Read kirikeni Pakaso 4 Bible Online

Pakaso 4 - kirikeni bible

Pakaso 4

¹Anị Moziz ḅe nwọse Nyanaḅọ Ḅe pẹkẹrẹye-ẹ, “Ọkụma nemikase Izrẹlapụma à ḍukoye mị ḅerenika pịkị ị̀ poki ḍụkụka ọkụma. Nde à mịẹḅịa ọkụ, ini nemikase nwọḅẹ na ị́ ḅụḍiepakụma ị̀ pịrịkẹ nwọḅẹ ọkụma?”

²Anị Nyanaḅọ Ḅe nwọse ọ̀ gbelaye-ẹ, “Cheye ị́ nwọ ọlọ ị́ ḅara ḅie?” Ọ̀ pẹkẹrẹmẹ, “Amgbara-ẹ.”

³Nyanaḅọ Ḅe nwọ ḅẹmẹ, “Anị se kiri gbin.” Moziz ḅe ori anị se kiri gbin sịkị anị ḍin oruwu sọmẹ, anị ori anị koroma mangị sikimaye-ẹ.

⁴Anị Nyanaḅọ Ḅe nwọse Moziz ḅe ḅẹye-ẹ, “Tu tumo mị ḅụ wẹrị anị deki.” Anị Moziz ḅe ò tu tumo juḅụ anị deki sịkị, anịḅo pịkị amgbara sọmẹ.

⁵Nyanaḅọ Ḅe nwọ ḅẹmẹ, “Mịn mị mịẹ se Izrẹlapụma ḍie na Nyanaḅọ, anị inia ḅieju-aḍapụ Ebraham ḅe na, Aịzịk ḅe na pịkị Jekọb ḅe na Tamụnọ Ḅe ori ọ̀ ḅụḍiepakụma ị́ pịrịsam.”

⁶Nyanaḅọ Ḅe pịkị nwọse Moziz ḅe ḅẹmẹ, “Ị́ ḅara se ị́ya ḅụchụaye ḅie chu.” Moziz ḅe ḅịpịpoki ḅụ ori ọkọ mịẹmẹ, se ori ọ̀ ḅarasin pakụmaḅo sịkị, ḅụkan obi anị lasam, sino ḅịa ọkụ.

⁷Anị Nyanaḅọ Ḅe nwọse ọ̀ ḅẹye-ẹ, “Pịkị ị́ ḅara mị se ị́ya ḅụchụaye mị ḅie chu.” Ori ọkọ mịẹmẹ, se anịsịkị ori anị sin pakụmaḅo ọkụma, anịmgba iḅisam, oria ojukiri mị sime ọkụ anị anị pịkị simesa ọkụ-ẹ.

⁸Nyanaḅọ Ḅe nwọ ḅẹmẹ, “Nemikase tatarị ḅụgbiripumaye mị ḅụ ini ị́ ḍukoye mị ḅerenikẹ anịkanịka anị pịkị inia ḅụokorokẹ nwọ ḅẹḅẹ, mị maịn karamaye mị inia ḅụokoroḅịa.

⁹Nemikase mịna mama ḅụgbiripumaye ma ḅụ sọnị ini pa ị́ ḍukoye mị ḅerenikẹ, pịkị ị́ ḍukoye mị poki ḍụkụkẹ ḅẹḅẹ, anịọkụma, Naịl tọrụ mị ḅie mengi nwọ ḍu se kiri ọgọnọ sara. Mengi mị anị ḍinmaḅo tomoni pulo sọḅịa.”

¹⁰Ọkụma Moziz ḅe nwọ ḅẹmẹ, “Ẹn-ẹn, Nyanaḅọ, ị̀ fịrịmama. Ị̀rị̀ ọkwẹịn ḍinḅọkẹ, ị́ nwọ ọkwẹịn ị̀ pịrị sịkị ngịsị ḅo nwọ la sọnị ma à pa ineda ọkwẹịnkẹ. À gaịn-gaịnma ọkwẹịn ḍinkẹ anịatịḅị à ḅapuromẹ.”

¹¹Nyanaḅọ Ḅe nwọse ọ̀ ḅẹmẹ, “Tụḅọ ḅịpị seni tomoniḅọ ḅe pịrị? Tụḅọ mịẹse ori iniki anịkanịka ḅịpị iniki kọn? Tụḅọ mịẹse ò ye ọrị anịkanịka tọrụmgbọlụ pụn ḅụ sime? Ị̀rị̀ Nyanaḅọ Ḅe-ẹ.

¹²Mịọkụ, somun! À ḅarachụa ị́ pịrị se ị́ ọkwẹịnḅịa, à pịkị ị́ ḍukoḅịaye mị nwọ ḍuko ị́ pịrịḅịa.”

¹³Ọkụma Moziz ḅe nwọ pẹkẹrẹmẹ, “Ẹn-ẹn, Nyanaḅọ, pasisi jịnḅọ fịrịma.”

¹⁴Mịn mị anị Nyanaḅọ Ḅe mịẹse ò Moziz ḅe ḅụ ịganị nyana se nwọse ọ̀ ḅẹmẹ, “Ị́ mbire Erọn, Livaị furo ḅọ ḅe kwanị? À nemimẹ na ori ineda iḅiọkụ gaịn-gaịnma ọkwẹịnḅịa. Mịọkụ ò ḅo ị́rị́ na ịrịa-ẹḅoaḅẹ, ò ḅie pịkị opuma ḅẹlẹḅịa ori ị́ ọrịḅịa sịkị.

¹⁵Ị́ ineda ọkwẹịn ọ̀ pịrịḅịa se pịkị ò ḍukoḅịaye nwọ ḍuko ọ̀ pịrịḅịa. À ḅarachụa ómine mama apụma pịrị se ómine ọkwẹịnḅịa, àrị ọ́ mịẹḅịa ọkụ ḍuko ọ́ pịrịḅịa.

¹⁶Ori ị́ya ọkwẹịn mị daḅọrọmaḅọ sọḅịa, se ị́ya ẹrẹ ḅụ ori ọkwẹịn tomonima pịrịḅịa. Anịsịkị ị́rị́ ị́ Tamụnọ ḅara simeḅịa, se ori ọkwẹịnḅịaye ị́ nwọ ḍuko ḍuko ọ̀ pịrịḅịa.

¹⁷Mị amgbara mị ọkị chụa mun; anịatịḅị ị́ anị seni ḅụgbiripumaye mịẹḅịa.”

¹⁸Moziz ḅe ọ̀ pịkịma so oria ogoḅọ tarọ ma ḍa Jẹtro ḅe damamun se nwọse ọ̀ ḅẹmẹ, “Pasisi ye à pịkịma somun Ijipt ḅie ị̀ya mịnapụma ḍiki, nwọfa ini pa ḍumo wara-otuḅo.” Jẹtro ḅe ò ḅereni ọ̀ pịrị se nwọse ọ̀ ḅẹmẹ, dein na mun.

¹⁹Moziz ḅe ọ̀ pa Midian ḅie simearịogbo, Nyanaḅọ Ḅe nwọse ọ̀ ḅẹmẹ, “Pịkịma so Ijipt mun, anịatịḅị ị́ ḅaa ḍọkịarịapụ mamgba ini fịsam.”

²⁰Anị Moziz ḅe ọ̀ tarọ ma na oria owuapụ awọma na nwọ ọkị, se ini seni yepụra asụn ọgọnọ gbana, se Tamụnọ Ḅe ọ̀ ḅe na deki nwọḅẹ amgbara mị ọkị, seso Ijipt mun ye-ẹ.

²¹Nyanaḅọ Ḅe pịkị nwọse Moziz ḅe ḅẹmẹ, “Mịọkụ ị́ nwọ so Ijipt mun-arị sịkị, ọrị na à kụrọ se ị́ pịrị na mịẹ nwọḅẹ ḅụgbiripumaye mamgba ị́ àrị mịẹmẹ, amanyanaḅọ ḅe tọrọkọ ḅụ. Ọkụma à mịẹse amanyanaḅọ ḅe ori ininachịnḅịa, se ò ḅereni ẹkẹ tomonima ini so.

²²Anịsịkị ị́ ḍuko ọ̀ pịrịḅịa na Ị̀rị̀, Nyanaḅọ Ḅe nwọḅẹmẹ, ‘Izrẹl ḅe anị ị̀ya tatarị owutọkụ-ẹ.

²³Àrị ị́ ḅẹmẹ na ị̀ya tọkụ ḅe wẹrịso ò ḅo ị̀ tẹkẹ, ọkụma ị́ ḍụkụkẹ. Mịọkụ, à mun ị́ya tatarị owutọkụ ḅe ḅaa-ẹmun-aḅẹ.’”

²⁴So Ijipt mun-arị ateli mị ḅie ḅụ ini pike sime warịma anga ḅụ, Nyanaḅọ Ḅe ò Moziz ḅe na ịrịamẹ, se ori ọ̀ ḅaa-ẹtọnmẹ.

²⁵Anị tarọ Zipọra ma, oḅu ḍụparị deki seni árịa tọkụ ḅe ḅụpẹlẹ se, anị seni Moziz ḅe ḅụọma lamaye-ẹ. Ḅụpẹlẹ mịẹmịẹye mị gose á nwọse Moziz ḅe ḅẹmẹ, “Ị́ tomoniḅọ pulo deḅọ sọ ị̀ pịrịsam.” Anịẹrẹchị Nyanaḅọ Ḅe Moziz ḅe ḍumo mị wẹrịso ọ̀ pịrịmẹ.

²⁷Mịọkụ Nyanaḅọ Ḅe nwọse Erọn ḅe ḅẹmẹ, “So onwun ele mị ḅie mun Moziz ḅe na ịrịa.” Anị ò somun fịafịa tụndụ mị anga ḅụ ori na ịrịaye-ẹ; ò ḅo ori na ịrịa sịkị ori ọ̀ ḅịpị nọnjụ mẹ.

²⁸Anịsịkị Moziz ḅe Nyanaḅọ Ḅe ọ̀ ḅẹ na ò pịkịmaḅo so Ijipt mun nwọ ḅẹ sịkị ḅụ ò ḍuko ọ̀ pịrịaye mamgba nwọ ḍuko seni Erọn ḅe pịrịmẹ; ọ̀ pịkị Nyanaḅọ Ḅe tọn ọ̀ pịrị na ọ̀ mị-ẹ nwọḅẹ ḅụgbiripumaye ma ḍuko ọ̀ pịrịmẹ.

²⁹Anị ḅụ Moziz ḅe na Erọn ḅe na ini so Ijipt mun mẹ, se ini Izrẹl mị ḅie sime-a tịḅịnị mamgba chịn koḅirimamẹ.

³⁰Erọn ḅe, Nyanaḅọ Ḅe se Moziz ḅe ḅẹye mamgba nwọ ḍuko ini pịrịmẹ, anịsịkị Moziz ḅe ò tomonima tọrọkọ ḅụ ḅụgbiripumaye ma pịkị nwọ mịẹmẹ.

³¹Ini ḅerenimẹ, iniḅo naa na Nyanaḅọ Ḅe ò koroḅosam, na ini seni ini na kọn àrị si anga mị sọnị ori ọrịsam nwọḅẹ sịkị, ini tịḅịtu se tẹkẹmẹ.