Read kirikeni Pakaso 25 Bible Online

Pakaso 25 - kirikeni bible

Pakaso 25

¹Nyanaḅọ Ḅe nwọse Moziz ḅe ḅẹmẹ,

²“Ḍuko Izrẹlapụma pịrị ini agbamịẹ ị̀ pịrị. Ọrụḅọ ọrụḅọ kuḅie tọn se nụḅọ se agba mị mịẹḅịaye la-ọkụ la-ọkụ nwọ da ọkị.

³Ma agbamịẹ ḍiepịrịayema: goli na, seleḅa na pịkị alapẹlẹka ikulele na;

⁴iḅi lọkọ ḅịtẹ bulu bulu tọrụ nyanaye na, awụ tọrụ nyanaye na pịkị pulo-pulo wulu na; oḅori ichuka se mịẹ ḅịtẹ na;

⁵ajirima-oju-apụra ini pulo-puloye seni bileye na; iḅi nama oju apụra na; ọjị chịn na;

⁶tọnjie pulo na, se tomoniḅọ tịḅị saraḅịa pulo na, pịkị insẹnsị ma na;

⁷opuma pulo-pulo tọrụ nyana yela ḍụparị na, gẹnịgẹnị ḍụparịma na anị se Gele Agbamịẹḅọ ḅe oria aba gbanaḅịaye mị na ekpe gbẹịnye mị na ḅie chụaḅịa aye ma-ẹ.

⁸Tomonima ini osiḅụ sime ikowarị nama ị̀ pịrịḅịa, mịẹse àrị inia ogboku angaḅịa ọkụ.

⁹À se ị́ ḍieḅịa ọkụ mị nwọse anị nama, pịkị ọkọ se anị ḅirima.

¹⁰“Ọjị chịn nwọse gbọrị igbe mịẹ, anịa ịsụn mị mama kuḅu na pẹkẹrẹ nwọ laḅịa, finji mị gbọrị kuḅu na pẹkẹrẹ na nwọ laḅịa, se anịa gele mị sọnị gbọrị kuḅu na pẹkẹrẹ na nwọ laḅịa.

¹¹Jokoma goli seni anịa ḅie na anịa oju na pịkị anịa aka mị na mgba nwọ oḅolo kelema.

¹²Inein-a goli goli yedekiaye mịẹse anịa inein-a ḅụọma ḅụ sụka, mamaye gbọrị pẹkẹrẹ gbọrị pẹkẹrẹ ḅụ simeḅịa.

¹³Seni anị dekiḅịa ọjị chịn nwọ mịẹ ḅo, se goli seni àrị oḅolo,

¹⁴se àrị seni Igbe mị ḅụ anga-anga ḅụ yedekiaye ma ḅie toluma.

¹⁵Chịn ma yedekiaye ma ḅie ini àrị seni toluma koroma, ini ḅarị àrị wọrọsinma.

¹⁶Anịsịkị à seni ị́ pịrịḅịa mama ḍụparị pẹkẹrẹ ma, anị olokoma ḅụ gịẹịn ayema seni igbe mị ḅie chụa.

¹⁷“Jokoma goli seni anịa ḅịpịgbẹịnye nwọ mịẹ; anịa ịsụn mị mama kuḅu na pẹkẹrẹ na nwọ laḅịa, anịa finji mị gbọrị kuḅu na pẹkẹrẹ nwọ laḅịa.

¹⁸Ini ḅakụsa goli nwọse mama enjẹlapụma nwọ mịẹ,

¹⁹ḅịpịgbẹịnye mị ḅụ àrị ịkọlị ịkọlị ḅụ sime. Mịẹse àrị ḅịpịgbẹịnye mị na gbọrịḅụ oḅolo sime.

²⁰Mama enjẹlapụma àrị tọrụ se jịnye jịnye daḅịa, se arịa pamba ma finji ma ḅịpịgbẹịnye mị gbẹịnḅịa.

²¹Mama ḍụparị pẹkẹrẹ ma seni Igbe mị ḅie chụa, se ḅịpịgbẹịnye mị seni anị ọgọnọ gbana.

²²À ḅo anịanga ị́rị́ na ịrịaḅịa, se ḅịpịgbẹịnye mị ọgọnọju ini tẹmẹ enjẹlapụma ogboku mị àrị ị̀ya oloko mamgba se ị́ pịrị seni ị́ àrị seni Izrẹlapụma pịrịḅịa.

²³“Ọjị chịn nwọse dẹbụl mịẹ, anịa ịsụn mị mama kuḅu nwọ la, anịa finji mị gbọrị kuḅu nwọ la, anịsịkị anịa gele mị pịkị gbọrị kuḅu na pẹkẹrẹ na nwọ la.

²⁴Jokoma goli seni anị gbẹịn pịkị goli seni anịa aka sịkịma oḅolo kelema.

²⁵Finji ḅụ ḅarakuḅu na gbasịye nwọ tẹmẹ anịa akasịkị ma kelema, se goli seni anịa akasịkị ma ḅọrọma.

²⁶Seni yedekiḅịa inein-a goli nwọse tẹmẹ kelekeleaye se àrị seni inein-a ịkọlị ma ḅụ chụa, anị ḅụọma sime anga ma ḅụ.

²⁷Dẹbụl mị dekiḅịa chịnma se tolumaḅịa kelekele ayema, àrị seni ị́ se anịa ḅụọma na, tọrụ mị na ọlọ gbolomaḅịaye mị na kpekima chụa.

²⁸Ọjị chịn seni yepụra chịnma mịẹ, se goli seni àrị oḅolo.

²⁹Iru agbamịẹḅịa panị ma na, ọmọngọ ma na, ojongo ma na, pịkị bọlị ma na nwọ mịẹ. Ma aye mamgba goli anị ị́ seni àrị mịẹḅịaye-ẹ.

³⁰Dẹbụl mị ị́ anị seni Ọḅọkụ Igbe mị tọrọkọ koromaḅịa, se sịkịmamgba ini se agbamịẹ ị̀ pịrị osiḅụ sime fịturu mị dẹbụl mị ọgọnọ mị anị simeḅịaye-ẹ.

³¹“Jokoma goli seni tọnjie gbanaye mịẹ. Anịa chuku na ọgọnọ na ini ḅakụsa goli seni anị mịẹ; se anị ḅirimaḅịa ngwengwe ma na ịwọma pakaḅoarị ịnyanya ḅẹlẹ ma na, arịmgba gbọrịḅụ simeḅịa.

³²Sonio-a ịkpangị anị nwọ chụaḅịa, gbọrị ịkọlị tẹrẹ-tẹrẹ.

³³Sonio-a ịkpangị ma ḅụ gbọrịye-gbọrịye tẹrẹ-a yeḅirima ngwengwe nwọ nyanaḅịa, ịmụnụ ngwengwe sime ọkụ nwọse àrị mịẹ, ịwọma paka pịkị finjisa ịnyanya ḅẹlẹ ma na.

³⁴Tọnjie gbanaye mị tọrụ mị ḅụ inein-a ngwengwe ị́ nwọse anị ḅirimaḅịa, ịmụnụ chịn ịkpangị mị sime ọkụ nwọse àrị mịẹ, ịwọma paka pịkị finjisa ịnyanya ḅẹlẹ ma na.

³⁵Tẹrẹ-a ịkpangị gbọrịḅụ-gbọrịḅụ simeḅịa se arịa chuku ḅụ ịwọma pakasa gbọrị ịnyanya ḅẹlẹ gbọrịye-gbọrịye ḅụ simeḅịa.

³⁶Ịwọma pakasa ịnyanya ḅẹlẹ ma na, ịkpangị ma na, pịkị tọnjie gbanaye mị na arịmgba ini ḅakụsa goli nwọ seni àrị mịẹ oḅoloma.

³⁷Sọnọma tọnjie nwọ mịẹse tọnjie gbanaye mị ọgọnọ koroma, mịẹse àrị kọrị, mun tọrọkọ saramaḅịa ọkụ.

³⁸Jokoma goli seni anịa yekpapụayema na fịye deki panị ma na nwọ mịẹ.

³⁹Jokoma goli ḅụ kele ịnyọ nyana aye nwọse tọnjie gbanaye mị na pịkị anịa aye mamgba na nwọ mịẹ.

⁴⁰Ọrị na tụndụ mị ọgọnọ ḅụ à seni ị́ ḍie ọkụ mị ị́ nwọse anị mịẹmẹ.