Read kirikeni Ẹsta 8 Bible Online

Ẹsta 8 - kirikeni bible

Ẹsta 8

¹Anị gbọrị ene mị ḅụ, Amanyanaḅọ Zakzis ḅe ò Haman, Juapụma na tarakaḅọ ḅe nyana ngọ mamgba nwọse amanyanaḅọ ta Ẹsta ma pịrịmẹ. Ẹsta ma à ḍuko amanyanaḅọ ḅe pịrịmẹ na Mọdẹkaya ḅe numbireowu-ẹ, anịgose, anịsịkị ọkị tọrọkọ mun ini ḅereni Mọdẹkaya ḅe pịrịmẹ ọ̀ sakị amanyanaḅọ warị ḅie sọsọmẹ.

²Amanyanaḅọ ḅe ori oria ẹrẹ sime iringi mị, anị Haman ḅe ḅara ori ọkịye mị se Mọdẹkaya ḅe pịrịmẹ. Anịsịkị Ẹsta ma Mọdẹkaya ḅe se Haman ḅe warị tịḅịdamẹ.

³Ẹsta ma á pịkị ọkwẹịn amanyanaḅọ ḅe pịrịmẹ, árị ọ̀ tọrọkọ ḅịkịkoro se owumẹ. Árị ọ̀ tẹkẹmẹ na ọ̀ mịẹ se Haman, Egagḅọ ḅe ḅụ pakaḅoḅọ ḅe tọn Juapụma wẹrịma fị mị ḅo papaye sọ.

⁴Amanyanaḅọ ḅe ori oria goli-goli amanyanaḅọ amgbara mị seni á da se á sịsẹ chịẹ se nwọ ḅẹmẹ,

⁵“Anị nemikase amanyanaḅọ ḅe ḅụḅẹlẹḅịa ọkụma, ị́ pịkị ị̀ ḅẹlẹmamẹ ḅẹḅẹ, se anị pịkị ị́ ḅụ karakaraye sọmẹ ḅẹḅẹ, pasisi, Haman ḅe chụa olokoma dachịẹmaḅịa oloko nwọ chụa—anị Hamẹdata ya, pịkị Egag ḅe furo ḅie ḅọ ḅe chụa na ini amanyanakiri mị ḅie sime Juapụ mamgba nwọ ḅaa fama-ẹ nwọ ḅẹ oloko mị.

⁶Nde à mịn mị inemaḅịa ọkụ, nemikase mị opu fa mị ị̀ya tomonima la, pịkị ị̀ya mịnapụma ini nwọ ḅaa fama ọkụma?”

⁷Anị Amanyanaḅọ Zakzis ḅe nwọse amanyanaḅọ ta Ẹsta ma na Mọdẹkaya, Juḅọ ḅe na ḅẹye-ẹ; “Ḍiki Haman ḅe àrị ọ̀ kpọ ḅaasam, ọ̀ tọn se Juapụma wẹrịma fị mị gose, à pịkị oria ngọma seni Ẹsta ma pịrịsam.

⁸Ọkụma ini nwọ amanyanaḅọ ḅe ẹrẹ ḅụ gịẹịn, pịkị oria iringi mị seni ḅakụsa olokoma àrị ineda ḍinmaẹkẹ. Anịẹḅẹ sọnị, ị́ ineda ḍiri seni Juapụma fịrịmaḅịa, ị́rị́ ḅiye goyegoye ḅụ, pịkị ị́ ineda ị̀ya ẹrẹ ḅụ anị gịẹịn se amanyanaḅọ iringi mị seni anịa ḅụ ḅakụḅịa.”

⁹Mịn mị paka sịkị anị Sivan, tẹrẹ karama akalụ mị ḅie, sitẹrẹ-a ḍin fịnjị ene mị ḅụ-ẹ. Mọdẹkaya ḅe, ori amanyanaḅọ ḅe oria ḍiri gịẹịn apụma chịn se ini gịẹịn amanyanakiri mị ḅie sime tẹrẹfa sonioasi oyi fịnjị sẹma ḅie sime Juapụma na gọvịnapụ ma na, pẹkẹrẹ kịrị kịrị ḅụ ḅẹrẹtọn apụ na, fịrịnwẹngịapụ goyegoye na, India sẹ ḅie ḅụ ọkịmun Sudan sẹ mị la, fịrịfịrịma ḍiri mị nwọ ḍuko ini pịrịmẹ. Sẹ goyegoye anịa ọkwẹịn ḅịpị ḅụ na, iniaye gịẹịn ḅara ḅụ na, mị ini fịrịfịrịma ḍiri mị gịẹịn wasamaye-ẹ. Juapụma sọnị, ini anị gbọrị ḅara ḅụ ḍiri seni ini fịrịmamẹ.

¹⁰Mọdẹkaya ḅe, ọ̀ mịẹ seni ini amanyanaḅọ Zakzis ḅe ẹrẹ ḅụ ma fịrịfịrịma ḍiri ma gịẹịnmẹ, se amanyanaḅọ iringi mị seni arịa ḅụ ḅakụmẹ. Amanyanaḅọ ḅe nyana, ḅụọ sarasarama mangị ḍin asụnma, anị okunwẹngịapụ ma ọkị se mun fịrịfịrịma ḍiri ma ḍiemaye-ẹ.

¹¹Mà fịrịfịrịma ḍiri ma ḍuko ḅelemamẹ na amanyanaḅọ ḅe, ò ḅereni opuama goyegoye ḅie Juapụma pịrịḅịa ini inia ḅụ ma kolokolo gboloma mịẹse ini ineda owusọ inia ḅụ ma ḍụaḅịa ḅara. Nemikase amanyanakiri mị ḅie owuniaye ḅara sime gbọrị sẹ owu seni ini na inia ere na, pịkị inia awọ na nwọ paka ḍọkịmẹ ḅẹḅẹ, ini Juapụma sọ ini gagama ḅo owuse ini paka-ẹḅo apụma na owusọ, ini ineda ini mgba ḅaafamaḅịa, se pịkị inia ngọma nyana ọkịḅịa.

¹²Pesia amanyanakiri mị ḅie anị mà olokoma mun oloko ḅụ sọye-ẹ. Anị kiri ọkịḅịa sịkị, anị ini Juapụma ḅaaḅịa nwọḅẹ ene mị-ẹ—anị Ada akalụ, oyimaịn akalụ fịnjị mị ḅie, oyitẹrẹ-a ḍin fịnjị ene mị ḅụ.

¹³Oloko ḅara ḅụ, ini amanyanakiri mị ḅie anị ḍuko pakụmaḅịa, mịẹse anị ene mị ḅo lasa ḅẹḅẹ, Juapụma ini ineda ḅụkarakarama se ini na tarakapụma ḅụ sowu ḅiḅịa ọkụ.

¹⁴Amanyanaḅọ ḅe ḅẹrẹtọn ḅara ḅụ, okunwẹngịapụ ma, ini amanyanaḅọ asụnma ḅụkụlọ se àrị mịẹse àrị iḅiọkụma mangịmẹ. Susa, tịḅị nyana opuama mị ḅie sọnị, ini ekere gbolo oloko chụa mịn mị pịrịmẹ.

¹⁵Bulu bulu ḅịtẹ na abalala amanyanaḅọ ḅiriaye na, pịkị ḍikitọrụgbẹịn pulo-pulo lọkọ ḅịtẹ na ini nwọse mịẹ ọgọnọ gbana ḅụchụaye na, pịkị iḅi goli goli amanyanaḅọchu na, nwọ ḅiri ḅụ, Mọdẹkaya ḅe, ori amanyanaḅọ warị mị wẹrị somẹ. Se ḅieḅẹlẹ oloku na, ḍoroku na, Susa ama mị ḅie opu ateli ma ḅie ḅeinmẹ.

¹⁶Ḍoroku na, tẹmẹ-dein na, ḅieḅẹlẹ ḅụ na, pịkị ọmụḅaraiḅi koroma na, sime Juapụma pịrịmẹ.

¹⁷Ini amanyanaḅọ ḅe olokoma go opuamama na, sẹ layelayema na, ḅie sime Juapụma, ini ḍoroku pịkị ịnyọsara nyanamẹ, ini pịkị alalị fịaye chụọ saramẹ se ḅieḅẹlẹmẹ. Anị ḅo sime ḅara, tọn apụ ḅo Juapụ nwọ sọmẹ, anịatịḅị mịọkụ ini ini ḍikiḅalafamẹ.