Read kirikeni Pakaso 40 Bible Online

Pakaso 40 - kirikeni bible

Pakaso 40

¹Nyanaḅọ Ḅe nwọse Moziz ḅe ḅẹmẹ,

²“Tatarị akalụ mị ḅie ngei ene mị ḅụ, Nyanaḅọ Ḅe pakaḅoḅo Ikowarị mị chịẹma.

³Oyi Olokoma ḅie sime Ọḅọkụ Igbe mị se anịa ḅie chụa, anịsịkị ḅọkọ-kikima-ḅịtẹ mị se anịa tọrọkọ sụka.

⁴Dẹbụl mị ọkịḅo ḅie chu, se fịrịnwẹngị ayema seni anị ọgọnọ koroma. Pịkị tọnjie gbanaye mị ọkịḅo ḅie chu, se tọnjie ma chụa anị ọgọnọ chịẹma.

⁵Insẹnsị mị anịa goli goli ẹbẹ mị ọkịḅo Ọḅọkụ Igbe mị tọrọkọ koroma, se nyọkikima-ḅịtẹ mị se Ikowarị ḅọkọ mị ḅụ sụka.

⁶Ḍiepịrịaye agbamịẹ aye dọkịma-dọkịmaḅịa ẹbẹ mị ọkịḅo ḅie chu, anị seni Ikowarị mị tọrọkọ koroma.

⁷Ḅụ-sịkịrị mengi chụa panị mị se ḅie chu, anị se Ikowarị mị na, ẹbẹ mị na ogboku koroma, mengi seni anịa ḅie chụa ḅeinma.

⁸Nyọ mị ogbokia kelema; se ḅọkọ-kikima-ḅịtẹ mị se ḅọkọ mị ḅụ sụka.

⁹“Osiḅụ sime olo mị se Ikowarị mị na anịa fịrịnwẹngịaye mamgba tan se anị mịẹ fịafịama osiḅụ wẹrị, se anị fịafịaḅịa.

¹⁰Jịnye, ẹbẹ mị na anịa fịrịnwẹngịaye mamgba na mịẹ fịafịama pulo se àrị tan, se àrị ḅo kọkọma fịafịa.

¹¹Pịkịna anị gbọrị ḅara mị se ḅụ-sịkịrị mengi chụa panị mị na chuku sẹkẹye mị na mịẹfịafịama.

¹²“Erọn ḅe na oria owuapụ awọma na ọkị Ikowarị mị ḅọkọ ḅo, ini mịẹ ini ḅụ-fịafịama mengi ḅiri.

¹³Agbamịẹḅọ ḅụchụaye mị se Erọn ḅe ḅirima, pulo se ọ̀ tịḅị sara, se mị ḅaraḅụ ọ̀ mịẹfịafịama, mịn mị mịẹse ori ineda agbamịẹḅọ ḅara seni fịrịnwẹngị ị̀ pịrịḅịa.

¹⁴Oria owuapụ awọma se ḅo se ḅụchụayema seni ini chụa.

¹⁵Pulo se inia tịḅị sara anị ị́ inia ḍaḅe mịẹ ọkụ mị, mị ini mịẹḅịa ọkụ-ẹ ini agbamịẹapụ sọḅịa ḅoḅịa sịkịmamgba ḅụ.”

¹⁶Moziz ḅe, Nyanaḅọ Ḅe tọnye goyegoye ọ̀ mịẹmẹ.

¹⁷Anịẹrẹchị ini Ijipt wẹrịso maịn karama kụra mị ḅie tatarị akalụ mị ḅie ngei ene ḅụ, Nyanaḅọ Ḅe pakaḅoḅo Ikowarị mị ini nwọ chịẹmamẹ.

¹⁸Moziz ḅe, anịa chuku sẹkẹ ayema ọ̀ nwọ koromamẹ, se ọ̀ chịnma chịẹmamẹ, ò ḅo ọkọḅọ ma saramẹ, anịsịkị anịa ogbochịnma ọ̀ pịkị nwọ chịẹmamẹ.

¹⁹Ori Ikowarị mị gbẹịnḅịaye mị finjima anị gbẹịnmẹ, ọ̀ pịkị jịnye se anị ọgọnọ gbẹịnmẹ anị Nyanaḅọ Ḅe, tọn Moziz ḅe pịrị ḅaraḅụ.

²⁰Anịsịkị oyi olokoma ḅụ gịẹịn mama ḍụparị pẹkẹrẹ ma ọ̀ nwọ ọkịḅo se Ọḅọkụ Igbe mị ḅie chụamẹ. Chịn ma ọ̀ nwọse Igbe mị ḅụ sime kelekele ayema ḅie toluma ḅọrọmẹ, se ḅịpịgbẹịnye mị ọ̀ nwọse anị ọgọnọ gbanamẹ.

²¹Ori Igbe mị se Ikowarị mị ḅie chumẹ, se ọ̀ ḅọkọ-kikima-ḅịtẹ mị, seni ḅọkọ ḅụ sụkamẹ. Mịn ḅara mị ḅụ ori Ọḅọkụ Igbe mị kikima mẹ, Nyanaḅọ Ḅe tọnsa ḅaraḅụ.

²²Ọ̀ dẹbụl mị ọkịḅo Ikowarị mị ḅie chumẹ, nyọ-gbẹịn-ḅịtẹ mị ḅụ-wẹrị-sikima ọgọnọ daọrụ ḅụ,

²³ini se Nyanaḅọ Ḅe pịrị ḍiepịrịye agbamịẹ fịturu mị ọ̀ nwọse anị ọgọnọ gbanamẹ, anị Nyanaḅọ Ḅe tọnsa ḅaraḅụ.

²⁴Ọ̀ tọnjie gbanaye mị se Ikowarị mị ḅie chuku daọrụ ḅụ chumẹ, anị dẹbụl mị na damadamamẹ,

²⁵se anịnyọ, Nyanaḅọ Ḅe tọrụkuḅu, ọ̀ tọnjie ma chụamẹ, anị Nyanaḅọ Ḅe tọnsa ḅaraḅụ.

²⁶Goli goli ẹbẹ mị, ò se Ikowarị mị ḅie ḅọkọ-kikima-ḅịtẹ mị tọrọkọ koromamẹ,

²⁷se ori iḅi insẹnsị mị dọkịmamẹ; anị Nyanaḅọ Ḅe tọnsa ḅaraḅụ.

²⁸Ḅọkọ-kikima-ḅịtẹ mị ò se Ikowarị ḅọkọ mị ḅụ sụkamẹ,

²⁹se anịnyọ, ḅọkọ-kikima-ḅịtẹ mị tọrọkọ mị, ḍiepịrịaye agbamịẹaye dọkịma dọkịmaḅịa ẹbẹ mị ọ̀ nwọse koromaye-ẹ. Anị ọgọnọ ḅụ, dọkịma agba na fịaye mgbọlụ ḍiepịrịaye agba na ọ̀ nwọ dọkịmamẹ, anị Nyanaḅọ Ḅe tọnsa ḅaraḅụ.

³⁰Ḅụ-sịkịrị-mengi-chụa panị mị ọ̀ seni Ikowarị mị na ẹbẹ mị na ogboku koroma se mengi se anịa ḅie chụa ḅeinmamẹ.

³¹Moziz ḅe na, Erọn ḅe na oria owuapụ awọma na, anịnyọ ini inia ḅarama na ḅụọma na sịkịrị sịkịrịḅịa

³²ini Ikowarị mị ḅie sọmun anịkanịka ẹbẹ mị nyọ munḅịa sịkị goyegoye ḅụ, anị Nyanaḅọ Ḅe tọnsa ḅaraḅụ.

³³Moziz ḅe, ọ̀ nyọ ogbokiaye se Ikowarị mị na ẹbẹ mị na ogbokia kelemamẹ, se ọ̀ ḅọkọ kikima-ḅịtẹ-se ḅọkọ mị ḅụ sụkamẹ. Mịn ḅaraḅụ, anị ọ̀ fịrị mamgba nwẹngị famaye-ẹ.

³⁴Anịsịkị soḅuno Ikowarị mị gbẹịnmẹ, se Nyanaḅọ Ḅe ori omi-ẹ nwọḅẹ ẹrẹchị oria opu enekuḅu mị Ikowarị mị ḅie ḅeinmẹ.

³⁵Mịn mị gose Moziz ḅe ori ineda Ikowarị mị ḅie sọmunkẹ.

³⁶Izrẹlapụma ini pike ịnyọsara sime nyọ ḅụ ini so jịn nyọ munḅịa ḅẹḅẹ, anị soḅuno mị Ikowarị mị ọgọnọ ḅụ iwo-sịkị-iwo-sịkị kẹngẹ-ẹ.

³⁷Soḅuno mị anịnyọ sime sịkị goyegoye, ini ḅụọpọkọ-pọkọkẹ.

³⁸Ini nwọ nwẹngịma ḅọrọ àrị sịkịmamgba, Nyanaḅọ Ḅe pakaḅoḅo soḅuno mị ini ọrịrịmẹ Ikowarị mị ọgọnọ, enekaka ḅụ, se anịa ọgọnọ kọrịarị fịnị ḍin ḅụ pịkị omi-ẹ.