Read kirikeni Pakaso 15 Bible Online

Pakaso 15 - kirikeni bible

Pakaso 15

¹Anịsịkị Moziz ḅe na Izrẹlapụma na mị nime mị chu seni Nyanaḅọ Ḅe bomamẹ: “À nime chu seni Nyanaḅọ Ḅe bomaḅịa, anịatịḅị boma nyana ọmụḅaraiḅi ọ̀ nwọ nyanasam; asụnma na árị seni nwẹngịapụma na ò seni tọrụ mị ḅie gbinsam.

²Nyanaḅọ Ḅe anị kụrọma ị̀ ḍụarịḅọ ḅe-ẹ; ori anị ị̀ ḍụaḅọrọmaḅọ ḅe-ẹ; Ori anị ị̀ Tamụnọ Ḅe-ẹ, à pịkị ò tokoniḅịa, ị̀ ḍaḅe Tamụnọ Ḅe, à pịkị oria opu mị se nime chuḅịa.

³Nyanaḅọ Ḅe owuniḅọ-ẹ; Nyanaḅọ anị oria ẹrẹ-ẹ.

⁴“Ijipt apụ ọmụogbo mị na anịa kiri ọgọnọ owuni kporokporo arụ ma na ò seni tọrụ mị ḅie gbinmẹ; inia ḅie owusọtẹịn tịḅịdapụ ma ori ini se Awụwụ Tọrụ mị ḅie simbi ḅaasam.

⁵Gbun tọrụ mị anị ini gbẹịnmẹ; ini ḅile mun kiri lamẹ, ḍụparị ḅara.

⁶“Ị́ya amaḅara mị anị kụrọ ḅara ḅụgbiripumamẹ, yei Nyanaḅọ; anị tarakapụma ḅaa kọsịmamẹ.

⁷Ọmụ opu amanyanaḅọ ḅara ị́ nwọse ị́rị́ na tarakapụma nẹngịmamẹ; ị́ya ịganị mị anị kọrị paka osuein dọkịma ọkụ nwọse ini dọkịmamẹ.

⁸Ị́ fọrụ fiema tọrụ mị ḅụ sara se mengi mị kpokponima gelema chịẹmẹ; onu chịẹ ọkụ anị anị chịẹ ọkụ-ẹ; tọrụ mị ḅụ gbuntẹịn anga mị pịkịḅo kpoinkpoin kiri sọmẹ.

⁹Tarakaḅọ ḅe nwọ ḅẹmẹ, ‘Àrị ini ḍuko mun ini kunḅịa; àrị inia ngọma ḍia pịkị à ḅi aye mamgba nwọ ọkịḅịa; àrị ị̀ya okola-agiji mị wọrọ se ini nyana aye mamgba nwọ ọkịḅịa.’

¹⁰Ọkụma Nyanaḅọ, gbọrị sịkị ḅụ ị́ sara ọwụ mị Ijipt apụma simbi ḅaamẹ; lịmọ ḅile ọkụ anị ini ḅile ọkụ-ẹ ḅalafama mengi mị ḅie.

¹¹“Yei Nyanaḅọ, oru ma ḅụ tụḅọ ị́ kịkẹ? Tụḅọ ị́ kịkẹ, ḅụgbiripuma osiḅụ simeḅọ, tokoni nyana ḅalafamaḅọ? Tụḅọ ị́ kịkẹ ḅe ḅụgbiripuma fịrịnwẹngị ḅụ pịkị kụrọye mịẹḅụ na?

¹²Ị́ya amaḅara mị ị́ nwọ sụmamẹ, se kiri mị mine-na-tarakapụ ma mịnịmẹ.

¹³Kuḅie se ḅụgbana na gbẹịnḅọ ị́ nwọ sọmẹ ị́ ḅereniye mị ḅụ, ị́ tọrọkọ tarị ị́ ḍụaḅọrọmasa apụma pịrịmẹ; ị́ya kụrọ ḅụ ị́ ini pamun ị́ya osiḅụ sime ama mị lamamẹ.

¹⁴Sẹ ma àrị naamẹ, se ḅụgeregere ḅụ inia ḅalafamẹ; Filistia apụma tẹmẹ taịntaịn inia ḅụ sọsam.

¹⁵Idọm mị anịa tịḅịdapụ ma inia ḅụgbiripumẹ; Moab mị anịa kụrọnị ma inia ḅụgeregere aḅẹ; Kenan apụma ini ḅarị kuḅie kụrọ nyanakẹ.

¹⁶Tẹmẹ taịntaịn na opu ḅalafa na ḅo inia ọgọnọ gbanasam. Yei Nyanaḅọ, ị́ya kụrọ mị ini ọrịsam, mịọkụ ḅarachụaḅọ nyanaka ḅaraḅụ inia ḅalafa aḅẹ, ọkịmun ị́ya tomonima ḅọrọso sịkị lamẹ— anị omoniapụ ḅaraḅụ ị́ pakụmaḅo apụma.

¹⁷Ị́ ini ọkịḅo chumẹ se ini seni ị́ya tụndụ mị ọgọnọ ḍipimẹ, anị Ị́rị́ Nyanaḅọ Ḅe sẹlẹ se ị́ya warị mịẹ nyọ mị, ị́rị́ ḅara na nama Oputẹkẹwarị mị

¹⁸Ị́rị́, Nyanaḅọ Ḅe, ị́ amanyanaḅọ sọ mun ḅene-ḅene laḅịa.”

¹⁹Izrẹlapụma kpoinkpoin kiri ọgọnọ ini nwẹngị tọrụ mị saḅamẹ. Ọkụma Ijipt apụma inia kiri ọgọnọ kporokporo arụ ma na, asụnma na, àrị se nwẹngịapụma na, tọrụ mị ḅie sọmun sịkị, Nyanaḅọ Ḅe ò mengi mị ọkịḅo ini gbẹịnmẹ.

²⁰Ịkịankoro Miriam, Erọn ḅe nụmbụrarọ ma, árịa ọbọ mị á nwọ ọkịmẹ se eremeni mamgba á ḍuko se ini ọbọ ma farị se sẹkịaḅẹ.

²¹Miriam ma á nime chu ini pịrịmẹ: “Ó nime chu Nyanaḅọ Ḅe boma, anịatịḅị boma nyana ọmụḅaraiḅi ọ̀ nwọ nyanasam: asụnma na àrị se nwẹngịapụma na ò seni tọrụ mị ḅie gbinsam.”

²²Anịsịkị Moziz ḅe, Izrẹlapụma tọrọkọda se ini na Awụwụ Tọrụ mị ḅie ḅụ nwẹngị so Shụa onwun ele ḅie mun mẹ. Tẹrẹ-a ḍin ini nwọse onwun ele ḅie nwẹngịmẹ, ọkụma ini mengi ọrịkẹ.

²³Ini ḅo Mara nwọ chịn gbọrị anga nwọ lamẹ, ọkụma anị nyọ sime mengi mị opuma akụmẹ gose ini ineda anị ḅukẹ. Anị ini gose Mara nwọse anị chịnye-ẹ.

²⁴Tomonima ini ḍuko Moziz ḅe sua se nwọse ò gbelamẹ, “Nde wa ḅuḅịaye?”

²⁵Moziz ḅe ori ò kuḅie laḅara se Nyanaḅọ Ḅe tẹkẹmẹ, se Nyanaḅọ Ḅe gbọrị chịn ikiḅa nwọse ò ḍiemẹ, ori anị seni mengi mị ḅie gbinmẹ; se mengi mị pịkịḅo ḅu mengi nwọ sọmẹ. Anịanga ḅụ Nyanaḅọ Ḅe ini seni inia ḅụ kekeḅịa olokoma nwọse ini pịrịmẹ, ọ̀ pịkị anịanga ḅụ ini ḍaḍikimẹ.

²⁶Ọ̀ nwọ ḅẹmẹ, “Ó nemikase ị̀ ḅịpịpoki se karakaraye mị kẹngẹ nwọ mịẹ pịkị à tọn ọ́ pịrịayema nwọ mịẹmẹ ḅẹḅẹ, à seni Ijipt apụma pịrị obi ma ḅụ gbọrịye sọnị à se fomuḅara ḅụ ọ́ pịrị-ẹkẹ. Ị̀rị̀ Nyanaḅọ Ḅe anị ọ́ gwọgwọḅọ ḅe-ẹ.”

²⁷Anịanga ḅụ ini sọmun Ẹlim mị lamẹ, anị oyimaịn ideri mengi fịnjịma na pịkị kọrọ-a tesi oyi fịnjịma na sime nyọ mị-ẹ; anịju ini mengi mị anga sịkị pike simemẹ.