Read kirikeni Job 18 Bible Online

Job 18 - kirikeni bible

Job 18

¹Job, ị́ sime ọkụ simeapụ ineda yawụma sime ẹka? Ị́ nemikase yawụma sime se pokiḅịa ọkụma, wa ineda ọkwẹịn ị́ pịrịḅịa.

³Cheye ị́ mịẹse ị́ koroma-o na wa nambulo yenemika ọkụ se yenemikẹ?

⁴Ị́ papa ị́ya ịganị mị se yese ị́ ḅụ lama aḅẹ. Ini tomonikiri mị koroma mangị so ḅe, ị́ya ịganị gose? Tamụnọ Ḅe ọ̀ tụndụma dekisin se ị́ kuḅie deinmaḅe?

⁵sitịḅịnyanaḅọ ḅe oria tọnjie mị pa binḅịa; anịa fịnịḅẹlẹ mị ḅarị kọrị-ẹkẹ.

⁶Oria ikowarị mị ḅie sime tọnjie mị kanakanaḅịa. Ọ̀ tịḅị ọgọnọ sime tọnjie mị binḅịa.

⁷Oria nwẹngị ḅụọma kụrọ simemẹ, ọkụma mịọkụ ọ̀ ḅụọ tọmbụlọsam; ò se jịn apụ pịrịpịrị tetema ma ḅụ ọ̀ ḅịkịsam.

⁸Ọ̀ nwẹngị mun ịgbọ ḅie sọmẹ, se anị ọ̀ ḅụọ ma kunmẹ;

⁹ḍẹịn ọ̀ ḅụọ tongu kun se ori ọlọmẹ.

¹⁰Kiri ọgọnọ ḍẹịn ḅọị waraḅẹ; oria ateli ḅie ini gbọrị ḍẹịn tusam.

¹¹Arịmgba kelema ḅalafamaye ò koruaḅẹ; anị ò ḍuko ḅịa ọ̀ ḅụọ sin sịkị goyegoye mamgba.

¹²Ori alakọn mẹ, ọkụma mịọkụ fịye pụkọtarịḅụ ori omi-ẹ, fa oria angasịkị chịẹ ò koruaḅẹ.

¹³Ḅụkan obi oria oju mgba sarawaraḅẹ se ọ̀ ḅarama na ọ̀ ḅụọma na ḅụrụmamẹ.

¹⁴Ori anga kuḅie kụrọma ikowarị ḅie ini ọ̀ kanịpẹlẹmẹ, pịkị ọ̀ fọnọ pakụmaḅo Amanyanaḅọ Fị mị na tọrụ damamẹ.

¹⁵Mịọkụ tomoniḅọ ineda oria ikowarị mị ḅie angaḅịa; anị obi ḅaa sọlfọ nwọse anịa ḅie sanaso sịkị re!

¹⁶Kuno ma na, ịkpangị ma na ịnyọ arịaḅụ fa pịkị samịna sam.

¹⁷Oria opu ẹrẹ mị kulumasam ama mị ḅie na pịkị ḅọlọ-a nyọma na; gbọrịḅọ sọnị ḅarị ò seni ḅiekoromakẹ.

¹⁸Ḍumo apụ ama ḅie ini ò desinḅịa, enekuḅu ḅie ò de mun kanakanaḅie chuḅịa.

¹⁹Oria furo ḅie apụ ofori-ẹ, oria kiri ọkị ḅịapụ ofori-ẹ.

²⁰Ịrụapakapaka nyọ ọkịmun ịrụa tuma tuma nyọ la, ọ̀ ḅụ pakaye mị naa apụ mamgba abakwa pịkị ḅalafa ḅụ ḅụgeregeremẹ.

²¹Anị Tamụnọ nemikapụ ma ḅụ pakaḅịaye-ẹ, Tamụnọ se yechịnkapụ ma ḅụ pakaḅịaye ma-ẹ.