Read kirikeni Job 21 Bible Online

Job 21 - kirikeni bible

Job 21

¹À ḍukoarịye poki; anị ị́ ḅara à ḅiarị kuḅie kụrọma mị-ẹ.

³Sịkị se ị̀ pịrị àrị ọkwẹịn, àrị ọkwẹịn soso, ị̀ chuma, ị́ ḅụḅẹlẹḅẹlẹ.

⁴À tomoni na kamụ sọkẹ; àrị iḅi ḅẹrẹ nyanamẹ anị à gose inema ẹkaye.

⁵Ị̀ ḍiki. Anị ị́ ḅụokoroka ị́ nwọ gegema ị̀ ḍiki se ḅụbuama ḅaraḅụ yawụma sime mị?

⁶Ị̀ ḅụ pakaye à nwọse ḅiekoroma sịkị, à ḅarị à sime kiri nemikẹ, se ḅalafa ḅụ ị̀ ḅụgeregeremẹ.

⁷Cheye gose Tamụnọ Ḅe ḅereni siapụ pịrị ini ḍumo sime, ḅereni se ini sẹnị olomu pịkị ye nyana?

⁸Ini awọ na tengi awọ na yi sara, pịkị ḍumo sime inimgba sẹnị paka mị ọrị.

⁹Tamụnọ Ḅe ọ̀ ḅụfụka se inia warịma pịrịkẹ; ini ḅalafamaye ḅie sọsọkẹ.

¹⁰Iin, inia nama mamgba lọkọlọkọma yi pịkị sẹnị pakamẹ ḅụfụka ofori ḅụ.

¹¹Inia awọmẹnịma anana awọ mangị tima ḅọrọ ọkụ se timẹ

¹²pịkị ọbọ ma na ofurofuroaye ma na chuarị nime ma se sẹkịaḅẹ.

¹³Ini deinḅụ inia ḍumo kọnmẹ se deinma fịmẹ tọrụsiọrị oforika ḅụ.

¹⁴Sitịḅịnyanapụma Tamụnọ Ḅe ḅẹmẹ ori ini wẹrịso; ini ḅikẹ ini ọ̀ tọnkoroma ini pịrịye nemi inia ḍumo ḅụ.

¹⁵Ini koromamẹ tomoni gose Tamụnọ tẹkẹḅịaye ofori-ẹ; anịkanịka Tamụnọ tẹkẹ ḅụ ini ọrịarị sọye omi ọkụ.

¹⁶Ini ḅereni ọkịmẹ na inia ịnyọ ḅụ mị mịẹmịẹye ini na ḅịrịarịye-ẹ, ọkụma inia yekoroma ḅara mị àrị ineda ọkị ẹkẹ.

¹⁷Sitịḅịnyanaḅọ tọnjie binḅịa sịkị omi? Jịn ene iniaḅụ gbọrịḅọ ḅụfụka na ḅianmasa? Jịn ene Tamụnọ Ḅe ò sitịḅịnyanapụma fomusa oria ịganịḅụ

¹⁸se irisi ḅie fọrụ dekisin fọn ḅara?

¹⁹Ó ḅereni ọkịmẹ na Tamụnọ Ḅe ọ̀ tọkụ ḅe fomumẹ ḍawu ḅe mịẹirimaye ma gose. Ẹn-ẹn! Ye Tamụnọ Ḅe dada mịẹirimapụ ma fomu; ye ò ḍiepakụma na inia mịẹirima ma gose ori anị mịẹmẹ.

²⁰Ye mịẹirimapụ ma inia fomuḅara mị da; ye Kụrọmamgba Nyana Tamụnọ Ḅe ịganị mị iniaḅụ ọyị.

²¹Mịna ḍumo ma ḅọrọsịkị wa pa mịna awọma ḅe ḅieḅẹlẹ mị nemi ḅe?

²²Tomoniḅọ ineda ye se Tamụnọ Ḅe ḍieḅe, anị ḅẹrẹkọn gele kiri sime apụma sọnị pịrịarị ḅọ ḅe?

²³Dapụ kpụrụkpụrụ ma sime ọkịmun inia fị ene lamẹ; ini ḅieḅẹlẹ na lọkọlọkọ na ḅụ fịmẹ, inia ojuma iḅi mḅọrị-mḅọrị ma simemẹ.

²⁵Ísíapụma ini ngịsị ḅieḅẹlẹ nyanakẹ; ini ḍumo se fịmẹ akụ kuḅie ḅụ.

²⁶Ọkụma nwenimgba gbọrị ḅaraḅụ fịmẹ se ini pịkị ini ḍipimẹ; ngule inimgba oju gbẹịnmẹ.

²⁷À nemimẹ ọ́ nyana ị̀ pịrị si koroma ma.

²⁸Ó gbelaḅẹ, “Nde mịọkụ opuḅọ ḅe oria warịma, sitịḅị nyanaḅọ ḅe oria ikowarị mị nde anga omi?”

²⁹Ma ọ́ jịn anga mun apụ na ọkwẹịnmaka? Ini ọkịḅo ḍukoaye ma ó nemika?

³⁰Anị ene Tamụnọ Ḅe ịganị se fomuḅara se nweni pịrị sịkị, sitịḅị nyanaḅọ ḅe anị sịkịmamgba si ḅụ ḅarasin pịrị nyana nyanaye.

³¹Ḅẹrẹ ḍuko sitịḅị nyanaḅọ ḅe tịḅị gbanaḅọ ofori-ẹ anịkanịka ọ̀ mịẹaye mamgba se vinpịkị ọ̀ gbẹịn.

³²Ini ò deki ḍụẹịn ḍipi nyọ mun sịkị, anị ini iḅiọkụma koru iḍupuma,

³³kịẹnḅịa ọkụ oforika tomoni ḅo ḍụẹịn ḍipi mbo mị ḅụ sọ sụngụma mun mẹ se, kiri mị sọ dein deinma ọ̀ ḅụ saramẹ.

³⁴Se ị́rị́! Ị́rị́ tịḅị oforika ḅara se ị̀ kuḅie kụrọmaḅẹ! Ị́ya pẹkẹrẹ ḅịpị goyegoye iruoye-ẹ!