Read kirikeni Job 2 Bible Online

Job 2 - kirikeni bible

Job 2

¹Soḅie apụma pịkị ḅo Nyanaḅọ Ḅe tọrụkuḅu ḅoḅịa ene lasịkị, Oru ḅe sọ ori inia ḅụ sọ se ḅomẹ.

²Nyanaḅọ Ḅe ò gbelamẹ, “Nde anga ị́ sime?” Oru ḅe pẹkẹrẹmẹ, “à mị nyọ na anị nyọ na ḅụ nwẹngịma ḅọrọaḅẹ, gelegelema tomonikiri mị nwẹngị kelemaḅẹ.”

³“Ị̀ya fịrịnwẹngịḅọ Job ḅe ị́ kpaịnma ò se ḅiekoroma-ao?” Nyanaḅọ Ḅe nwọ gbelamẹ. “Gbọrịḅọ sọ ofori-ẹ tomonikiri ò sime ọkụ sime pịkị kuḅie-se-ḅụgbana-na-gbẹịn iḅiḅọ. Ọ̀ tịḅịtu ị̀ pịrị pịkịna ị̀ ḍikiḅalafamẹ, ọ̀ pịkị siye mịẹ ḅụ mịnaḅụ-tọnmẹ. Ọkụma ị́ ị̀ chukurumamẹ na à ḅereni ị́ pịrị ị́ ye se ò mịẹ gbọrị si sọ mịẹka ḅaraḅụ, anịẹḅẹsọ Job ḅe ọ̀ pa kuḅie-se-ḅụgbana-na-gbẹịnḅọ sọ waraḅẹ.”

⁴Oru ḅe pẹkẹrẹmẹ, “Tomoniḅọ ineda ọ̀ nyanaye goyegoye pịrị pakụmaḅịa mịẹso sịkị ò ḍumo ma tọrọkọ mun.

⁵Ọkụma mịọkụ ị́ nemikase oria ojukiri mị akụḅịaye nwọse ọ̀ mịẹ ọkụma, ori ị́ tọrụkuḅu ị́ woriḅịa.!”

⁶Anị Nyanaḅọ Ḅe ḅẹye-ẹ, “Ori ị́ya kụrọ ḅie omi-ẹ, ọkụma ọ̀ ḅaa re ḅaa ma.”

⁷Anị Oru ḅe Nyanaḅọ Ḅe tọrụkuḅu wẹrịso se mun Job ḅe ojukiri ịnọ-ịnọ-ịnọ pakụmaye-ẹ, ọ̀ ḅụọ chukuḅụ ọkịmun ọ̀ tịḅị kiri la.

⁸Job ḅe, ò so mun sara-ọgọnọ simemẹ se anị nyọ ḅụ ẹkẹkẹ-pẹkẹrẹ ọkị se oria oju ịnọ ma kọrọrọmẹ.

⁹Tarọ ma ọ̀ ḅẹmẹ, “Ị́ pa kuḅie-se-ḅụgbana-na-gbẹịnḅọ ḅara se kụrọ wara-ao? Cheye gose ị́ Tamụnọ Ḅe wori se fịka?”

¹⁰Job ḅe pẹkẹrẹmẹ, “Ye nemika ọkwẹịn anị ị́ kọn-arịye-ẹ! Nyanaḅọ Ḅe iḅiye se wa sẹịnma sịkị wa ọkịmẹ. Nde wa gose mbụrụmbụrụḅịaye, ọ̀ ḅụfụka se wa sẹịnma sịkị?” Mà tọrụsiọrị mamgba ḅie sọnị Job ḅe, ọ̀ Tamụnọ Ḅe fiesimakẹ.

¹¹Job ikiapụ ma ḅie tẹrẹ-apụ anị Ẹlifaz, Timan opuama ḅoḅọ ḅe na, Bildad, Shụaḅọ ḅe na; pịkịna Zofa, Neama ama ḅoḅọ ḅe na ḅomẹ. Ini naamẹ na Job ḅe ori opuma tọrụsiọrịaḅẹ nwọḅẹ sịkị, ini tọnpẹlẹmẹ, na ini mun ọ̀ la se ò kuḅie kụrọmaḅịa.

¹²Sasaju ḅụ ini Job ḅe ọrịmẹ, ọkụma ini ineda lekiriḅokẹ ori ọkụ. Ini ḅo ò lekiriḅo sịkị, ini sakị owu pịkị kururumẹ, se inia ḅụchụayema kanmẹ kuḅie si ḅụ, fọn se nyọma ḅụ saramẹ pịkị se inia tịḅị saramẹ.

¹³Se ini ḅo ori na kiri ọgọnọ sarasimemẹ, sọnọma ḍin na sọnọma enekaka na ḅụ ini ọkwẹịn jụmḅọ jụmḅọ pịrịkẹ, anịatịḅị ọ̀ tọrụsiọrị la sa ọkụ, ini nwọ ọrịmẹ.