Read kirikeni Pakaso 37 Bible Online

Pakaso 37 - kirikeni bible

Pakaso 37

¹Bẹzalẹl ḅe, ọjị chịn ọ̀ nwọse Ọḅọkụ Igbe mị mịẹmẹ, anịa ịsụn mị tẹrẹ-a ḅụọ na opu pẹkẹrẹ na-ẹ, finji mị mama ḅụọ na kala pẹkẹrẹ na-ẹ, anịa gele mị pịkị mama ḅụọ na kala pẹkẹrẹ na-ẹ.

²Jokoma goli ọ̀ nwọse anịa ḅie na oju mị mgba na oḅolomẹ, ọ̀ pịkị goli se aka ma mangị kelemamẹ.

³Seni anị dekidekiḅịa inein-a goli se mịẹ kelekele aye ọ̀ nwọ mịẹ anị pịrịmẹ, ori àrị seni anịa inein-a ḅụọma ḅụ chụamẹ, kelekele ayema ḅụ maịn gbọrị ịkọlị, gbọrị ịkọlị ḅụ.

⁴Ọjị chịn ọ̀ nwọse àrị dekidekiḅịaye mịẹmẹ, pịkị goli se àrị oḅolomẹ,

⁵ori àrị se Igbe mị ḅụ kelekele ayema ḅie tolumamẹ gbọrị ịkọlị, gbọrị ịkọlị ḅụ se anị dekiḅịa gose.

⁶Jokoma goli se oḅolo ḅịpịgbẹịnye ọ̀ nwọ mịẹ anị pịrịmẹ, anịa ịsụn tẹrẹ-a ḅụọ na opu pẹkẹrẹ lamẹ, anịsịkị finji mị mama ḅụọ na kala pẹkẹrẹ lamẹ.

⁷Ini iḅiọkụma ḅakụ goli ọ̀ nwọse mama enjẹlapụ tẹmẹmẹ,

⁸gbọrịwu gbọrị ịkọlị, gbọrịwu gbọrị ịkọlị, ḅịpịgbẹịnye mị ọgọnọ ọ̀ nwọse koromamẹ.

⁹Ḅịpịgbẹịnye mị ọgọnọ ḅụ sime enjẹlapụma àrị tọrụ se jịnye jịnye damẹ pịkị arịa pamba ma finjima anị gbẹịnmẹ.

¹⁰Ọjị chịn ọ̀ nwọse dẹbụl mị mịẹmẹ, anịa ịsụn mị tẹrẹ-a ḅụọ, finji mị gbọrị ḅụọ na pẹkẹrẹ-ẹ, anịsịkị anịa gele mị mama ḅụọ na pẹkẹrẹ na-ẹ.

¹¹Jokoma goli ọ̀ nwọse anị oḅolomẹ, ọ̀ pịkị goli seni aka ma mangị kelemamẹ.

¹²Finji ḅarakuḅu na gbasịka ye ọ̀ nwọ mịẹ anị kelemamẹ, pịkị goli se anịa aka mangị ḅọrọmamẹ.

¹³Ye dekiḅịa goli goli kelekele aye ọ̀ nwọ mịẹ anịa inein-a ịkọlị ma ḅụ chụamẹ, anịa ḅụọma sime anga.

¹⁴Chịn ma se toluma se dẹbụl mị dekiḅịa kelekele ayema, ò se dẹbụl mị ḅụ mangị ḅọrọmaye mị na kpekima chụamẹ.

¹⁵Ọjị chịn ọ̀ nwọse dẹbụl mị dekidekiḅịa chịnma mịẹmẹ, pịkị goli se àrị oḅolomẹ.

¹⁶Jokoma goli ọ̀ nwọ seni yefịaye mịẹ dẹbụl mị pịrịmẹ: se yefịfịḅịa panị na, ọmọngọ na, ojongo na, pịkị ini se ḍiepịrịaye agbamịẹḅịa iru chụachụaḅịa bọlị ma na, arịmgba jokoma goli ọ̀ nwọse àrị mịẹmẹ.

¹⁷Tọnjie gbanaye mị jokoma goli ọ̀ nwọse anị mịẹmẹ. Anịa chuku sẹkẹye mị na ọḅụ mị na, ini ḅakụ-patalamasa goli ọ̀ nwọse àrị mịẹmẹ; ò seni anị ḅirima ngwengwe mị na, ngwengwe mị ḅụ sẹnịpakarị ịkpangị ma na, pịkị ḅịpịtolumarị ịnyanya ma na, arịmgba gbọrịḅụ omi-ẹ.

¹⁸Sonio-a ịkpangị anịaḅụ omi-ẹ, tẹrẹ-a ịkpangị gbọrị ịkọlị, gbọrị ịkọlị ḅụ.

¹⁹Sonio-a ịkpangị ma, ịmụnụ chịn ọkụ simeye arịa ịkpangị ma ḅụ pakaḅomẹ, anịa ịnyanya ma gbọrị ịkpangị, gbọrị ịkpangị ḅụ omi-ẹ.

²⁰Tọnjie gbanaye mị ọgọnọ ḅụ ịmụnụ chịn ọkụ sime inein-a ọmọngọ omi-ẹ, arịa ịkpangị ma ịwọma paka àrị ngwengwe àrị nwọ nyanamẹ.

²¹Maịn gbọrịḅụ sime tatarị ịkpangị ḅịpị tolumarị ịnyanya, gbọrịye gbọrịye maịn maịn gbọrịḅụ sime ịkpangị ma chuku ḅie omi-ẹ.

²²Ḅịpị tolumarị ịnyanya ma na, ịkpangị ma na ini ḅakụ patalamasa goli ọ̀ nwọse gbọrịḅụ àrị mịẹmẹ.

²³Sọnọma tọnjie ọ̀ nwọ mịẹ tọnjie gbanaye mị pịrịmẹ, anyị koko ayema na, ye dekiḅịa sẹrẹrẹye ma na, jokoma goli ọ̀ pịkị nwọse àrị mịẹmẹ.

²⁴Tọnjie gbanaye mị na, anịa fịrịnwẹngị ayema na, jokoma goli sọnọfa-okpokpo-a mesi ọ̀ nwọse àrị mịẹmẹ.

²⁵Ọjị chịn ọ̀ nwọse insẹnsị dọkịmaḅịa ẹbẹ mịẹmẹ. Anịa inein-a ịkọlị ma gbasịmẹ; ịsụn mị gbọrị ḅụọ na pẹkẹrẹ, finji mị pịkị gbọrị ḅụọ na pẹkẹrẹ, anịsịkị anịa gele mị tẹrẹ-a ḅụọ-ẹ. Anịa ḅụ ọ̀ chụa pakụma ịkpangị ma na inein-a ịkọlị ma na gbọrịḅụ simemẹ.

²⁶Anịa ọgọnọ na, inein-a ịkọlị ma na, ọ̀ chụa pakụma ịkpangị ma na, jokoma goli ọ̀ nwọse àrị oḅolomẹ, ọ̀ pịkị goli seni anịa aka mangị ḅọrọmẹ.

²⁷Goli goli mama kelekele yepụra aye ọ̀ nwọ mịẹ anị pịrịmẹ, ori àrị se anịa aka ma ḅụ mangị ḅọrọ ye mị chuku mama ịkọlị ma ḅụ chụamẹ, ini se anị dekiḅịa chịnma ọlọḅịa gose.

²⁸Ọjị chịn ọ̀ nwọse anị dekichịẹma chịnma mịẹmẹ, ọ̀ pịkị goli se àrị oḅolomẹ.

²⁹Ọ̀ pịkị osi ḅụsime tịḅị kiri sara pulo mị na, insẹnsị mị na gwa gbolomamẹ, anịḅo kụnụ olo kịkẹmẹ.