Read kirikeni Pakaso 12 Bible Online

Pakaso 12 - kirikeni bible

Pakaso 12

¹Nyanaḅọ Ḅe Ijipt mị ḅie ori ọkwẹịn Moziz ḅe na Erọn ḅe na pịrị se nwọ ḅẹmẹ:

²“Mịn akalụ mị anị kụra ḅụ tatarị akalụ nwọ sọ ọ́ pịrịḅịa.

³Ḍuko bebe Izrẹl sẹ mị pịrị na: Mị akalụ oyi-a ḍin ene ḅụ, owuḅọ goyegoye gbọrị anana tọkụ anịkanịka gbọrị oḅori tọkụ nwọ ọkịḅịa oria warị kpo mị tịḅị gose.

⁴Nemikase ò furo mị opuma bokẹ, se ini ineda bebe nama ḅe pẹị so ẹkẹ nwọ ḅẹḅẹ, ò mun ori na kpekima angaḅọ ḅe na gboloma, se gbọrị nama nwọ ḍia, tomonima kịẹnḅịpị laḅara ḅụ, mịẹse ọrụ ḅọḅọ nụḅọ inedaḅịa ọkụ nwọ pẹịḅịa ḅara.

⁵Ómine ineda anana anịkanịka oḅori sẹlẹ ọkịḅịa, ọkụma gbọrị kụra lasa ikelika owoi-ẹ.

⁶Anịsịkị oyi inein-a ḍin fịnjị karama ene mị ḅie, akalụ mị ḅie, saso ḅiri ḅụ, bebe Izrẹl sẹ mị mgba namama ḅaaḅịa.

⁷Ini nama pulo mị seni ini sime namama pẹịḅịa warịma ḅụ mama warị ḅọkọ-a chịnma ọmbịḅịa, pịkị ḅọkọ ma ọgọnọ ma na.

⁸Anị ḍin ḅie ini namama fọịḅịa, se pụlama ịnyanya na suka fịturu na se anị ḅalịḅịa.

⁹Anịaḅụ ḅịakaye anịkanịka chụọye sọnị ọ́ pẹịma, ọkụma anịmgba ọ́ fọị pẹị tịḅị ḅụ ọkịmun ḅụọma na ḅụlọ-ḅie-aye ma na la.

¹⁰Ómine anị kọnma eneḅa dede lamama; nemikase kọnye omi-ẹ ḅẹḅẹ, ọ́ dọkịma.

¹¹Be ḅụ mị ómine anị fịḅịaye-ẹ; anịatịḅị ó yeḅiri so jịn anga munḅịa, ọ́mịna ḍiki akpaka ma ọ́ nwọ chụa ọ́ pịkị ọ́mịna ḅara ḅụ amgbara ọlọ. Mị anị ó se osi seni Ị̀rị̀ Nyanaḅọ Ḅe pịrịḅịa Saḅaḅọrọ Alalị mị-ẹ.

¹²“Anị ḍin mị ḅie àrị Ijipt ama mị ḅie ḅọrọ se tatarị yi owutọkụ goyegoye nwọ ḅaaḅịa, tomoniḅọ ḅụ ọkịmun nama la, à pịkị fomuḅara seni Ijipt oru mamgba nwọ pịrịḅịa, Ị̀rị̀ anị Nyanaḅọ Ḅe-ẹ.

¹³Warịḅọkọ chịnma ḅụ sime nama-pulo mị, anị ómine anga warịma ḅụ elekima sọḅịa. À nama-pulo mị ọrịsa ḅẹḅẹ, à saḅaḅọrọḅịa, à pịkị ye se ọ́ lama-ẹkẹ à fomuḅara seni Ijipt apụma pịrịḅịa sịkị ḅụ.

¹⁴Mịmgba ene mị, ómine anị seni Tamụnọ Alalị mịẹ fịfịḅịa, se Ị̀rị̀ Nyanaḅọ Ḅe mịẹye mị se ó ḅiekoromaḅịa ọkụ. Mịn alalị mị ómine anị fị gbaso, ḅụọ ọkịmun ḅụọ la.”

¹⁵Nyanaḅọ Ḅe nwọ ḅẹmẹ, “Sọnọma ḍin ḅụ ini fịturu sumaye mị se mịẹ fịturu ngịsị ọ́ fịẹkẹ—suka fịturu kẹngẹ ọ́ nwọ fị. Tatarị ene mị ḅie ọ́mịna warịma ḅie sime fịturu sumaye mamgba ọ́ tan pakụma fama, anịatịḅị nemikase àrị enema ḅie fịturu sumaye seni mịẹ fịturu fịḅọ omi-ẹ ḅẹḅẹ, à ḅarị nụḅọ seni ị̀ya tomonima ḅie ḅọ kịẹnma ẹkẹ.

¹⁶Tatarị ene mị na pịkị sọnọma ḍin karama ene mị na ó ḅo gboloma tẹkẹ nwọ kọnḅịa. Àrị enema ḅie gbọrị fịrị sọnị ọ́ nwẹngị ẹkẹ, ọkụma ómine ineda fịye chụọḅịa.

¹⁷Mị alalị mị, ómine anị koko, anịatịḅị mịmgba ene mị ḅie mị àrị ọ́mịna furoma ọkị pakụmaḅoye-ẹ Ijipt mị ḅie. Mịn ene mị, ómine anị seni alalị fị ene nwọ mịẹ gbasoḅịa ḅụọ ọkịmun ḅụọ la.

¹⁸Tatarị akalụ mị ḅie oyi-inein-a ḍin fịnjị karama ene mị ḅe saso ḅiri ḅụ ọkịmun sigbọrị ḍin fịnjị karama ene mị ḅe saso ḅiri mị la, ngịsị ini fịturu sumaye seni mịẹ fịturu ọ́ fịẹkẹ.

¹⁹Fịturu sumaye ọ́mịna warịma ḅie ngịsị sime ẹkẹ mun sọnọma ḍin nwọ laḅịa, anịatịḅị nemikase fịturu sumaye seni mịẹ fịturu nwọ fịḅọ-fịḅọ, à ḅarị nụḅọ seni ị̀ya tomonima ḅieḅọ kịẹnma ẹkẹ, anị ḅọrọ furo tọkụ anịkanịka igoniḅọ sọnị.”

²⁰

²¹Moziz ḅe ori Izrẹl mị ḅie tịḅịdapụ ma chịn koḅiri se nwọse ini ḅẹmẹ, “Ọ́mịna ḅụ ọrụ ḅọḅọ gbọrị anana tọkụ anịkanịka oḅori tọkụ nwọ sẹlẹọkị se ḅaa, mịẹse ọ́mịna furoma Saḅaḅọrọ Alalị mị nwọ fịḅịa ọkụ.

²²Ịnyanya ḅara ọ́ nwọ ọkị se nama pulo mị sime bọlị mị ḅie su, se anị seni ọ́mịna warịḅọkọ mama chịnma na pịkị ḅọkọ ọgọnọ mgbẹsẹ chịn mị na ọgọnọ ḅụ sana. Ọ́mịna ḅụ gbọrịḅọ sọnị warị ḅie pakama, ọkịḅo eneḅa dede mị la.

²³Nyanaḅọ Ḅe ori Ijipt mị ḅie ḅọrọ seni Ijipt apụma ḅaaḅịa sịkị, ó se warịḅọkọ chịnma na ọgọnọ chịn mị na tan pulo mị ọ̀ nwọ ọrịḅịa sịkị ò ḅereni ẹkẹ Fị kụrọ mị nyana Enjẹlḅọ ḅe ọ̀ sọḅo ọ́ ḅaa.

²⁴Ómine na ọ́mịna awọma na; ma olokoma ó koko gbaso.

²⁵Ó mun Nyanaḅọ Ḅe ḅereni ọ́ pịrị ama mị ḅie sọsa ḅẹḅẹ, ọ́ mịn mịẹmịẹye mị nwọ mịẹḅịa.

²⁶Ọ́mịna awọma ini ó gbela na, ‘Mịn mịẹmịẹye mị anị chefie nọ nwọ ḅẹḅẹ?’

²⁷mị ó seni ini pẹkẹrẹḅịa ọkụ-ẹ, ‘Saḅaḅọrọ Alalị agba-ẹ, se osi seni Nyanaḅọ Ḅe pịrịḅịa ẹrẹchị-ẹ, anịatịḅị Ijipt ama mị ḅie ori Izrẹlapụma warịma saḅaḅọrọmẹ. Ori Ijipt apụma ḅaa se wa wẹrịsomẹ.’” Izrẹlapụma kpẹrẹkị koro se tẹkẹ mẹ.

²⁸Anị ini so mun Nyanaḅọ Ḅe tọn Moziz ḅe na Erọn ḅe na pịrị ọkụ nwọ mịẹye-ẹ.

²⁹Ḍin ogbo ḅụ Nyanaḅọ Ḅe ini tatarị yi owuapụ awọ mamgba ọ̀ ḅaafamamẹ Ijipt mị ḅie, amanyanaḅọ tatarị owutọkụ, ngada mị ọgọnọ simeḅịaḅọ ḅe ḅụ sakị iderima mun ikoli warị ḅie simeḅọ ḅe tatarị owutọkụ ḅe sọnị nwọ lamẹ; namama tatarị yi aye mamgba sọnị ọ̀ ḅaamẹ.

³⁰Anị ḍin mị ḅie amanyanaḅọ ḅe na, oria fịrịtịḅịdapụ ma na, pịkị bebe Ijipt apụ mamgba boma sịsẹ mẹ. Se oloku owu tịḅịḅie fiemẹ Ijipt mị ḅie mgba, anịatịḅị iniaḅie owutọkụ fịka warị ngịsị ofori-ẹ.

³¹Anị ḍin mị ḅie amanyanaḅọ ḅe, ọ̀ ḅịpị seni Moziz ḅe na Erọn ḅe na fịrịma se nwọse ini ḅẹmẹ, “Ọ́ pakaso, ómine na Izrẹlapụma na! Ị̀ya sẹ mị ḅie ó so; ó somun Nyanaḅọ Ḅe tẹkẹ, anị ó ḅi ḅaraḅụ.

³²Ọ́mịna ananama na oḅorima na pịkị nambuloma na ómine àrị ọkị se chụaso. Ọ́ pịkị tẹkẹ ḅụ ḅẹlẹma ḅi ị̀ pịrị.”

³³Ijipt apụma ini ḅiaḅẹ tomonima juaḅụ sẹ mị koromaso-ẹ; ini nwọ ḅẹmẹ, “Mine mgba wa fị famaḅịa, ó nemikase sokẹ ḅẹḅẹ.”

³⁴Anị tomonima ini inia suka fịturu ma tan fịturu fọị panị ma ḅie chụa ḅeinma, àrị seni ḅịtẹ ḅie fịna se àrị pụraye-ẹ, inia aba ḅụ.

³⁵Izrẹlapụma, Moziz ḅe ò se ini ḅẹ ọkụ mị ini nwọ mịẹmẹ, se ini Ijipt apụma ḅara goli na seleḅa na ḅiriaye na pịkị ḅụchụaye na nwọ ḅi ọkịmẹ.

³⁶Nyanaḅọ Ḅe ọ̀ mịẹse Ijipt apụma ini osi seni tomonima pịrịmẹ pịkị ini ḅi ayema seni ini pịrịmẹ. Mịn ḅara mị ḅụ, Izrẹlapụma ini Ijipt apụ ngọma tan se somẹ.

³⁷Izrẹlapụma Ramẹsis mị ḅie ini ḅụọ se nwẹngị pakaso Sọkọt mị mun mẹ. Owuapụma sọnọfa-poku-iniasi pembeye lamẹ, eremeni ma na awọmẹnịma na sikima ọkụma.

³⁸Tọn-a jịn apụ na, tọn-a anana na, oḅori na pịkị nambulo na ini na somẹ.

³⁹Ijipt ḅie ini ọkịḅo fịturu mịẹye mị ini nwọse suka fịturu nwọ fọịmẹ, anịatịḅị ḅụnemika ḅaraḅụ ini ini depakụmamẹ Ijipt mị ḅie, anịẹrẹchị ini ḅarị sịkị nyana se fịye karakaramakẹ ini pịkị fịturu sumaye se anị mịẹkẹ.

⁴⁰Izrẹlapụma kụra ẹndẹ na kụra soi mị ini se Ijipt mị ḅie angaye-ẹ.

⁴¹Anị kụra ẹndẹ na kụra soi karama ene mị ḅie anị Nyanaḅọ Ḅe oria tomonima furo mamgba Ijipt mị ḅie pakasoye-ẹ.

⁴²Nyanaḅọ Ḅe mị ḍin koru se Ijipt mị ḅie ini pakụmaḅoye-ẹ; anịẹrẹchị anị ḍin mị ini anị se osiḅụ wẹrị Nyanaḅọ Ḅe pịrịḅịa, ḅụọ ọkịmun ḅụọ la, Izrẹlapụma ini ḍin koruḅịa, ḅo anị ene mị lasịkị lasịkị.

⁴³Nyanaḅọ Ḅe nwọse Moziz ḅe na Erọn ḅe na ḅẹmẹ, “Ma anị Saḅaḅọrọ Alalị mị oloko ma-ẹ: Gbọrị igoniḅọ sọnị Saḅaḅọrọ Alalị fịye mị fịẹkẹ,

⁴⁴ọkụma ọ́ fẹ omoniḅọ goyegoye anị fịḅịa ọ́ ḅọrọ nemikase ọ̀ ḅụ pẹlẹsam nwọ ḅẹḅẹ.

⁴⁵Gbọrị bịamḅọ sọnị, pịkị ọkọ fịrịnwẹngịḅọ sọnị anị fịẹkẹ.

⁴⁶Fịye mị mgba ini sime anị chụọ warị mị ḅie mị ini anị fịḅịaye-ẹ; ini anị deki nụngọ paka ẹkẹ. Nama ịmgbema ḅụ gbọrịye sọnị ómine anyịmama.

⁴⁷Izrẹl sẹ mị mgba gboloma mị alalị mị fịḅịa,

⁴⁸ọkụma gbọrị ḅụpẹlẹkaḅọ sọnị anị fịẹkẹ. Nemikase igoniḅọ ómine na anga se Saḅaḅọrọ Alalị mị fị se osi se Nyanaḅọ Ḅe pịrị ḅimẹ ḅẹḅẹ, ọ́ tatarị nụḅọ ḅụpẹlẹ pịkị oria warị ḅie sime owuapụ mamgba na. Anịsịkị Izrẹl furo tọkụ ḅara ọ́ nwọse ori ọkị, ọ̀ pịkị ómine na sọ gboloma alalị mị fịḅịa.

⁴⁹Ma gbọrị olokoma àrị sime Izrẹl awọma pịrịmẹ pịkị ómine na anga igoniapụma na sọnị.”

⁵⁰Izrẹlapụ mamgba Nyanaḅọ Ḅe chụa se Moziz ḅe na Erọn ḅe na pịrị olokoma ini koko mẹ se ini pịkị ọ̀ tọn ọkụ mịẹmẹ.

⁵¹Anị gbọrị ene mị ḅie Nyanaḅọ Ḅe Izrẹlapụma ḍụapakụmaḅomẹ Ijipt mị ḅie. Ini ọrụ tọn ḅaraḅụ pakaḅomẹ sẹ sẹ ḅụ.