Read kirikeni Pakaso 30 Bible Online

Pakaso 30 - kirikeni bible

Pakaso 30

¹“Ọjị chịn se insẹnsị dọkịmaḅịa ẹbẹ nama.

²Anịa inein-a ịkọlị ma gbasịḅịa, anịa ịsụn gbọrị ḅụọ na pẹkẹrẹ, finji mị pịkị gbọrị ḅụọ na pẹkẹrẹ-ẹ, anịa gele mị tẹrẹ-a ḅụọ laḅịa. Inein-a ịkọlị ma na kuḅu mị na gbọrị ḅụ simeḅịa.

³Jokoma goli se anịa ọgọnọju na, inein-a agbagba mamgba na kuḅu mị na oḅolo, pịkị goli se aka ma ḅụ eke chụa kelema.

⁴Goli se ini se anị dekiḅịa mama kelekele aye nwọ mịẹ, àrị se ẹbẹ mị kelema eke mị chuku ḅụ mama agbagba ma ḅụ chụa, ini se anị dekiḅịa chịnma arịa ḅie àrị ḅọrọḅịa.

⁵Ọjị chịn se ma chịnma mịẹ, se goli se àrị oḅolo.

⁶Mịn ẹbẹ mị, Ọḅọkụ Igbe mị kikima ḅịtẹ mị ḅụ anị pakụma koroma. Anịanga mị àrị ị́rị́na ịrịa ịrịaḅịaye-ẹ.

⁷Erọn ḅe ò ḅo dede goyegoye tọnjie ma karakaramaḅịa sịkị, ori anị ọgọnọ insẹnsị dọkịma dọkịmaḅịa.

⁸Mịn gbọrị ḅara mị, ọ̀ nwọ mịẹmịẹḅịa, saso ḅiri ọ̀ tọnjie ma chụaḅịa sịkị goyegoye. Mịn insẹnsị dọkịma mịẹmịẹye mị, gbọrịye sọnị anị kikika ḅaraḅụ, ḅoḅịa ene mamgba ḅie anị mịẹma mịẹma munḅịa.

⁹Iḅika se ini sịkị insẹnsị mị ẹbẹ mị ọgọnọ ọ̀ dọkịmama, pịkị obiarị nama na iḅika fịaye mgbọlụ sọnị, ọ̀ pịkị anị ọgọnọ agbamịẹ iru sara ma.

¹⁰Erọn ḅe kụra gbọrị sịkị gbọrị sịkị ọ̀ nwọse ini se si sịkịrị sin agbamịẹ nama ḅe pulo mị se anịa inein-a ịkọlị ma ḅụ sara fịrị mị nwẹngị nwẹngịḅịa, ẹbẹ mị se fịafịa ḅụ wẹrị gose. Mịn mị kụra goyegoye ini anị mịẹmịẹḅịa ḅoḅịa ene mamgba ḅie. Mịn ẹbẹ mị, anị jokoma fịafịa ḅụ simeḅịa, osiḅụ anị sime ị̀ pịrịmẹ, Nyanaḅọ Ḅe.”

¹¹Nyanaḅọ Ḅe nwọse Moziz ḅe ḅẹmẹ,

¹²Izrẹlapụma ị́ nwọ kịẹnḅịa sịkị, ọrụḅọḅọ nụḅọ ḍumo mị gose gbẹịnye se ị̀ pịrịḅịa, mịẹsosịkị siye nụḅọ ḅụ paka ẹka ḅara, nweni kịẹn mị kiri ọkịarị sịkị ḅụ.

¹³Nweni kịẹn mị ḅie simeḅọ goyegoye, ini ḅi na gbẹịn nwọḅẹ igbiki ḅịpị mị nwọ gbẹịnḅịa, anị ini yetọnye se-tọn se anị la gbẹịn ḅara mị ọrụḅọḅọ anị gbẹịnḅịa, se mịẹḅaka agba mịẹ ị̀ pịrị ḅaraḅụ.

¹⁴Mịn nweni kịẹn mị ḅie ini kịẹnḅọ goyegoye, anị si kụra la pịkị anị ḅọrọḅọ goyegoye nụḅọ mịn igbiki mị se ị̀ gbẹịnḅịa.

¹⁵Ngọ kọnḅọ ḅe, ọ̀ gbẹịn nẹngịma ẹkẹ, igweinḅọ ḅe sọ, ọ̀ gbẹịn iderima ẹkẹ ini inia ḍumo ma gose mị igbiki mị gbẹịnḅịa sịkị ḅụ.

¹⁶Izrẹlapụma ḅara mị igbiki mị ọkị se anị se à pakaḅoḅo Ikowarị mị tẹlịma. Mịn igbiki mị inia ḍumo gose ini gbẹịnḅịa igbiki-ẹ, se à pịkị ini se ḅiekoroma se àrị agbọ sọ ini pịrịḅịa.

¹⁷Nyanaḅọ Ḅe nwọse Moziz ḅe ḅẹmẹ,

¹⁸“Alapẹlẹka se mengi chụaye mịẹ, anịa chuku sẹkẹye mị sọ alapẹlẹka se mịẹ. Anị se Ikowarị mị na agbamịẹ ẹbẹ mị na ogboku koroma, se mengi se anịa ḅie chụa.

¹⁹Erọn ḅe na oria owuapụ awọma na, ini se inia ḅarama na inia ḅụọma na sịkịrị-sịkịrịḅịa.

²⁰Ma ini Ikowarị mị ḅie sọmun anịkanịka ẹbẹ mị kpekima mun fịaye ḍiepịrị agba mịẹka simeogbo. Ini ọkọmịẹ ọkụma ini fịẹkẹ.

²¹Gbarịmaka ḅaraḅụ inia ḅarama na inia ḅụọma na ini sịkịrịḅịa, anị mịẹse ini fịẹkẹ. Mịn mị anị ini na, inia furo ḅie pakaḅoḅịa apụma na, koko gbasoḅịa oloko-ẹ.”

²²Nyanaḅọ Ḅe nwọse Moziz ḅe ḅẹmẹ,

²³“Kịrịkịrị ye kụnụmaye ma ḅụ iḅitẹịn aye nwọ ọkị—mengi mengi ḅara sime maah ḅụ inein-a loko ḅeinḅịaye, kụnụ ịkọmụ ḅụ mama loko,

²⁴pịkị kasia ḅụ inein-a loko ḅeinḅịaye (arịmgba yetọn tọn ḅara mị nwọse àrị tọn). Oliv pulo inein-a kongo se arịa ḅie chụa,

²⁵àrị se nweni-a tịḅị saraḅịa osi nyana pulo nwọ mịẹ, kụnụ olo gwa ḅara nwọse àrị gwa.

²⁶Anịse à pakaḅoḅo Ikowarị mị na, Ọḅọkụ Igbe mị na,

²⁷dẹbụl mị na anịa fịrịnwẹngịaye mamgba na, tọnjie gbanaye mị na anịaye ma na, insẹnsị dọkịma-dọkịmaḅịa ẹbẹ mị na,

²⁸ḍiepịrịaye dọkịma-dọkịmaḅịa agbamịẹ ẹbẹ mị na anịa fịrịnwẹngịaye mamgba na pịkị ḅụ-sịkịrị-mengi chụaye mị na anịa chuku na ḅụ tan.

²⁹Mịn ḅara mị seni ma ayema mịẹfịafịama, se àrị gbọtụma fịafịaḅịa, se tomoniḅọ anịkanịka jịnye ḅụse àrị lamamẹ ḅẹḅẹ, anị ye se nụḅọ lamaḅịa anịa fịafịa ḅara mị gose.

³⁰Anịsịkị pulo mị seni Erọn ḅe na oria owuapụ awọma na tịḅị sara, se ini seni ị̀ya fịrịnwẹngị-nwẹngịḅịa agbamịẹapụ nwọ mị-ẹ.

³¹Ḍuko Izrẹlapụma pịrị na, ‘Mịn fịafịa tịḅị sara pulo mị, anị sime ị̀ya fịrị nwọ pịrịmẹ ḅoḅịa sịkị mamgba ḅụ.

³²Papa apụ tịḅị ọgọnọ ị́ sara ẹkẹ. Anị-na-kịkịnaye pịkị nwọ mịẹ ma. Anị fịafịamẹ, anị gose fịafịa ḅara pịkị nwọse anị wẹrị.

³³Anị-na-kịkịnaye mịẹḅọ anịkanịka anị seni agbamịẹkaḅọ tịḅị ọgọnọ saraḅọ goyegoye nụḅọ ḅarị ị̀ya tomonima ḅie gbọrịḅọ nwọ sọẹkẹ.’”

³⁴Nyanaḅọ Ḅe nwọse Moziz ḅe ḅẹmẹ, “Ma kịrịkịrị ye kụnụmaye ḅụ gbọrịye gbọrịye, gbasị ḅaraḅụ nwọ ọkị—staktẹ na, onicha na, galbanum na, pịkị jokoma iḅi frankịnsẹnsị na.

³⁵Àrị se insẹnsị mịẹ, kụnụ olo gwa ḅara. Fụn se chụa mịẹso sịkị anị jokoma iḅi pịkị fịafịaḅịa.

³⁶Anịa ḅụye ọkị gbẹịn dẹkịdẹkịma se fọn mị ọkị se à pakaḅoḅo Ikowarị mị ḅie sọmun, Ọḅọkụ Igbe mị tọrọkọ anị pịsịrịma sara. Jokoma fịafịa insẹnsị ḅara ọ́ nwọ seni anị wẹrị.

³⁷Ma ayema ó se ḅarị anị kịkẹ insẹnsị nwọ mịẹ ọ́mịna ḅụ pịrịma. Fịafịa ḅụ sime ị̀ pịrịye-ẹ ḅe osi ḅara ọ́ nwọse anị wẹrị.

³⁸Anị-na-kịkịna olo mịẹḅọ goyegoye nụḅọ ḅarị ị̀ya tomonima ḅie gbọrịḅọ sọẹkẹ.”