Read kirikeni Job 20 Bible Online

Job 20 - kirikeni bible

Job 20

¹Job, ị̀ kuḅie ḅarị chịẹtarịkẹ. À ḅarị ineda ị́ pẹkẹrẹ ḅịpị mị ọlọchịẹma ẹkẹ.

³Ị́ ḍukoye mị, wọlọ-ẹ, ọkụma ị́ pẹkẹrẹḅịa ọkụ à nemimẹ.

⁴Kọkọmaye-ẹ ị́ nemimẹ olomu sịkị ngịsị, tomoniḅọ ini tatarị nwọse tomonikiri ḅie koroma sịkị,

⁵ḅieḅẹlẹ nyana ḅọlọ sịkị laḅịa sitịḅịnyanaḅọ ofori-ẹ, pịkị Tamụnọ nemikaḅọ ḅe oria ḅieḅẹlẹ mị ḅọlọ sịkị la ẹkẹ.

⁶Ori ineda opusọ ẹrẹ so mun so mị laḅịa, ḍụḅa so ọkụma ò tịḅị soḅuno bịanḅịa,

⁷ọkụma fọn kịkẹ ḅara ini nwọse ori ofurosinḅịa. Tatarị sịkị ò lekiri apụma ḅụḅalaḅala ḅụ ini ò sime anga gbelaḅịa.

⁸Ọ̀ ḅọrọḅịa ḍawọ ju ọkụ, ḍin ḅụ tẹmẹḅụye-ọrị-ọkụ, se ini ḅarị ori ọrị ẹkẹ ngịsị.

⁹Sitịḅịnyanaḅọ ḅe ori anga nyọ ḅụ ori ịmaịnfa ḅịa;

¹⁰oria awọma ori igwein apụma ḅara furu ayema nwọ gbẹịnḅịa, se ọ̀ ḅarana oria ngọma pịrịpakụmaḅịa.

¹¹Oria oju tatarị sịkị ịwọ pịkị ịnyọ nyanamẹ, ọkụma ḅọlọ ẹkẹ anị pịkịmaḅo fọn sọḅịa.

¹²Si mị ọ̀ ḅịpị ḅie ḅẹlẹ so ọkụma ori anịaḅụ daye kpopumẹ ḅẹlẹ mị gose ọ̀ ḅịpị ḅie anị kelekelema anịa kụnụ mị na ḅẹlẹ mị na pa nwọ taḅaḅịa ẹrẹchị.

¹⁴Ọkụma ọ̀ ḅụlọḅie fịye mị pịkịḅo akụmẹ, nweni ḅaa ḍiri akụ ọkụ akụmẹ oḅie ḅụ.

¹⁵Sitịḅịnyanaḅọ ḅe ò furuḅo ngọma ori ọsụnḅịa; Tamụnọ Ḅe pịkị anị ọkịmẹ, ḅụlọḅie simeaye ma sọ, ori ọkị pakụma ḅomẹ.

¹⁶Siḅọ ḅe mịnịye mị nweni ḅaa ḍiri kịkẹmẹ; anị ọ̀ ḅaa ḅịa si oruwu gbọ ḅọ fị ọkụ.

¹⁷Ò ḍumo sime oliv pulo ideri mengi ọrị ẹkẹ anịkanịka ndo mengi na ḅẹịn na ideri àrị mengi ọrị ẹkẹ.

¹⁸Ọ̀ ḍọkị pakụmaḅosa chịnmgbọlụ mamgba ọ̀ sarakoromaḅịa; ọ̀ sịkị nyana oria ngọma se ọ̀ ḅụ tima-ẹkẹ,

¹⁹anịatịḅị ori igwein apụma pụnụma pịkị ini se ye chịnkẹ pịkị jịn apụ nama koroma warịma kọrịmẹ.

²⁰Oria oputọrụmgbọlụ mị gose ngịsị ọ̀ nyanaye goyegoye ọ̀ karakẹ.

²¹Ò yefị kọnma sịkị ofori-ẹ, ọkụma mịọkụ ọ̀ mịẹse ọ̀ ḅara sọ arịye ofori-ẹ.

²²Mịẹyeḅarasọ ḅụ ọ̀ la gele nyọ ḅụ ḅụḅalaḅala ḅe iku mamgba ọ̀ kọsịmaḅịa.

²³Ye ọ̀ ḅụḅẹlẹye goyegoye ọ̀ nwọ fị! Tamụnọ Ḅe ịganị ḅụ ò fomuḅara se ọ̀ pịrịḅịa.

²⁴Ọ̀ nwọ ḅụkụrọma ikulele-kongo-ḅịpị pọkọ so sịkị, alapẹlẹka lubu ọ̀ tẹịn gbinḅịa.

²⁵Ḍẹịn oria oju toluḅọrọmẹ; anịa ḅịa-mịọmịọ ḅịpị mị tolu pulo ideri pakaḅomẹ, se opu ḅalafa ò ḅie sọmẹ.

²⁶Ò koko wẹrịye goyegoye si famamẹ; tomoni ḅara se tọnjịka fịnị ori na ò furo mgba na dọkịmamẹ.

²⁷So mị oria si ḍukopakụmamẹ, anịsịkị sẹkiri mị onyechịẹ tụḅụrụ ọ̀ daḅịa.

²⁸Oria ngọ mamgba Tamụnọ ịganị mị ḅie opu mengi àrị simaḅịa.

²⁹Mịn anị sitịḅịnyanapụma ḍiekiri mị-ẹ; Tamụnọ Ḅe ḅereni ini pịrịye mị-ẹ.