Read kirikeni Pakaso 39 Bible Online

Pakaso 39 - kirikeni bible

Pakaso 39

¹Bulu bulu na, awụwụ na, pịkị pulo-pulo wulu na mị ini se agbamịẹapụma, ini sọmun Fịafịa Nyọ mị ḅie fịrịnwẹngịḅịa sịkị ini chụachụaḅịa iḅi-a ḅụchụayema gbinye-ẹ. Erọn ḅe, oria agbamịẹḅọ ḅụchụaye mị, Nyanaḅọ Ḅe tọn Moziz ḅe pịrị ọkụ anị ini anị gbin ọkụ-ẹ.

²Ifọd mị, iḅi lọkọ ḅịtẹ na bulu bulu na awụwụ na pulo-pulo wulu na goli goli iri na ini nwọse anị gbinmẹ.

³Ini goli ḅakụ patalama se ḍọkọḍọkọma ḍiki ḅara se àrị pu, se àrị seni iḅi lọkọ ḅịtẹ mị na bulu bulu mị na awụwụye mị na pịkị pulo-pulo wulu mị na nwọ gwa ḍori gbolomamẹ.

⁴Mama aba sara ḍiki ini nwọ mịẹ ifọd mị pịrịmẹ, se ini anị seni mama pẹkẹrẹ ma ḅụ oḅolomẹ mịẹsosịkị anị kụrọma simeḅịa ọkụ.

⁵Anị gbọrịye ḅirimaye mị, ini nwọse iḅi ḅiri kunye mịẹ ifọd mị ḅụ chumẹ mịẹse àrị gbọrịḅụ simeḅịa ọkụ, anị Nyanaḅọ Ḅe tọn Moziz ḅe pịrị ḅaraḅụ.

⁶Yela ḍụparị ini nwọse goli na gwa se kpaịnma Jekọb oyimaịn owuapụ awọ fịnjịma ẹrẹ ma chụamẹ.

⁷Ini àrị seni ifọd ma ḅụ chụamẹ, se Izrẹl oyimaịn sẹ fịnjịma ḍiepakụma gose, anị Nyanaḅọ Ḅe tọn Moziz ḅe pịrịsa ḅaraḅụ.

⁸Ekpe gbẹịnye mị, ini se ifọd mị mịẹ gbọrịaye ma ini pịkị nwọse anị mịẹmẹ, pịkị anị gbọrị ḅara mị se anị ḅirimamẹ.

⁹Anịa inein-a ịkọlị ma gbasịmẹ, seni mama ḅụ ikomẹ, ịsụn mị kalaye ofori gbọrị ḅụọ, finji mị pịkị kalaye ofori gbọrị ḅụọ-ẹ.

¹⁰Yela ḍụparị ini nwọse anịaḅụ inein-a-ọrụrụḅụ chụamẹ: tatarị ọrụ mị ḅie gbọrị rubi na, tọpaz na, ganẹt na;

¹¹maịn karama ọrụ mị gbọrị ẹmẹrald na, sapfaịya na, daịmọn na;

¹²tẹrẹ karama ọrụ mị ḅie pịkị gbọrị tọkwọịs na, aget na, ametist na;

¹³anịsịkị inein karama ọrụ mị, gbọrị bẹril na, kanelian na, jaspa na. Ma ayema ini àrị seni goli goli yekokoye ḅie chụamẹ.

¹⁴Ma oyimaịn fịnjị yela ḍụparịma ḅụ, Jekọb ḅe oria oyimaịn owuapụ awọ fịnjịma ẹrẹ ma, gbọrị ḍụparị ḅụ gbọrị ẹrẹ gbọrị ẹrẹ ini nwọ chụamẹ, seni Izrẹl oyimaịn sẹ fịnjịma nemi gose.

¹⁵Ekpe gbẹịnye mị ini goli seni ḍiki ḍori ọkụ nwọ seni ḍọkọḍọkọ ikoli ḍori anị pịrịmẹ.

¹⁶Ini goli goli mama yekoko aye na pịkị mama goli goli kelekele aye na mịẹmẹ, se ini goli goli mama kelekele ayema se mun ekpe gbẹịnye mị ọgọnọju ịkọlị mị ḅụ chumẹ.

¹⁷Ini goli se ḍori ḍọkọḍọkọ ikoli ma ini nwọ seni mama goli goli kelekele ayema ḅụ kpọ kụrọmamẹ

¹⁸se ini ḍọkọḍọkọ ma goli se ḍori ísí mama ḅịpị ma seni goli mama yekoko ayema ḅụ kpọ mẹ, mị ḅara, mị ini se anị se mun ifọd mị tọrọkọḅụ aba-sara-ḍiki ma ḅụ sọmẹ.

¹⁹Ini goli se mama kelekele aye mịẹmẹ, se àrị seni ekpe gbẹịnye mị ḅụ chuku da ịkọlị ma ḅụ chumẹ, ḅie ḅụ chuku daọrụ anị ifọd mị aka ḅụ na kpeki pẹkẹrẹ mị.

²⁰Ini pịkị goli se jịn mama kelekele aye mịẹmẹ, ini àrị seni ifọd mị ḅụ tọrọkọ aba-sara-ḍiki ma ḅụ, chuku daọrụ ḅụ chumẹ, anị ini iḅiḅara se ḍori ḅirikunye mị ọgọnọ ọrụ ḅụ.

²¹Nyanaḅọ Ḅe tọn Moziz ḅe pịrịsa ḅaraḅụ, ini bulu bulu se ḍori ḍiki ini nwọse ekpe gbẹịnye mị ḅụ sime kelekele ayema na ifọd mị ḅụ sime kelekele ayema na kpọmẹ, anị mị mịẹse ekpe gbẹịnye mị, anị ḅirikunye mị ọgọnọ ọrụ ḅụ simemẹ se ḅarị vọkọrọvọkọrọ ẹka ḅara.

²²Ifọd mị chuku ḅie sime opu-koro ḅụchụaye mị, bulu bulu wulu anị ini se anịmgba gbinye-ẹ.

²³Tịḅị-tolu ḅọrọḅịa ḅụchụaye kọngọ mị ḅụ, ini ḅakama kụrọ aye ḍori anị kelekelemẹ anị kan ẹkaye gose.

²⁴Anịa chuku mị mgba kanakoro iḅi lọkọ ḅịtẹ, bulu tọrụ na, awụwụ tọrụ na, pulo-pulo wulu na ini nwọse mgbafa ḍorimẹ se ini jokoma goli se tẹmẹ ḍọkọḍọkọ-a gbomu se àrị na gwagwa koro-opu-ḅụchụaye mị chuku ḅirima kelemamẹ, Nyanaḅọ Ḅe tọn Moziz ḅe pịrịsa ḅaraḅụ.

²⁷Ini ḅụchụaye gbin Erọn ḅe na oria owuapụ awọma na pịrịmẹ,

²⁸tịḅị fịna kelema opu ḅịtẹ na, chu na, pịkị-lọkọ-ḅịtẹ kpụlụ tumochụaye na,

²⁹bulu bulu na awụwụ na, pịkị pulo-pulo wulu se ḅirima abagbana opu-lọkọ-ḅịtẹ na ini nwọ gbin ini pịrịmẹ, anị Nyanaḅọ Ḅe tọn Moziz ḅe pịrịsa ḅaraḅụ.

³⁰Osiḅụ simeye elekima ḅaraḅụ, jokoma goli ini nwọse yeḅirimaye mị mịẹmẹ, anịaḅụ ini nwọ gịẹịnmẹ, “Osiḅụ sime Nyanaḅọ Ḅe pịrịmẹ.”

³¹Bulu se ḍori ḍiki ini nwọse ḅịtẹ chu mị fụḅara kpọmẹ, anị Nyanaḅọ Ḅe tọn Moziz ḅe pịrịsa ḅaraḅụ.

³²Nyanaḅọ Ḅe pakaḅoḅo Ikowarị mị, anịa fịrị mamgba ini nwẹngị famasam. Izrẹlapụma, Nyanaḅọ Ḅe ọ̀ tọn Moziz ḅe pịrị ọkụ anị ini fịrị goyegoye nwẹngị ọkụ-ẹ.

³³Ikowarị mị na anịa fịrịnwẹngị aye mamgba na ini se ḅo Moziz ḅe pịrịmẹ, yesụkaye ma na, ḅọkọ-a chịnma na, ochu-sara-ọkọḅọ ma na, anịa ogbochịnma na arịa chuku sẹkẹaye ma na;

³⁴ini pulo-puloye se bile yegbẹịn ajirima na oḅori nama oju apụra ma na, yegbẹịn iḅi nama oju apụra ma na, nyọ kikima opu ḅịtẹ mị na;

³⁵oyi olokoma ḅie sime Ọḅọkụ Igbe mị na anịa chịnma na ḅịpị gbẹịnye mị na;

³⁶dẹbụl mị na anịa fịrịnwẹngịaye mamgba na pịkị ini se ḍiepịrịaye agbamịẹ Tamụnọ Ḅe pịrị fịturu mị na;

³⁷jokoma goli tọnjie gbanaye mị na, anịa tọnjie ma na, anịa fịrịnwẹngịaye mamgba na, pịkị tọnjie pulo na;

³⁸goli goli ẹbẹ mị na, tịḅị-kiri-sara-saraḅịa osi nyana pulo mị na, insẹnsị mị na, Ikowarị ḅọkọ kikima ḅịtẹ mị na;

³⁹alapẹlẹka ẹbẹ mị na, anị kelema alapẹlẹka gbasa ma na, chịnma na, pịkị anịa fịrịnwẹngị aye mamgba na; ḅụ-sịkịrị mengi chụaye mị na anịa chuku sẹkẹye mị na;

⁴⁰ogbokiaye ma ḅọkọ kikima ḅịtẹma na ogbochịnma na, arịa chuku sẹkẹ ayema na, ogbokiaye mị ḅe ḅọkọ kikima ḅịtẹ mị na ḍiki ma na, Ikowarị ini se nwọ kakịḅịa ikiḅa chịnma na, ini se Ikowarị mị ḅie fịrịnwẹngị nwẹngịḅịaye mamgba na;

⁴¹pịkị agbamịẹapụma Fịafịa Nyọ mị ḅie chụachụaḅịa iḅi-a ḅụchụayema na, anị agbamịẹḅọ Erọn ḅe na oria owuapụ awọma na.

⁴²Izrẹlapụma, Nyanaḅọ Ḅe tọn Moziz ḅe pịrị ḅara goyegoye ini nwọse fịrị mị nwẹngịmẹ.

⁴³Moziz ḅe, ò yegoyegoye pekele ḍikimẹ se ori ọrịmẹ na Nyanaḅọ Ḅe tọn ḅara anị ini se fịrị mị mgba nwẹngị ọkụ-ẹ. Anịgose Moziz ḅe ini ḅẹlẹmamẹ.