Read kirikeni Pakaso 19 Bible Online

Pakaso 19 - kirikeni bible

Pakaso 19

¹Izrẹlapụma ini Rẹfidim mị koromasomẹ, ini Ijipt mị koromaso tẹrẹ karama akalụ mị ḅie ngei ene ḅụ ini ḅo Saịnaị onwun ele mị lamẹ. Anịanga Saịnaị Tụndụ mị chuku ḅụ ini pike ịnyọsara simemẹ,

³se Moziz ḅe ọ̀ tụndụ mị tanjị mun Tamụnọ Ḅe na ịrịamẹ. Nyanaḅọ Ḅe tụndụ mị ọgọnọ ḅụ ọ̀ chịn seni nwọse ọ̀ ḅẹmẹ na ò ḍuko Izrẹlapụma pịrị anị Jekọb awọma:

⁴“Ị̀rị̀ Nyanaḅọ Ḅe à seni Ijipt apụma mịẹaye ma ómine ọrịmẹ anị igo pamba seni mịna tọkụ deki ọkụ à nwọse ó deki, se ómine ọkịḅo mịanga koroma ị̀ ḅụ pịrị ọkụ mị.

⁵Mịọkụ ọ́ ḅọrọ nemikase ị̀ ḅịpị poki pịkị ị̀ya ọḅọkụ mị kokoḅịa ọkụma, ómine ị̀ya tomoni sọḅịa. Bebe sẹkiri mị mgba ị̀yaye-ẹ, ọkụma à sẹlẹ ọkịsa apụ ọ́ nwọ sọḅịa,

⁶fịafịa ḅụ sime ị̀rị̀ ngẹrị pịrị apụ, pịkị agbamịẹ apụ ọ́ nwọ sọ ị̀ pịrịḅịa.”

⁷Anị Moziz ḅe ò koromun tomonima ḅie tịḅịnịma chịn koḅiri se Nyanaḅọ Ḅe tọn ọ̀ pịrị aye mamgba nwọ ḍuko ini pịrịye-ẹ.

⁸Anị tomoni mamgba pẹkẹrẹ se nwọ ḅẹye-ẹ, “Nyanaḅọ Ḅe ḍuko aye mamgba wa mịẹḅịa,” se Moziz ḅe anị ḍuko Nyanaḅọ Ḅe pịrịmẹ.

⁹Nyanaḅọ Ḅe nwọse Moziz ḅe ḅẹmẹ, “Kpiti soḅuno ḅie à wẹrị ị́ damaḅoḅịa mịẹse tomonima naaḅịa ọkụ àrị ị́rị́ na ọkwẹịn àrị sịkị, se mịọkụ sakị tọrọkọ mun ini ị́ ḅereniḅịa.” Moziz ḅe tomonima pẹkẹrẹye mị ò ḍuko Nyanaḅọ Ḅe pịrịmẹ,

¹⁰se Nyanaḅọ Ḅe nwọse ọ̀ ḅẹmẹ, “So tomonima damamun se ḍuko ini pịrị na, mịmgba na ḅa na ini iniaḅụma mịẹfịafịama tẹkẹ sịkị wẹrịma. Ini inia ḅụchụayema sịkịrị

¹¹se ini ḅụkarakarama ḅa ḅọrọ berembere ene mị wẹrịma. Anị ene mị à koro Saịnaị Tụndụ mị ọgọnọ ḅoḅịa anị tomoni mamgba ineda ị̀ ọrịḅịa anga ḅụ.

¹²Eke chụa tụndụ mị kelema, tomonima ini saḅa ḅọrọ ẹka ọkụ, pịkị ḍuko ini pịrị na tụndụ mị ini tanjịma, ini pịkị ḅụ seni anị kpekimama. Nemikase ḅụọ seni anị lamaḅọ omi-ẹ ḅẹḅẹ, nụḅọ fịḅịa;

¹³ini imgbele se nụḅọ gbinkẹ ḅẹḅẹ ini ḍẹịn se nụḅọ tẹịnḅịa gbọrịḅọ sọnị ḅara seni nụḅọ lamaka ḅaraḅụ. Mị mịẹmịẹye mị sime tomoni na nama na pịrịmẹ; ini nụḅọ ḅaaḅịa. Ọkụma oḍu mị fiesa ḅẹḅẹ, anịsịkị anị tomonima tụndụ mị tanjịḅịaye-ẹ.”

¹⁴Anị Moziz ḅe tụndụ mị ọgọnọ koroḅo se ḍuko tomonima pịrịye-ẹ na ini ḅụkarakarama tẹkẹ wẹrịma. Anịẹrẹchị ini inia ḅịtẹma sịkịrịmẹ,

¹⁵se Moziz ḅe nwọse ini ḅẹmẹ, “Ọ́ ḅụ karakarama ḅa ḅọrọ berembere ene mị wẹrịma, ọ́ pịkị na mị kalasịkị ḅụ ama na ere na gboloma mịẹaye mịẹma.”

¹⁶Tẹrẹ-a ḍin karama ene dede mị ḅie soalagba tẹịnmẹ, so pịkị wakam na kpiti soḅuno pakaḅomẹ, tụndụ mị ọgọnọ pịkị gele oḍu pụkọ ini nwọ naamẹ. Ini pike ịnyọsara sime anga mị ḅụ sime apụ mamgba ḅụgeregeremẹ ḅalafa ḅụ.

¹⁷Moziz ḅe ini pike ịnyọsara sime anga mị ḅụ ori ini na mun Tamụnọ Ḅe na ịrịamẹ, se ini tụndụ mị chuku chịẹsimemẹ.

¹⁸Saịnaị Tụndụ mị mgba onwoin anị gbẹịnmẹ, anịatịḅị Nyanaḅọ Ḅe fịnị ḅara ọ̀ nwọse koro anịa ọgọnọ ḅomẹ. Onwoin mị, orumo onwoin iwo ọkụ anị nwọse iwomẹ, se tomoni mamgba opu ḅụgeregere ini nwọ nyanamẹ.

¹⁹Oḍu pụkọ mị ḅo mbikia-mbikia kụrọma fiemẹ. Moziz ḅe ori ọkwẹịn ọkụma, Tamụnọ Ḅe soalagba ḅie ori ọ̀ pẹkẹrẹmẹ.

²⁰Nyanaḅọ Ḅe ori ideri Saịnaị Tụndụ mị ọgọnọ ḅo se Moziz ḅe chịn tụndụ mị ọgọnọju mun mẹ. Moziz ḅe ori iwo mun mẹ

²¹se Nyanaḅọ Ḅe nwọse ọ̀ ḅẹmẹ, “Koromun tomonima ḅeri nụnụ na eke mị ini saḅa ḅọrọḅo ị̀ ḍikima-ẹ; ini nemikase ọkọ mịẹ ọkụma, iniaḅụ tọn-a apụ fịḅịa.

²²Ini agbamịẹapụma sọnị, anị ḅo ị̀rị̀ na kpeki ḅịa apụma ini inia ḅụ mịẹfịafịama, anị ḅara ini nwọ mịẹka ọkụma à fomuḅara se ini pịrịḅịa.”

²³Moziz ḅe nwọse Nyanaḅọ Ḅe ḅẹmẹ, “Tomonima ini ineda iwo ḅoẹkẹ, anịatịḅị ị́ nwọse wa ḅẹmẹ na tụndụ mị wa osi nyanaye ḅara se anị ọkị, pịkị eke chụa anị kelema.”

²⁴Nyanaḅọ Ḅe nwọse ọ̀ pẹkẹrẹmẹ, “Koromun Erọn ḅe ọkị ị́ ḅụ chụa se ḅo. Ọkụma agbamịẹapụma na tomonima na ngịsị eke mị ini saḅa ḅọrọ ị̀ damaḅoma, anịka ọkụma à fomuḅara se ini pịrịḅịa.”

²⁵Moziz ḅe ò koromun Nyanaḅọ Ḅe ḍukoye mị nwọ ḍuko tomonima pịrịmẹ.