Read kirikeni Pakaso 24 Bible Online

Pakaso 24 - kirikeni bible

Pakaso 24

¹Nyanaḅọ Ḅe nwọse Moziz ḅe ḅẹmẹ, “Tụndụ mị tanjị se ị̀ damaḅo, ị́rị́ na Erọn ḅe na, Nedab ḅe na, Abaịhu ḅe na, pịkị Izrẹl mị ḅie tịḅịnịma ḅụ kịnị-a tesi oyi fịnjị na; se ọ́ sasaju simearịogbo, ọ́ tịḅịtu se tẹkẹ.

²Ị́rị́ ngẹrị ḅo, ísí apụma ḅụ gbọrịḅọ sọnị ị̀ kpekimaḅo ma. Tomonima tụndụ mị ini tanjị ḅo ma.”

³Moziz ḅe ò mun Nyanaḅọ Ḅe tọn koroma ayema na pịkị oloko mamgba nwọ ḍuko se tomonima pịrịmẹ, se tomoni mamgba gbọrị pụkọ ḅụ pẹkẹrẹ seni nwọ ḅẹmẹ, “Nyanaḅọ Ḅe ḍuko aye mamgba wa mịẹḅịa.”

⁴Moziz ḅe Nyanaḅọ Ḅe tọn koroma aye mamgba ọ̀ gịẹịn koromamẹ. Anịḅe eneḅa dede funfun ḅie ori agbamịẹ ẹbẹ nama chịẹmamẹ tụndụ mị chuku, ọ̀ pịkị oyimaịn ḍụparị fịnjị nwọ chịẹma koromamẹ Izrẹl oyimaịn furo fịnjịma ḅie gbọrị furo gbọrị ḍụparị nwọ nyanamẹ.

⁵Anịsịkị ori asẹmẹnị fịrịma, se ini dọkịma agbamịẹ Nyanaḅọ Ḅe pịrịmẹ. Ini pịkị nambulo se gboloma agba nwọ mịẹmẹ.

⁶Moziz ḅe namama pulo mị ḅụ gbọrị kiri ọ̀ nwọ seni bọlị ma ḅie chụamẹ; se kiri kọnye mị ọ̀ nwọ seni agbamịẹ ẹbẹ mị ḅụ saramẹ.

⁷Anịsịkị ò ḅo ọḅọkụ ḍiri mị dekimẹ; anị ini Nyanaḅọ Ḅe tọn ayema gịẹịn koromaye mị, se ò gele pụkọ seni anị go tomonima pịrịmẹ. Ini nwọ ḅẹmẹ, “Wa Nyanaḅọ Ḅe ḅịpịpoki pịkị ọ̀ tọn aye mamgba nwọ mịẹḅịa.”

⁸Anịsịkị Moziz ḅe ḅo bọlị ma ḅie sime nama pulo mị ọkị se anị seni tomonima sanamẹ. Ọ̀ nwọ ḅẹmẹ, “Mị anị Nyanaḅọ Ḅe ómine na fị ọḅọkụ mị mịẹkụrọma pulo mị-ẹ ọ̀ ma oloko mamgba tọn wa pịrị sịkị mị ḅụ.”

⁹Moziz ḅe na Erọn ḅe na, Nedab ḅe na, Abaịhu ḅe na, pịkị Izrẹl ḅie tịḅịnịma ḅụ kịnị-a tesi oyi fịnjịma na ini tụndụ mị tanjị mun mẹ

¹⁰ini tọrụ se Izrẹl Tamụnọ Ḅe nwọ ọrịmẹ. Ọ̀ ḅụọchuku ḅụ opuma yela ḍụparị na kịkịna mọnịmọnị ye omi-ẹ, sotọrụ bulu bulu ḅịa ọkụ ḅịamẹ.

¹¹Mịna Izrẹl tịḅịnịma Tamụnọ Ḅe ò yese ini lamakẹ, ini Tamụnọ Ḅe ọrịmẹ, ini ori na yefị pịkị ḅu gbolomamẹ.

¹²Nyanaḅọ Ḅe nwọse Moziz ḅe ḅẹmẹ, “Tụndụ mị tanjị ị̀ damaḅo, se ị́ nwọ mịanga sime àrị sịkị ḅụ, mama ḍụparị-a pẹkẹrẹ à nwọse ị́ pịrịḅịa, anị tomonima ḍawọḅịa oloko mamgba à nwọse arịa ọgọnọ ḅụ gịẹịn ayema.”

¹³Moziz ḅe na pịkị Jọsụwa ọ̀ palịḅọ ḅe na inia ḅụkarakaramamẹ, se Moziz ḅe ọ̀ sakị fịafịa tụndụ mị tanjịmẹ.

¹⁴Moziz ḅe nwọse tịḅịnịma ḅẹmẹ, “Mịanga wa pike sime ịnyọsara nyọ mị ḅụ ó sime wa koru ọkịmun wa ḅo sịkị la. Erọn ḅe na pịkị Họ ḅe na ini ómine na mịanga omi-ẹ; anịẹrẹchị ịgbanịaye nyanaḅọ goyegoye ini damamun se ini anị tẹlịma.”

¹⁵Moziz ḅe ọ̀ Saịnaị Tụndụ mị tanjịmẹ, se soḅuno anị gbẹịnmẹ.

¹⁶Nyanaḅọ Ḅe oria opu mị ḅịa mun tụndụ mị saramamẹ. Izrẹlapụma ḅụ enekuḅu mị, tụndụ ọgọnọ fịnị kọrịaḅẹ nwọḅẹ ḅara anị anị sime ọkụ-ẹ. Soḅuno mị anị tụndụ mị gbẹịn ọkịmun sonio-a ḍin nwọ lamẹ, se sọnọma ḍin karama ene mị ḅụ Nyanaḅọ Ḅe ò Moziz ḅe chịnmẹ soḅuno mị ḅie.

¹⁸Moziz ḅe ọ̀ tụndụ mị tanjị mun soḅuno mị ḅie sọmẹ. Anịanga ò sime mun enekaka mesi na ḍin-a mesi na nwọ lamẹ.