Read kirikeni Pakaso 33 Bible Online

Pakaso 33 - kirikeni bible

Pakaso 33

¹Nyanaḅọ Ḅe nwọse Moziz ḅẹmẹ, “Mịnyọ ḅụ ó so, ị́rị́ na ị́ya tomoni, Ijipt ḅie ị́ ọkịpakụmaḅo apụma na, ó so à se Ebraham ḅe na, Aịzịk ḅe na, pịkị Jekọb ḅe na pịkị inia furoḅie pakaḅoḅịa apụma na karị ama mị mun.

²Tọrụ se ọ́mịna ḅụ wẹrịḅịa ị̀ya enjẹlḅọ à nwọse ọ́ sẹịnmaḅịa, à pịkị Kenan apụma na, Amọraị apụma na, Hitaị apụma na, Pẹrizaị apụma na, Hivaị apụma na, pịkị Jebus apụma na desinḅịa.

³Ó so ndo mengi na ḅẹịn na ḅein pịkị fịaye pakụma kiri mị nwọ mun. Ọkụma ị̀rị̀na-mịnaḅụ na àrị ómine na mun-ẹkẹ, anịatịḅị ómine kụrọtịḅịḅie nyana tomoni-ẹ, ḅụ ọbịka ọkụma àrị ineda ateliogbo ọ́ ḅaafamaḅịa.”

⁴Tomonima mịn mị naa sịkị ini sakị ngịrị se ḅarị ngịsị gbọrị yela pụkọchụaye na ḅerichụaye na ḅarachụaye na ḅirikẹ.

⁵Anịatịḅị Nyanaḅọ Ḅe, ọ̀ tọn Moziz ḅe pịrịsam na ò ḍuko ini pịrị na, “Ómine kụrọtịḅịḅie nyanapụ-ẹ. Ị̀rị̀ gbọrị kala sịkị kẹngẹ à nwọse ómine na mun ọkụma àrị ómine ḅaasinḅịa. Mịọkụ ọ́mịna yela ḅiriaye ma ó sin, se àrị ómine na kọnḅịa nwẹngị à nwọ nemiḅịa.”

⁶Anịẹrẹchị, ini Saịnaị Tụndụ mị ḅụ so sịkị, Izrẹlapụma ini ḅarị yela ḅiriaye ḅirikẹ.

⁷Izrẹlapụma ini mun lase inia ikowarịma pike ịnyọsara anga goyegoye, Moziz ḅe ori osiḅụ sime Ikowarị mị deki iḅiọkụma ini pike nyọ sikima mun koromaḅịa. Nyanaḅọ Ḅe pakaḅoḅo Ikowarị ini nwọse anị chịnmẹ, ye seni Nyanaḅọ Ḅe gbela ḅiḅọ goyegoye nụḅọ anịanga munḅịa.

⁸Moziz ḅe ọ̀ paka anịanga mun sịkị mun sịkị, tomonima inia ikowarị ḅọkọma ḅụ ini chịẹsime ọkịmun ori anịa ḅie sọsịkị lalamẹ.

⁹Moziz ḅe ori anịa ḅie sọsa ḅẹḅẹ soḅuno kpo mị, koroḅo Ikowarị mị ḅọkọ simeḅịa, anịsịkị, soḅuno mị ḅie mị Nyanaḅọ Ḅe ori ọkwẹịn Moziz ḅe pịrịḅịaye-ẹ.

¹⁰Tomonima ini Ikowarị mị ḅọkọ ḅụ soḅuno mị ọrị kirikiri ini tịḅịtuḅịa.

¹¹Nyanaḅọ Ḅe ò Moziz ḅe na tọrụ-na-dama-dama ọkwẹịnḅịa, ikiaḅọ ọkwẹịn nụḅọ ikiaḅọ pịrịọkụ simemẹ. Anịeso mị Moziz ḅe ọ̀ pịkịma inia ikowarịma sime anga ḅoḅịaye-ẹ. Ọkụma ḅarachụa ọ̀ pịrị asẹmẹnịḅọ Nọn ya Jọsụwa ḅe, Ikowarị mị ḅie omi-ẹ.

¹²Moziz ḅe nwọse Nyanaḅọ Ḅe ḅẹmẹ, “Karakaraye-ẹ, ị́ ḍuko ị̀ pịrịsam na à tọrọkọda mịna apụma se anị ama mị mun, ọkụma ị̀rị̀na-munḅịaḅọ ị́ ḍuko ị̀ pịrịkẹ. Ị́ ḍukosam ị́ iḅiọkụma ị̀ nemimẹ, ị̀ya mịẹmịẹye pịkị ị́rị́na-deinmẹ.

¹³Mịọkụ àrị ị́ ḅụ kọkọma ọkọsimemẹ ḅẹḅẹ, ị́ tọn se ị́ mịẹḅịa ayema ḍuko ị̀ pịrị mịẹsosịkị à fịrịnwẹngị ị́ pịrị pịkị pa ị́ ḅụḅẹlẹ aye mịẹmamun ḅịa ọkụ. Pịkị ḅiekoroma na, ị́ mị sẹ mị sẹlẹ ọkịsam ị́yaye ḅaraḅụ.”

¹⁴Nyanaḅọ Ḅe nwọ ḅẹmẹ, “Àrị ị́rị́na munḅịa, à pịkị ọmụḅaraiḅi se ị́ pịrịḅịa.”

¹⁵Moziz ḅe nwọ pẹkẹrẹmẹ, “Ị́ mine na mun-ẹkẹ ḅẹḅẹ ḅerenima wa mịnyọ wẹrịso.

¹⁶Nde tomoniḅọ nemiḅịa ọkụ na ị́ya tomonima ị́ ini ḅẹlẹmamẹ pịkị ị̀rị̀ sọnị, ị́ nemikase mine-na munka ọkụma? Ị́rị́ mine-na sime mị, anị wa seni kịrị apụ mịẹḅịa, sẹkiri ḅie sime ísí-a tomonima ḅụ.”

¹⁷Nyanaḅọ Ḅe nwọse Moziz ḅe ḅẹmẹ, “Ị́ ḅiḅara mị à nwọ mịẹḅịa, anịatịḅị àrị iḅiọkụma ị́ nemimẹ, ị́ya mịẹmịẹye pịkị ị̀rị̀ na deinmẹ.”

¹⁸Anịsịkị Moziz ḅe ḅimẹ, “Pasisi ye àrị ị́ya boma mị ọrị.”

¹⁹Nyanaḅọ Ḅe nwọ pẹkẹrẹmẹ, “À mịẹḅịa ị̀ya opu mị mgba ị́ tọrọkọ ḅọrọ, à pịkị ị́ tọrụkuḅu ị̀ya osi nyana ẹrẹ mị ḍukopakụmaḅịa. Ị̀rị̀ anị Nyanaḅọ Ḅe-ẹ, à sẹlẹọkịsa apụma à ḍikitịḅịfoin na pịkị ḅarachụa na nwọ nyana ini pịrịpịrịmẹ.

²⁰À ḅi-ẹkẹ ị́ ị̀ tọrụ ọrị, anịatịḅị ị̀ tọrụ ọrị se ḍumoḅịaḅọ ofori-ẹ,

²¹ọkụma ị̀ anga sịkị ị́ ḍụparị ọgọnọ chịẹḅịa nyọ omi-ẹ.

²²Ị̀ya ḅoma mị ḅọrọḅịa sịkị, àrị ị́ se ḍụparị opokolo ḅie chu se ị̀ ḅara se ị́ gbẹịn se à ḅọrọso sịkị laḅịa.

²³Anịsịkị àrị ị̀ ḅara sinḅịa se ị̀ ọḅụ mị ị́ ọrịḅịaye-ẹ, ọkụma ị̀ tọrụ mị kẹ.”