Read kirikeni Job 12 Bible Online

Job 12 - kirikeni bible

Job 12

¹Iin, ị́rị́ anị tomonima pụkọ mị-ẹ. Ị́ fịḅịa sịkị, nemi mị ị́rị́ na fịḅịa.

³Ọkụma ị́ tịḅịḅie nyana ọkụ, mị ị̀rị̀ sọ à nyana ọkụ-ẹ. Ị́rị́ mịẹmịẹaye ḅụ iḅi ị̀ nẹngị anga ofori-ẹ ngịsị; ị́ ḍukoaye mamgba nweni mgba nemimẹ.

⁴Ị̀ya ikiapụ ma pembe ị̀ ḍẹrịmẹ mịọkụ; ini ḍẹrịmẹ, à karakaramẹ nwọḅẹsọ pịkị ḍukosimaye ị̀ ḅụ ofori-ẹ nwọḅẹsọ; ọkụma Tamụnọ Ḅe ị̀ya tẹkẹma pẹkẹrẹ gbọrị sịkị omi-ẹ.

⁵Ọ́ ḅụfụka nyanakẹ, anị sọ ómine ị̀ se kpọtimẹ; ọ́ ḅịkị-ọtọn-arịḅọ ḅakụmẹ.

⁶Ọkụma furu apụ na oru nemikapụ na dein ḅụ angamẹ, inia ngẹrị oru ḅe anị inia kụrọ mị-ẹ nwọḅẹsọ.

⁷Feni na nama na pembe se ó telimaḅịa ḅakaye nyanamẹ;

⁸kiri ọgọnọ na tọrụ ḅie na sime tẹmẹ aye ma gbela arịa nemi.

⁹Arịmgba nemimẹ na Nyanaḅọ Ḅe ḅara ma àrị tẹmẹmẹ.

¹⁰Tamụnọ Ḅe mị ọ̀ tẹmẹ ayema ḍumo ma datekeremarịye-ẹ; ḅẹḅọ ḅẹḅọ ḍumo oria kụrọ ḅụ omi-ẹ.

¹¹Ọkụma ọ́mịna ḅịpị ḅie ḅẹlẹ ma fịye ḅẹlẹ nemi ọkụ, mị anị ọ́mịna ḅeri ma yenaa ḅẹlẹma ọkụ-ẹ.

¹²Olomuapụ nemi nyanamẹ, ọkụma Tamụnọ Ḅe nemi na kụrọ na nyanamẹ. Olomuapụ ye simeḅịa ọkụ nemimẹ; Tamụnọ Ḅe ye simeḅịa ḅara na pịkị se anị mịẹḅịa ọkụ kụrọ na nyanamẹ.

¹⁴Tamụnọ Ḅe ye kansara sịkị, tụḅọ ineda namaḅe? pịkị tụḅọ ineda Tamụnọ Ḅe se ikoli ḅie chu apụma sinpakụmaḅe?

¹⁵Tamụnọ Ḅe ene ọlọ chịẹma sịkị mị ịrụakpoin ḅoye-ẹ; ò mengi mị pịkị fokofokoma sịkị mị opu mengi mị ḅoye-ẹ.

¹⁶Tamụnọ Ḅe ọ̀ kụrọmẹ, ọ̀ pịkị sịkịmamgba ọmụḅaraiḅi nyanamẹ; ini dairimaḅọ ḅe na, ọ̀ dairimaḅọ ḅe na inimgba oria kụrọ ḅie ini omi-ẹ.

¹⁷Ọ̀ ḅẹrẹtọn apụ nemi ma ọkịsomẹ se tịḅịnịma mịẹmẹ ini oḅori apụ kịkẹmẹ.

¹⁸Ori amanyanapụ iderimamẹ se ini se ikoliapụ mịẹmẹ;

¹⁹ori agbamịẹapụ na kụrọ nyana tomoni na iderimamẹ.

²⁰Tomoni kuḅie-se-ḅụgbana apụma ọ̀ mịẹse ini yawụmẹ, se ori olomuapụ ma nemi ma ọkị somẹ.

²¹Ọ̀ kụrọ nyanapụ ma ḅụgereremamẹ se ḅẹrẹtọn apụma kụrọma mịẹse àrị ḅo dachịẹmẹ.

²²Fị kanakana ọkụ kanakana nyọma ḅie ori enekuḅu se àrị fịrịmamẹ.

²³Ọ̀ sẹma mịẹmẹ àrị kụrọ pịkị opu sọmẹ, ọkụma ori àrị nẹngịma pịkị àrị kansinmẹ.

²⁴Ori arịa tịḅịnịma mịẹse ini oḅoriapụ sọ nwẹngịma ḅọrọmẹ se ḅụḅalaḅala na famẹ;

²⁵ini kanakana ḅie iri, se iru tọrụḅaapụ ḅara se jiajiama ḅọrọmẹ.