na, pịkị Haman ḅe ḅara wẹrịma tọn-a igbiki nwọ gbẹịn seni amanyanaḅọ ḅe oria igbiki akpa ḅie chuḅịa ọkụ nwọ ḅereni ḅara, nemika se Juapụ mamgba ini nwọ ḅaamẹ ḅẹḅẹ, ọ̀ nwọ ḍuko seni Hatak ḅe pịrịmẹ.

⁸Ini Susa ḅie chụasa olokoma ḍiri pambama ḅẹaḅẹ na, ini Juapụ ḅaa-ẹ nwọ ḅẹye mị, ọ̀ nwọse Hatak ḅe pịrịmẹ. Mọdẹkaya ḅe, ọ̀ fịrịmamẹ na ori anị seni mun Ẹsta ma pịrị, se pịkị á ḅe na á mun amanyanaḅọ ḅe na ịrịama se ọ̀ tẹkẹ na, ò ḍikitịḅịfoin nwọ nyana árịa tomonima pịrị.

⁹Hatak ḅe mịn mị mịẹmẹ,

¹⁰se Ẹsta ma, mị oku mị se Mọdẹkaya ḅe fịrịmamẹ.

¹¹“Amanyanaḅọ ḅe nụḅọ fịrịmaọkịka ḅara ḅụ, tomoniḅọ, owuḅọ, anịkanịka eremeniḅọ, nemikase amanyanaḅọ ḅe warị ịnyọsara nyọ mị ḅie sọ mun amanyanaḅọ ḅe ọrịmẹ nwọ ḅẹḅẹ, anịḅọ mị, nụḅọ fịḅịa. Anị oloko mị-ẹ; nwenimgba lekirimẹ, amanyanaḅọ tetema-tetemapụ ma ḅụ ọkịmun sẹma ḅie ḅụ sime-a tomonima na lamẹ. Mịn oloko mị ḅụ gbọrị ẹmbẹ kẹngẹ mị simeye-ẹ: nemikase amanyanaḅọ ḅe oria goli goli amanyanaḅọ amgbara mị seni tomoniḅọ damẹ nwọ ḅẹḅẹ, anịḅọ mị ḍumo mị faẹkẹ. Ọkụma anị gbọrị akalụ lasam amanyanaḅọ ḅe ị̀ chịn kuluma ḅo nwọ la.”

¹²Mọdẹkaya ḅe, ori Ẹsta ma oku mị na sịkị,

¹³ọ̀ mịn ḅeri nụnụ oku mị seni á fịrịmamẹ: “Koromama na, ị́ amanyanaḅọ warị ḅie simeye gose Juapụma laḅịaye mị ị́ laka-ẹ.

¹⁴Ị́ nwọ pembe sịkị ḅụ gboinma simemẹ ḅẹḅẹ, soḅie ḅarachụa koroḅo Juapụma laḅịa se ini ḍụaḅọrọma nyanaḅịa, ọkụma ị́rị́ ị́ fịḅịa, pịkị ị́ ḍaḅe furo mị anị ḅo kulumaḅịa. Anị sọnị, tụḅọ nemi—sosi mị sịkị, mị ye gose anị ini ị́ se amanyanaḅọ ta nwọ mịẹye-ẹ!”

¹⁵Ẹsta ma mịn pẹkẹrẹ ḅịpị mị seni Mọdẹkaya ḅe fịrịmamẹ:

¹⁶“Mun Susa mị ḅie sime Juapụ mamgba chịn kpokponima; ó ḅuruseḅụḅaama, se tẹkẹ ị̀ pịrị tẹrẹ-a ḍin ḅụ, ḍin na enekaka na ḅụ, ó ye fịma, ọ́ pịkị ye ḅuma. Ị̀ya fịrịnwẹngị eremeni awọma na ị̀rị̀ na, wa anị gbọrị ḅara mị mịẹḅịa. Anị ḅọrọ so sịkị, anị ḅọrọ oloko mị na tụḅụrụmẹ nwọḅẹ sọnị, à sọ amanyanaḅọ ḅe damamunḅịa. À mịn mị mịẹmẹ gose à fịḅịa nwọ ḅẹḅẹ, ye à fị.”

¹⁷Anị Mọdẹkaya ḅe ọ̀ nyọ mị wẹrị so se mun Ẹsta ma ḍuko ọ̀ pịrịye mamgba nwọ mịẹye-ẹ.