Read kirikeni Ẹsta 7 Bible Online

Ẹsta 7 - kirikeni bible

Ẹsta 7

¹Anị amanyanaḅọ ḅe na Haman ḅe na somun Ẹsta ma na yefịye-ẹ.

²Maịn karama sịkị ḅụ, ini iru ḅuarị ogbo, mị amanyanaḅọ ḅe pịkị Ẹsta ma gbelaye-ẹ, “Amanyanaḅọ ta Ẹsta, mịọkụ ị́ ḅiye mị ḍuko ị̀ pịrị, se ị́ pịkị anị nyanaḅịa. Amanyanakiri mị seni mama kiri ḍie sọnị, à se ị́ pịrịḅịa.”

³Amanyanaḅọ ta Ẹsta ma nwọ pẹkẹrẹmẹ, “Anị nemikase Amanyanaḅọ ḅe ḅụḅẹlẹḅịa ọkụma, à ḅụsekiripịrị ḅi ḅịaye mị ị́ nwọse ị̀ pịrịḅịa; à ḅimẹ ị̀rị̀, à ḍumo, ị̀ya tomonima sọnị pịkị ḍumo.

⁴Ị̀rị̀ na ị̀ya tomonima na ini wa dẹrịsam wa ḅaasinḅịa ẹrẹchị. Anị nemikase papa nweni seni omoniḅaraḅụ dẹrị nẹngịkẹ nwọḅẹ ọkụma, mgbọkụ à gboinma simesam, se gbọrịye sọnị se ị́ ḅụfụkama ẹkẹ, ọkụma, ini wa ḅaa-ẹtọn-aḅẹ—wa famasin ḍọkịaḅẹ!”

⁵Anị Amanyanaḅọ Zakzis ḅe amanyanaḅọ ta Ẹsta ma gbelaye-ẹ, “Tụḅọ tọrụ gbẹịnma ọkọ simeye nwọ mịẹ ḍọkị-ao? Ndanga ori omi?”

⁶Ẹsta ma nwọ pẹkẹrẹmẹ, “Sitịḅịnyana Haman ḅe ori-ẹ; ori anị mine na tarakaḅọ pịkị mịna tọrụsiọrịmarịḅọ ḅe-ẹ!” Mịn mị ḅụ mị Haman ḅe, ḅalafa na, pịkị ḅụgeregere ḅụ na, inia tọrụ ḅie ḍikimẹ.

⁷Ịganị ḅụ, amanyanaḅọ ḅe ọ̀ sịsẹ so warị mị wẹrị so mun odo mị ḅie sime ozuma nyọ simemẹ. Haman ḅe, ori ọrịmẹ na mịn mị gose amanyanaḅọ ḅe ọ̀ tọnsam na ò fomuḅara seni ọ̀ pịrịḅịa, anịẹrẹchị, ori ọḅụda mẹ, se amanyanaḅọ ta Ẹsta ma ḅara ḍikiḅụgerere ḅiaḅẹ, oria ḍumo gose.

⁸Ori ọ̀ ḅụ seni Ẹsta ma árịa ngada mị ḅụ gbin ananga, á ḅara ḍikitịḅịfoin ḅi gose, mị amanyanaḅọ ḅe ori odo mị ḅie oria ozuma wẹrị so se warị mị sọmẹ. Mịn mị ọrị ḅụ, amanyanaḅọ ḅe ori olokumẹ, “Ị̀ tọrụkuḅu ḅụ, ị̀ya amanyanaḅọ warị mị ḅie ḅụ, ḅe tomoniḅọ ḅe ò mun amanyanaḅọ ta ma furu-ẹmu-ao?” Amanyanaḅọ ḅe mịn mị ḅẹ so ananga, ini po apụma ḅo nweni ḅaa ḅịtẹ mị seni Haman ḅe tọrụ gbẹịnmẹ.

⁹Anị inia ḅụ gbọrịḅọ Habona, ini nwọse chịnḅọ ḅe nwọḅẹye-ẹ, “Haman ḅe, ò mun nweniḅaaye ḅakụ chịẹmasam, mịẹse ini Mọdẹkaya ḅe, ori Amanyanaḅọ ḅe ḍumo ḍụaḅọ ḅe ḅaaḅịa ẹrẹchị. Anịa chịẹ mị anị ḅụọ-a sọnọfa iniasi fịnjị nwọ lamẹ!” “Haman ḅe, ọ́ nwọse anịa ọgọnọ kpọ ḅaa!” amanyanaḅọ ḅe ọ̀ nwọse ḅẹrẹtọnmẹ.

¹⁰Anị ḅụ, Haman ḅe ọ̀ ḅakụ se Mọdẹkaya ḅe kpọ ḅaa ḅi nweniḅaaye mị ọgọnọ anị ini ọ̀ kpọḅaaye-ẹ. Anị ḅọrọ ḅụ, amanyanaḅọ ḅe ò kuḅie deinmẹ.