Read kirikeni Job 16 Bible Online

Job 16 - kirikeni bible

Job 16

¹Ma ọkwẹịn ma kịkẹmaye à naaḅọrọsam; ị́ se ị̀ pịrị kuḅie kụrọma ọkwẹịnma ḅụfụka kẹngẹ-ẹ.

³Ị́ ọkwẹịn gbasoḅe? Ị́rị́ sịkịmamgba kuluma ọkwẹịn mị nyana ḅe?

⁴Ị́rị́ nemikase ị̀ya kiri sime se ị̀rị̀ ị́ya kiri sime ọkụma, àrị ineda ị́ ḍukoarịye mamgba ḍukoḅịa. Àrị ineda nemiḅụ ị̀ tịḅị jike se opu mengi ḅara se ị́ ḅilemaḅịa.

⁵Àrị ineda ị́ mịẹkụrọmaḅịa tetema ḅụ se kuḅie kụrọma ọkwẹịn kọnkọn ị́ deinmaḅịa.

⁶Ọkụma à ḍuko se ḅarachụarịye ofori-ẹ, à gboinma sime mị ị̀ya oju akụ mị deinmakẹ.

⁷Ị́ ị̀ se tekele pịrịsam, Tamụnọ; ị́ mịẹ se ị̀ furo mị fị fasam.

⁸Ị́ ị̀ kọrị ọkịsam; ị́rị́ ị̀rị̀ na tarakaḅọ-ẹ. Ị̀rị̀ apụra na imgbe na-ẹ, se tomoni ọkịmẹ anị ị̀ya ḅẹrẹ ḅarasi mị ḍukopakụmamẹ.

⁹Ịganị ḅụ Tamụnọ Ḅe ị̀ kanịmẹ, ḅụọ ḅụ ọkịmun ị̀ ḅarama la; ḍikiḅụnwọnwọ ḅụ ori ọ̀ tọrụḅịama ị̀ damẹ.

¹⁰Tomoni ị̀ chumamẹ; ini ị̀ gbori kelema se ị̀ tọrụ ḅụrọmẹ.

¹¹Tamụnọ Ḅe ori ịyọlọ ḅọrọma se oru nemikapụ ma pịrịsam; ọ̀ pịkị ị̀ se gbin sitịḅịnyanapụma pịrịsam.

¹²À deinḅie angamẹ, ọkụma Tamụnọ Ḅe pụkọḅụ ị̀ ọlọ se ị̀ fomu kọsịmasam. Tamụnọ Ḅe ori ị̀ se elekima ti ḍawọmẹ

¹³se ịkọlị ịkọlịḅụ ḍẹịn se ị̀ tẹịn— se àrị ị̀ temi se ye se ị̀ lamasam; anịsọ ori ị̀ ḍikitịḅịfoinkẹ.

¹⁴Ọ̀ ḅarị ḅarị ye se ị̀ lamamẹ; nọmụḅara se taraka nyana owuniḅọ kịkẹ ḅara mị ò se ị̀ dapakaye-ẹ.

¹⁵À ḍụẹịn ḍin se kurukuru ḅụchụaye chụamẹ, se à mịanga fọn ḅie sime waraḅẹ ọmụ ḅarasi ḅụ.

¹⁶Àrị owu nweni-i ị̀ tọrụmgba pulo-pulo-pulosam, se ị̀ tọrụmgbọlụ mamgba foinsam, se ilo ma àrị kelemasam,

¹⁷ọkụma à mịẹ kụrọ simịẹmịẹye ḅe ḅẹrẹsi ofori-ẹ; pịkị à nyana Tamụnọ Ḅe pịrị tẹkẹ mị ị̀ kuḅie lamẹ.

¹⁸Yei Sẹkiri, ini se ị̀ mịẹ siaye ma ḅọịma! Ị̀ya karakara chịn ḅịpị mị ḅerenima anị bin!

¹⁹Gbọrịḅọ omi-ẹ soḅie anị ị̀ tịḅị gose chịẹḅịaḅọ pịkị ị̀ anga sọḅịaḅọ.

²⁰Ị̀ya ikiapụ ma ị̀ kombomẹ; ị̀ tọrụmgbọlụma ḅie owu mengi sarapaka Tamụnọ Ḅe pịrịmẹ.

²¹À nweni ḍọkịmẹ ị̀ tịḅị gose chịẹ Tamụnọ Ḅe tẹkẹḅịaḅọ, tomoniḅọ mịna ikiaḅọ tịḅị gose chịẹ ọkụ mị.

²²Ị̀ya kụra ma àrị ḅọrọaḅẹ mịọkụ, se ḅarị pịkịmaḅo-ẹka ateli mị à nwọ nwẹngịaḅẹ.