Read kirikeni Pakaso 3 Bible Online

Pakaso 3 - kirikeni bible

Pakaso 3

¹Gbọrị ene, Moziz ḅe ori oria ogo ḅọ tarọ ma da Jẹtro, Midia ḅie agbamịẹḅọ ḅe ananama na oḅorima na ḍikiḍikiarị sịkị, ori àrị na onwun ele mị saḅa mun Saịnaị osiḅụ sime tụndụ mị lamẹ.

²Anịanga ḅụ Nyanaḅọ Ḅe oria enjẹlḅọ, ḅụse ò ḍiemẹ gbọrị kọrịarị piri ogboku. Moziz ḅe ori anị ḍiki se ọrịmẹ na piri mị kọrịaḅẹ ọkụma anị dọkịkẹ.

³Ọ̀ ḅịpị se ḅụ fiemamẹ, “Mị kịrịye-ẹ.” “Nde piri mị gose dọkịkaye? À kpekima mun anị ḍikiḅịa.”

⁴Nyanaḅọ Ḅe ori ọrịmẹ na Moziz ḅe ò kpekima mun anị ḍikiḍiki-emun-aḅẹ nwọḅẹ sịkị, kọrịarị piri mị ḅie ogboku ọ̀ wẹrị ọ̀ chịnmẹ, “Moziz! Moziz!” Ọ̀ nwọ pẹkẹrẹmẹ, “Aan, mị ị̀rị̀-ẹ.”

⁵Tamụnọ Ḅe nwọ ḅẹmẹ, “Ḅarị kpekima ḅoma. Ị́ ḅụọ sime akpaka ma sin, anịatịḅị ị́ chịẹ kiri mị fịafịa kiri-ẹ.

⁶Ị̀rị̀ anị ị́ya ḅieju-aḍapụ, Ebraham ḅe na, Aịzịk ḅe na pịkị Jekọb ḅe na Tamụnọ Ḅe-ẹ.” Anị Moziz ḅe ọ̀ tọrụgbẹịnye-ẹ, anịatịḅị Tamụnọ Ḅe ḍiki mị ọ̀ ḅalafamamẹ.

⁷Anị Nyanaḅọ Ḅe nwọḅẹye-ẹ, “Ijipt mị ḅie ini se ị̀ya tomonima na kọn àrị si anga mị àrị ọrịsam; omoni-tịḅịda apụma ḅara ḅie ini ḍụaḅịa ẹrẹchị ini kọn àrị owu mị à naasam. Inia tọrụsiọrị mamgba à nemimẹ,

⁸anịẹrẹchị à koroḅosam, Ijipt apụma ḅara ḅie ini ḍụaḅịa gose, se à pịkị Ijipt mị ḅie ini pakụmaḅo ini seni iḅiọkụ finjima ama ḅie koromaḅịa ọkụ, anị lọkọlọkọ pịkị fịye pakụma ama mị, Kenan apụma na, Hitaị apụma na, Amọraị apụma na, Pẹrizaị apụma na, Hivaị apụma na, pịkị Jebus apụma na mịọkụ anga nyọ mị.

⁹Jokoma ị̀ya tomonima kọn àrị owu mị à naasam, Ijipt apụma ini pụnda àrị ọkụ mị sọnị àrị ọrịmẹ.

¹⁰Mịọkụ àrị ị́ seni Ijipt amanyanaḅọ ḅe fịrịma aḅẹ mịẹse ị́ ineda ị̀ya tomonima ḅọrọma pakụmaḅoḅịa ọkụ, oria sẹ mị ḅie.”

¹¹Ọkụma Moziz ḅe nwọse Tamụnọ Ḅe ḅẹmẹ, “Ị̀rị̀ ḅọrọ tụḅọ. Nde àrị ineda so amanyanaḅọ ḅe damamun, se Izrẹlapụma ḅọrọma pakụmaḅoḅịa ọkụ, Ijipt mị ḅie?”

¹²Tamụnọ Ḅe nwọ pẹkẹrẹmẹ, “Àrị ị́rị́ na simeḅịa, se ị́ Ijipt ḅie tomonima ọkị pakụmaḅosa ḅẹḅẹ, mị tụndụ mị ọgọnọ ómine ị̀ tẹkẹḅịa. Mịn mị ḍiepakụmaḅịa na ị̀rị̀ ị́ fịrịmamẹ.”

¹³Ọkụma Moziz ḅe nwọ pẹkẹrẹmẹ, “À mun Izrẹlapụma lase nwọse ini ḅẹ na, ‘Ọ́mịna ḅieju-aḍapụma Tamụnọ Ḅe ị̀ seni ómine fịrịmamẹ,’ ini nwọse ị̀ gbelaḅịa, ‘Nde oria ẹrẹ?’ Anịsịkị nde à ḍuko ini pịrịḅịaye?”

¹⁴Tamụnọ Ḅe nwọ ḅẹmẹ, “Ị̀rị̀ anị Ị̀rị̀-ẹ. Mị ị́ ḍuko ini pịrịḅịaye-ẹ: ‘Ị̀rị̀-ẹ ini nwọse chịn ḅọḅe ị̀ seni ọ́ fịrịmamẹ.’

¹⁵Ḍuko Izrẹlapụma pịrị na Ị̀rị̀, Nyanaḅọ Ḅe, inia ḅieju-aḍapụma Tamụnọ Ḅe, anị Ebraham ḅe na, Aịzịk ḅe na, pịkị Jekọb ḅe na Tamụnọ Ḅe, ị́ seni ini fịrịmamẹ. Mị ị̀ya ẹrẹ mịẹ sime gbamaso; mị anị tọrọkọju ḅoḅịa ḅụọ mamgba seni ị̀ chịnḅịa ẹrẹ mị-ẹ.

¹⁶Mun Izrẹl mị ḅie tịḅịnịma chịn koḅiri se ḍuko ini pịrị na ị̀rị̀ inia ḅieju-aḍapụma, Ebraham ḅe na, Aịzịk ḅe na pịkị Jekọb ḅe na Nyana Tamụnọ Ḅe ḅụḍiepakụma ị́ pịrịmẹ. Ḍuko ini pịrị na àrị ini damaḅosam, na Ijipt apụma seni ini mịẹarịye ma à pịkị ọrịsam.

¹⁷À tọnpẹlẹsam na Ijipt mị ḅie àrị ini ọkị pakụmaḅoḅịa, anị ini si anga se ini na kọn àrị nyọ mị, se ini ọkị so lọkọlọkọ, pịkị fịye pakụma ama munḅịa anị Kenan apụma na, Hitaị apụma na, Amọraị apụma na, Pẹrizaị apụma na, Hivaị apụma na, pịkị Jebus apụma na ama mị.

¹⁸“Ị̀ya tomonima ị́ ḍuko ini pịrịḅịaye ini pokiḅịa. Anịsịkị Izrẹl mị ḅie tịḅịnịma ị́ ḅụ sọ se so Ijipt amanyanaḅọ ḅe damamunḅịa se nwọse ọ̀ ḅẹḅịa, ‘Hibru apụma inia Tamụnọ Ḅe ori ọ̀ ḅụḍiepakụma wa pịrịmẹ. Mịọkụ ḅereni wa pịrị wa tẹrẹ-a ḍin se onwun ele mị ḅie sọmun agbamịẹ wa Nyana Tamụnọ Ḅe pịrị.’

¹⁹À nemimẹ na Ijipt amanyanaḅọ ḅe ori ọ́ wẹrịso se ó so ẹkẹ, kụrọḅara ọ̀ laka simeogbo.

²⁰Ọkụma àrị ị̀ya kụrọ mị ḍiepakụmaḅịa, à pịkị ḅụfụka se Ijipt mị pịrịḅịa, anị ḅalafamaye anịanga nwọ mịẹḅụ. Anị ḅọrọ seso, ó ḅereni ọ́ pịrị se ó soḅịa.

²¹“À mịẹse Ijipt apụma ini sakị iḅi seni ọ́ mịẹḅịa, mịẹse ị̀ya tomonima papa ḅara se Ijipt ḅie pakasoẹka ọkụ.

²²Izrẹl eremeniḅọ goyegoye mun nụḅọ na kpekima anga Ijipt apụma na pịkị árịa warị ḅie anga Ijipt eremeniḅọ goyegoye ḅara ḅụchụaye na, goli na pịkị seleḅa, se mịẹ ḅiriaye na nwọ ḅi ọkịḅịa. Izrẹlapụma mayema ini seni inia owuapụ awọma na eremeni awọma na ḅirimaḅịa, se ini Ijipt apụma inia ngọma ọkị se chụasoḅịa.”