Read kirikeni Pakaso 23 Bible Online

Pakaso 23 - kirikeni bible

Pakaso 23

¹“Iruo iriaḅa ḍukoma, pịkị ḅarachụa ḅẹrẹḅarasiḅọ ḅe pịrị ma anị iruo onyechịẹ ḅụ.

²Tomoni kpo mị ḍuko siye mịẹma ini siye mịẹarị sịkị ḅụ, anịkanịka ini karakara ḅẹrẹkọn mị pịkị iḅo sịkị sọnị.

³Nweni-a ḅụsọ igweinḅọ ḅe pụnụma ma ini oria ḅẹrẹkọn àrị sịkị ḅụ.

⁴“Nemikase ị́rị́ na tarakaḅọ nambulo anịkanịka yepụra asụn iri fa àrị ọkụ ị́ nwọ ọrịmẹ ḅẹḅẹ, ọkịmun se ọ̀ pịrị.

⁵Oria yepụra asụn ḅe nemikase ọ̀ pụraye mị na ḅịkịmẹ ḅẹḅẹ, ḅarachụa ọ̀ pịrị, yepụra asụn ḅe deki chịẹma; papa ò koroma so ma.

⁶“Igweinḅọ ḅe, ḅẹrẹkọn warị mị ḅie, oria ḅẹrẹkarakara mị anị pịkị iḅo ma.

⁷Iruo-a ḅẹrẹ se nweniḅọ ọgọnọ gbana ma, pịkị ḅẹrẹnemikaḅọ ḅe, se mun fị ḅie chu ma, anịatịḅị ọkọ sime siye mịẹḅọ goyegoye à ḅẹrẹḅarasi kọn nụḅọ pịrịḅịa.

⁸Ọḅụ fịma, anịatịḅị ọḅụ fị mị mịẹse tomoni-a tọrụmgbọlụ pụn-pụnmẹ karakaraye mị ḅụ, se ini yemịẹka apụma ḅẹrẹ ma simasimamẹ.

⁹“Ó siye se igoniḅọ mịẹma; ye igoniḅọ ḅe na simesime ọkụ ó nemisa sịkị, anịatịḅị ómine sọnị ómine igoniapụ sọ ḅọrọsam Ijipt mị ḅie.

¹⁰“Sonio-a kụra anị ó se ọ́mịna ozuma ḍipi pịkị arịa ḅie pakaḅo chịnmgbọlụma nwọ tan koḅiriḅịaye-ẹ.

¹¹Ọkụma sọnọmẹ karama kụra mị anị wẹrịso anị ịnyọsara, pịkị anịa ḅie sopakaye layelaye sokuma. Igwein apụma anịa ḅie sopakaye ma nwọ fịḅịa, piri ḅie owoi namama pịkị kọn ayema nwọ fịḅịa, ọ́mịna irumịẹ chịnmgbọlụ ozuma na. Pịkị ọ́mịna oliv chịnma ḅụ sọnị ómine ọkọmịẹ.

¹²“Fẹnị enema ḅie sonio-a ḍin ọ́ nwọse fịrịnwẹngị, ọkụma sọnọma ḍin karama ene mị ḅie ómine ịnyọsara, mịẹse ị́ya omoni ma na pịkị fịrịnwẹngị ị́ pịrịpịrị igoniapụma na pịkị ị́ya namama na sọnị ịnyọsaraḅịa ọkụ.

¹³“Ị̀rị̀, Nyanaḅọ Ḅe ḍuko ọ́ pịrịye goyegoye ọ́ nwọ poki. Ọ́ jịn-a oru tẹkẹma, arịa ẹrẹ ma sọnị ngịsị ó go ma.

¹⁴“Kụra mị ḅie tẹrẹ-a alalị ọ́ nwọ fị se osi seni ị̀ pịrị.

¹⁵Abib akalụ mị ḅie, anị ómine Ijipt mị koromaso sịkị mị, Suka Fịturu Alalị mị ọ́ nwọ fị à tọn ọ́ pịrị ḅara ḅụ. Mị alalị mị ḅie sọnọma ḍin ma ḅụ fịturu sumaye seni mịẹ fịturu ọ́ fị ma. Ó seni agbamịẹḅịaye ofori-ẹ ḅẹḅẹ ó ḅo ị̀ tẹkẹma.

¹⁶“Ọ́mịna fịayema ọ́ sakị nwọ sokuḅịa sịkị ḅụ Sokusịkị-Alalị ọ́ nwọ fị. “Kụra kuluma sịkị mị ḅụ ọ́ chịnmgbọlụma koḅiri warị chusa ḅẹḅẹ, ọ́mịna irumịẹ chịnmgbọlụ ozuma na pịkị fịaye ozuma ḅie na, Koḅiri Warị Chu Alalị mị ọ́ nwọ fị.

¹⁷Kụra goyegoye ma tẹrẹ-a alalị ma ḅụ ọ́mịna owuapụma ini ḅo ị̀ tẹkẹtẹkẹḅịa, Ị̀rị̀ ọ́ Nyana Tamụnọ Ḅe-ẹ.

¹⁸“Ọ́ nama seni agbamịẹ ị̀ pịrịḅịa sịkị goyegoye, fịturu sumaye se mịẹ fịturu ó seni agbamịẹ ị̀ pịrị ma. Ó seni ma alalị ma ḅie agbamịẹ ị̀ pịrị namama ḅụ ḅẹlẹkị mị anị sime mun eneḅa dede la ma.

¹⁹“Kụra goyegoye ọ́ tatarị pẹlẹ ịpịamgba ma ó se ọ́ Nyana Tamụnọ Ḅe warị ḅo. “Nyengiwu kuḅie ndondoarị anana tọkụ anịkanịka oḅori tọkụ ọ́ chụọ ma.

²⁰“Ó mun-arị sịkị ó ḍikiḍikiḅịa enjẹlḅọ à nwọse ọ́ tọrọkọ fịrịmaḅịa se ómine ọkịḅo à tẹlịma koroma nyọ mị laḅịa.

²¹Ómine ọ̀ tọrụ ḍiki se pịkị ọ̀ ḅịpịpoki. Ómine ininachịn ọ̀ pịrịma, anịatịḅị ị̀rị̀ ọ̀ fịrịmamẹ, ò si wẹrịso ininachịnḅọ pịrị-ẹkẹ.

²²Ó nemikase ọ̀ ḅịpịpoki se à tọn aye mamgba nwọ mịẹmẹ ḅẹḅẹ, àrị owu seni ómine na tarakapụ mamgba pakaḅịa.

²³Ị̀ya enjẹlḅọ ḅe ori ọ́mịna tọrọkọ da se ómine ọkịmun Amọraị apụma na, Hitaị apụma na, Hivaị apụma na, Pẹrizaị apụma na, Kenan apụma na, pịkị Jebus apụma na ama mị ḅie chuḅịa, se àrị ini ḅaafamaḅịa.

²⁴Inia oru ma ngịsị ọ́ tịḅịtu àrị pịrịma ọ́ pịkị àrị tẹkẹma, inia oru-a mịẹmịẹaye ma sọnị ọ́ ḍama. Inia oru ma ọ́ kan kọsịma pịkị ini pike chịẹma tọnḅụ sime ḍụparị mamgba ọ́ ḅaa kọsịma.

²⁵Ó nemikase Ị̀rị̀ ọ́ Nyana Tamụnọ Ḅe tẹkẹtẹkẹmẹ ḅẹḅẹ à fịye na mengi na se ọ́ ḅẹlẹma ḅịa, à pịkị ọ́mịna obi mamgba deki sinḅịa.

²⁶Ọ́mịna ama mị ḅie fura-ḅụ-soḅịa-gbọrị eremeniḅọ anịkanịka tọkụ yi-ẹkaḅọ oforiḅịa. À nangwọ ḍumo seni ọ́ pịrịḅịa.

²⁷“À mịẹḅịa ómine na tụḅụrụ apụma ị̀ ḍikiḅalafaḅịa. À ḅịpịogbosọka seni ómine na owusọ àrị apụma ḅie chuḅịa. À pịkị mịẹse ómine na tarakapụma vinpịkị se ó ḍiki mangị ḅịa.

²⁸Àrị ómine-na-tarakapụma seni ḅụḅalaḅala ḅie chuḅịa; Hivaị apụma na, Kenan apụma na, pịkị Hitaị apụma na; àrị ini desinḅịa ómine ini na ọmụ gbin tọrọkọ mun-arị sịkị.

²⁹Gbọrị kụra ḅụ àrị ini desin ẹkẹ; à nemikase ọkọ mịẹ ọkụma, ama mị anị ḅo nweni oforika nyọ sọḅịa, owoi namama pịkị ḅakatẹịn ọ́ nẹngịḅịa.

³⁰Anịnakaraka à kelekelema ini depakụmaḅịa ọkịmun ọ́ ḅakaḅo nyọ mị mgba nwọ ọkịḅịa sịkị nwọ laḅịa.

³¹Ọ́mịna ama mị ḅie eke ma à ye se arịa ḅụ chụaḅịa. Akaba Ọpọ mị ḅụ sakị mun Mẹditirenia Tọrụ mị la pịkị onwun ele mị ḅụ sakị mun Yufretis Tọrụ mị la. Ó se ama mị ḅie anga apụma nẹngịmaḅịa kụrọ à nwọse ọ́ pịrịḅịa, ọ́ pịkị ini desinḅịa ómine ọmụ mị gbinma-muarị sịkị.

³²Ómine ini na ḅịpịogbosọ nyana ma pịkị inia oru ma sọnị.

³³Ó ḅereni ma iniapụ ma ọ́mịna sẹ mị ḅie anga; ó nemikase ḅereni ini pịrị ọkụma, ini ọ́ mịẹse ó si seni ị̀ mịẹḅịa, ó nemikase inia oru ma tẹkẹtẹkẹ ọkụma, anị opu ḍẹịn sọ ọ́ pịrịḅịa.