Read kirikeni Job 1 Bible Online

Job 1 - kirikeni bible

Job 1

¹Ini Job nwọse chịn gbọrị owuḅọ omi-ẹ Ọz ama mị ḅie; ori anị tịḅịtu Tamụnọ Ḅe pịrị, pịkị kuḅie se ọ̀ ḅụ gbanaḅọ-ẹ. Ori anị karakaraye mịẹḅọ-ẹ, siye mịẹḅụ mịna ḅụ tọnḅọ-ẹ.

²Sọnọma owuapụ awọ na tẹrẹ-a eremeni awọ na ọ̀ nwọ yimẹ,

³ọ̀ pịkị mẹndẹ oyiasi fịnjị ofori anana gbọrị poku nyanamẹ, ike-nambulo-a sọnọma ẹndẹ oyiasi fịnjị na nambulo-a mẹndẹ oyiasi fịnjị na yepụra asụn ḅụ ẹndẹ sọnọ-a si fịnjị nwọ nyanamẹ, ọ̀ pịkị ḅaka fịrịnwẹngịapụ nwọ nyanamẹ, se ịrụapakapaka nyọ mị daọrụ ḅụ ori ngọ kọn tẹịnmẹ.

⁴Job owuapụ awọma ini jụmḅọ jụmḅọ ḍukoma alalị fịaye chụọchụọmẹ, gbọrịḅọ ḅe chụọ fịayema ísíapụ mamgba ḅo anị fịḅịa, ini pịkị inia tẹrẹ-a eremeni mịnapụma chịn inia ḅụ chụachụamẹ.

⁵Alalị fịaye chụọ ene ḅọrọ ḅe eneḅa dede lasịkị lasịkị, Job ḅe ori iḅi sịkị sịsẹ se mun agbamịẹmịẹmẹ, oria awọma ḅụ gbọrịḅọ-gbọrịḅọ tịḅị gose, se inia ḅụ mịẹfịafịama fịafịamamẹ. Ọ̀ mị ḅara mịẹmịẹmẹ anịatịḅị ḅụpalịka inia ḅụ gbọrịḅọ ḅụnemika ḅaraḅụ Tamụnọ Ḅe mịẹirimasa otuḅo.

⁶Soḅie apụma ḅo Nyanaḅọ Ḅe tọrụkuḅu ḅụpakụmaḅịa ene lasịkị, Oru ḅe sọ inia ḅụ sọ ḅo mẹ.

⁷Nyanaḅọ Ḅe ò gbelamẹ, “Nde anga ị́ sime se ḅo-ao?” Oru ḅe pẹkẹrẹmẹ, “à nwẹngịma ḅọrọaḅẹ, gelegelema tomonikiri mị nwẹngị kelemaḅẹ.”

⁸“Ị̀ya fịrịnwẹngịḅọ Job ḅe ị́ kpaịnma ò se ḅiekoroma-ao?” Nyanaḅọ Ḅe nwọ gbelamẹ. “Tomonikiri mị ḅie mgba ò sime ọkụ sime gbọrịḅọ sọ ofori-ẹ, ori anị kuḅie-se-ḅụgbana-gbẹịnḅọ-ẹ, pịkị karakaraye mịẹḅọ-ẹ. Ori ị̀ ḍikiḅalafamẹ, ọ̀ pịkị simịẹmịẹaye ḅụ ḅụtọnmẹ.”

⁹Oru ḅe pẹkẹrẹmẹ, “Job ḅe ori ị́ ḍikiḅalafa se pịkị tịḅịtu ị́ pịrị ḅe ọ̀ sọye nyanaka ọkụma?”

¹⁰Ị́ sịkịmamgba ori na ò furo na ḍikiḍikiaḅẹ, ị́ pịkị ḅaka nambulo se ọ̀ pịrị nyọ mamgba ḅụ ḅeinmasam.

¹¹Ọkụma mịọkụ ị́ nemikase ọ̀ nyana ye mamgba ọkị ọkụma, ị́ ọrịḅịa ori ị́ ḍukosima ḅịa ọkụ.

¹²“Iḅimẹ,” Nyanaḅọ Ḅe nwọse oru ḅe pẹkẹrẹmẹ, “ọ̀ nyanaye goyegoye, ị́ya kụrọ ḅie omi-ẹ, ọkụma ḅara se ori-oju lamama.” Anị Oru ḅe Nyanaḅọ Ḅe tọrụkuḅu nwẹngị so ye-ẹ.

¹³Gbọrị ene Job awọma inia numbireowu sẹnịḅọ ḅe warị ḅie alalị fịye fịarịogbo,

¹⁴mị gbọrị okunwẹngịḅọ mangị Job ḅe damaḅoye-ẹ, “wa owoi-nambulo ma na eleogbo fịrịnwẹngị aḅẹ,” ori ọkọ ḅẹmẹ, “yepụra asụn ma sọ àrị kpekima osueinma ḅie omi-ẹ.

¹⁵Ḅụnemika ọkụma, Sabịapụ ma owu se wa paka se arịmgba kun ọkị se pịkị ị́ya fịrịnwẹngịapụ mamgba ḅaa sinmẹ. Ị̀rị̀ kẹngẹ anị pịọrụ-pakaḅoye-ẹ, ḅo mịn mị ḍuko ị́ pịrịaḅẹ.”

¹⁶Ma ori ọkwẹịn soka ọkụma, jịn fịrịnwẹngịḅọ ḅo se nwọ ḅẹmẹ, “Soalagba ananama na anana-koru-apụ mamgba na tẹịn se inimgba fịmẹ. Ị̀rị̀ kẹngẹ anị pịọrụ-pakaḅoye-ẹ, ḅo mịn mị ḍuko ị́ pịrịaḅẹ.”

¹⁷Ma ori ọkwẹịn soka ọkụma, jịn fịrịnwẹngịḅọ ḅo se nwọ ḅẹmẹ, “Tẹrẹ-a Kaldia nweni ḅaa ogbo wa pụnụma se ike-nambulo mamgba ọkị somẹ, se ị́ya fịrịnwẹngịapụ mamgba ḅaa sinmẹ, ị̀ sakị sikima. Ị̀rị̀ kẹngẹ anị pịọrụ-pakaḅoye-ẹ, ḅo mịn mị ḍuko ị́ pịrịaḅẹ.”

¹⁸Ma ori ọkwẹịn soka ọkụma, jịn fịrịnwẹngịḅọ ḅo se nwọ ḅẹmẹ, “Ị́ya awọma, inia numbireowu sẹnịtẹịnḅọ ḅe warị ḅie ini alalị fịarịogbo,

¹⁹mị opu irisi warị mị kan ini pụnụma se inimgba ḅaa sinye-ẹ. Ị̀rị̀ kẹngẹ anị pịọrụ pakaḅoye-ẹ, ḅo mịn mị ḍuko ị́ pịrịaḅẹ.”

²⁰Anị Job ḅe sịsẹ se oria oju ḅụchụayema kan ye-ẹ kururu ḅụ. Ori ọ̀ tịḅị sẹịn se ọ̀ ḅụ se kiri gbin se tẹkẹmẹ.

²¹Ori ọkọ ḅẹmẹ, “Ini ye se ị̀ ḅụ chụa ị̀ yikẹ, à pịkị yese chụa fịẹkẹ. Nyanaḅọ Ḅe pịrịmẹ, mịọkụ ọ̀ pịkị ọkịsam. Ye boma sime oria ẹrẹ mị pịrị.”

²²Pakasaye mamgba ḅụ, Job ḅe ọ̀ nwẹngị irima se Tamụnọ Ḅe fiesimakẹ.