Read kirikeni Pakaso 6 Bible Online

Pakaso 6 - kirikeni bible

Pakaso 6

¹Anị Nyanaḅọ Ḅe nwọse Moziz ḅe ḅẹye-ẹ, “Mịọkụ, à seni amanyanaḅọ ḅe mịẹḅịaye ị́ tọrụmgbọlụ se nwọ ọrịḅịa. Àrị ọ̀ mịẹse ori ị̀ya tomonima wẹrịso se ini soḅịa kụrọḅara ḅụ. Ḍiki, à kụrọḅara se ọ̀ mịẹse ọ̀ ḅarana oria ama ḅie ini desinḅịa.”

²Tamụnọ Ḅe ori ọkwẹịn Moziz ḅe pịrị se nwọ ḅẹmẹ, “Ị̀rị̀ anị Nyanaḅọ Ḅe-ẹ.

³Àrị ị̀ ḅụ seni Ebraham ḅe na, Aịzịk ḅe na, pịkị Jekọb ḅe na ḍiemẹ na Ị̀rị̀ anị Kụrọmamgba Nyana Tamụnọ Ḅe-ẹ, ọkụma àrị ị̀ya fịafịa ẹrẹ mị mịẹse ini nemikẹ Nyanaḅọ Ḅe.

⁴À pịkị ini na ị̀ya ọḅọkụ mị fịmẹ, à yeḅereni ini pịrịmẹ na Kenan anị ini igoniapụ ḅara se anga ḅọrọsa ama mị, à nwọse ini pịrịḅịa.

⁵Mịọkụ Izrẹlapụma inia ḅiefiearị ọkụ mị à naasam, anị Ijipt apụma se omoniapụ mịẹ apụma, se à pịkị ị̀ya ọḅọkụ mị se ḅiekoromasam.

⁶Anịẹrẹchị ḍuko Izrẹlapụma pịrị na ị̀rị̀ nwọse ini ḅẹmẹ, ‘Ị̀rị̀ anị Nyanaḅọ Ḅe-ẹ; àrị ọ́ ḍụa se ọ́ sọ Ijipt apụma pịrịarị omoni-ḅara-mị-ḅie àrị ọ́ pakụmaḅoḅịa. Àrị ị̀ya opu kụrọḅara mị dekichịẹma se ḅalafama fomuḅara se inia ọgọnọ gbana, se ọ́ ḍụapakụmaḅoḅịa.

⁷Àrị ó seni ị̀ya tomoni mịẹḅịa, à pịkị Tamụnọ sọ ọ́ pịrịḅịa. Ó nemiḅịa na Ị̀rị̀ anị ọ́ Nyana Tamụnọ Ḅe-ẹ, Ijipt mị ḅie àrị omoniapụ ḅaraḅụ ómine ọkị pakụmaḅoḅịa sịkị.

⁸Àrị ómine ọkị pakaso, à kụrọma yeḅereni se Ebraham ḅe na, Aịzịk ḅe na, pịkị Jekọb ḅe na pịrị ama mị munḅịa se anị seni ọ́ pịrị se ómine anị nyanaḅịa. Ị̀rị̀ anị Nyanaḅọ Ḅe-ẹ.’”

⁹Moziz ḅe mịn mị ò ḍuko se Izrẹlapụma pịrịmẹ, ọkụma ini ò poki ḍụkụkẹ, anịatịḅị inia kuḅie kankọsịsam ini seni omoniapụ mịẹapụ ma se ini na anga si ḅara mị gose.

¹⁰Anị Nyanaḅọ Ḅe nwọse Moziz ḅe ḅẹye-ẹ,

¹¹“Mun ḍuko Ijipt amanyanaḅọ ḅe pịrị na gbarịmaka ḅaraḅụ oria ama ḅie Izrẹlapụma ori ini wẹrịso se ini soḅịa.”

¹²Ọkụma Moziz ḅe nwọse ọ̀ pẹkẹrẹmẹ, “Izrẹlapụma pembe sọnị ị̀ poki ḍụkụka sịkị, amanyanaḅọ ḅe re ị̀ pokiḅe? Ị̀rị̀ ọkụ sime ọkwẹịn ikula kọnḅọ.”

¹³Anị Nyanaḅọ Ḅe Moziz ḅe na Erọn ḅe na ḅẹye-ẹ! “Ḍuko Izrẹlapụma na Ijipt amanyanaḅọ ḅe na pịrị na Ị̀rị̀ ḅarana kụrọ se ọ́ pịrịmẹ na ó mun Ijipt ḅie Izrẹlapụma ọkị pakaso.”

¹⁴Rubẹnị, Jekọb tatarị owutọkụ ḅe, inein-a owuapụ awọ ọ̀ nwọ yimẹ. Henọk ḅe na, Palu ḅe na, Hẹzrọn ḅe na pịkị Kamaị ḅe na; ini ma anị inia ḅieju-aḍapụma ẹrẹ ma fị sẹ ma-ẹ.

¹⁵Simiọnị ḅe sonio owuapụ awọ ọ̀ nwọ yimẹ: Jẹmụẹl ḅe na, Jamin ḅe na, Ohad ḅe na, Jakịn ḅe na, Zoha ḅe na pịkị Shaul Kenan eremeniḅọ ma yaḅe na; ini ma anị inia ḅieju-aḍapụma ẹrẹ ma fị sẹ ma-ẹ.

¹⁶Livaị ḅe tẹrẹ-a owuapụ awọ ọ̀ nwọ yimẹ: Gashọn ḅe na, Kohat ḅe na, pịkị Mẹreraị ḅe na; ini ma anị inia ḅieju-aḍapụma ẹrẹ ma fị sẹ ma-ẹ. Livaị ḅe ò tẹrẹfa kụra sọnọmasi nwọ lamẹ.

¹⁷Gashọn ḅe mama owuapụ awọ ọ̀ nwọ yimẹ: Libnaị ḅe na pịkị Shimẹaị ḅe na, se tọn apụ inia furo ḅie pakaḅomẹ.

¹⁸Kohat ḅe inein-a owuapụ awọ ọ̀ nwọ yimẹ: Amram ḅe na, Iza ḅe na, Hibrọn ḅe na, pịkị Ọzaịẹl ḅe na. Kohat ḅe ò kụra sonioasi-oyi-fịnjị na tẹrẹ-a kụra nwọ lamẹ.

¹⁹Mẹreraị ḅe mama owuapụ awọ ọ̀ nwọ yimẹ: Malaị ḅe na, pịkị Mushaị ḅe na. Mà anị Livaị sẹ ḅie apụma na inia furo ḅie apụma na-ẹ.

²⁰Amram ḅe ḍawu nụmbụrarọ Jokẹbẹd ma ọ̀ nwọ ọkị simemẹ, anị Erọn ḅe na Moziz ḅe na yi ọ̀ pịrịḅọ ma-ẹ. Amram ḅe ò tẹrẹfa kụra sọnọmasi nwọ lamẹ.

²¹Iza ḅe tẹrẹ-a owuapụ awọ ọ̀ nwọ yimẹ: Kora ḅe na, Nefẹg ḅe na, pịkị Zikraị ḅe na.

²²Ọzaịẹl ḅe sọnị tẹrẹ-a owuapụ awọ ọ̀ nwọ yimẹ: Mishaẹl ḅe na, Ẹlzafan ḅe na, pịkị Shitraị ḅe na.

²³Erọn ḅe Elisheba ma simemẹ, anị Aminadab ḅe ḅarọ ma pịkị Nashọn ḅe nụmbụrarọ ma; àrị Nedab ḅe na, Abaịhu ḅe na, Ẹleaza ḅe na, pịkị Itama ḅe na yi ọ̀ pịrịmẹ.

²⁴Kora ḅe tẹrẹ-a owuapụ awọ ọ̀ nwọ yimẹ: Asi ḅe na, Ẹlkena ḅe na, pịkị Abaịasaf ḅe na; ini ma anị Kora sẹ mị anịa ịkpangị ma ḅieju olomu-aḍapụ ma-ẹ.

²⁵Ẹleaza, Erọn yaḅe, Putiel, eremeni awọma ḅụ gbọrịḅọ na simemẹ, se Fịnehas ḅe á nwọ yi ọ̀ pịrịmẹ. Mịnapụ ma anị Livaị sẹ mị ḅie furoma na pịkị arịa sẹma na tịḅịnị ma-ẹ.

²⁶Erọn ḅe na Moziz ḅe na anị Nyanaḅọ Ḅe nwọse ḅe apụ ma-ẹ, “Ọ́ tọrọkọda se Izrẹl sẹ mị pịrị se ini seni Ijipt ḅie pakaso.”

²⁷Ini ma anị nwọse Ijipt amanyanaḅọ ḅe ḅẹye-ẹ na ori Izrẹlapụma wẹrịso omoniapụ sọmị ḅụ.

²⁸Nyanaḅọ Ḅe Ijipt ama mị ḅie ọkwẹịn Moziz ḅe pịrị sịkị,

²⁹ọ̀ nwọ ḅẹmẹ, “Ị̀rị̀ anị Nyanaḅọ Ḅe-ẹ. À ḍuko ị́ pịrịye goyegoye nwọ ḍuko seni Ijipt amanyanaḅọ ḅe pịrị.”

³⁰Ọkụma Moziz ḅe nwọ pẹkẹrẹmẹ, “Ị́ nemimẹ na àrị ọkwẹịn ikula kọnmẹ; nde amanyanaḅọ ḅe gose ị̀ pokiḅịaye?”