Read kirikeni Job 22 Bible Online

Job 22 - kirikeni bible

Job 22

¹Tụḅọ gbọrị tomoniḅọ omi, yenemitẹịnḅọ ḅe sọ, anị Tamụnọ Ḅe ḅụ ye sọ ḅọ?

³Ị́ya karakaraye mịẹ mị anị sọye mịẹ Tamụnọ Ḅe pịrị, anịkanịka ị́ya iḅi anị ḅarachụa ọ̀ pịrị?

⁴Ị́ ḅalafa ḅụ Tamụnọ Ḅe tọrọkọ chịẹ ẹrẹchị ori ị́ ḍiki ịganị se ị́ ọkịḅo ḅẹrẹkọn ḅie chukẹ.

⁵Ẹn-ẹn, yetịḅị anị ị́ opuma mịẹirima nyanasam; ị́ mịẹ si mamgba gose-ẹ.

⁶Ị́ ḅara safị mịnaḅọ mịẹse ori ị́ ḅara ọlọ igbiki mị gbẹịn gose, ị́ oria oju sime ḅụchụayema sin ọkị se papaḅụ na ọ̀ wẹrịsomẹ.

⁷Ịnyọ ḅụ fasapụ ma ị́ mengi se ini pịrịkẹ, pịkị fịye se ḅurupụkọtarịapụ ma pịrị ḍụkụkẹ.

⁸Ị́ya kụrọ na ị́ya chịẹkiri na ị́ nwọse kiri mamgba ọkịmẹ.

⁹Deapụ koroma fị eremeni ma ị́ ḅarachụa ini pịrịka mị ngẹrịkẹ, ọkụma ị́ pịkị ḍapụ fịsa awọma furu pịkị inia tọrụsiọrịmamẹ.

¹⁰Mịn ḅụ mịọkụ ị́ sokorosọḅịa olulu ị́ kelemamẹ, pịkị ḅụnemika ḅalafa ị́ ḅụ ḅeinmẹ.

¹¹Anị opuma kanakana ẹrẹchị ị́ ineda ye ọrị ẹkẹ, se opu mengi ị́ gbẹịn gbitipumamẹ.

¹²Tamụnọ Ḅe geletẹịn soḅie ò sime se ọ̀ tọrụtu lolia ma ḍikika, àrị gele nyọḅụ omi-ẹ nwọḅẹ sọnị?

¹³Anịsọ ị́ gbelaḅẹ, “Tamụnọ Ḅe ò che nemi? Soḅuno kọkọ ò kikima—nde ori ineda ḅẹrẹkọn wa pịrịḅịa ọkụ?”

¹⁴Ị́ chịn ḅara kpo soḅuno ma ineda ò kikima ḅe ye ọrị ḅụ, ọ̀ nwọ so mị ọgọnọ nwẹngị àrị sịkị.

¹⁵Ị́ ineda kuḅiekụrọma olomu ateli mị ḅie nwẹngị ḅe siyemịẹapụ ma sịkịmamgba ḅọrọarị nyọ mị?

¹⁶Inia sịkị ma laka simeogbo, opu mengi ini sịkịrị sinmẹ.

¹⁷Mịnapụ ma anị Tamụnọ Ḅe sịkị apụ ma-ẹ, se ḅerenimẹ na ò se ini mịẹḅịa gbọrịye sọ ofori-ẹ.

¹⁸Anịsọ ori Tamụnọ Ḅe anị mịẹse mịẹye inia ḅara sọye-ẹ— àrị ineda kaịnḅokẹ sitịḅị nyanapụ koroma ma sime ọkụ.

¹⁹Iḅiapụ ḅieḅẹlẹmẹ pịkị ḅẹrẹnemikapụ ḍẹrịmẹ ini sitịḅịnyanapụma fomuḅara ọrị sịkị.

²⁰Sitịḅịnyanapụma nyanaye mamgba sifamamẹ, fịnị kọnye mamgba dọkịma sinmẹ.

²¹Mịọkụ, Job, Tamụnọ Ḅe na ḅẹrẹfama se dein nyana se ḅarị ị́rị́na-tarakaḅọ ḅara se ori ọkịma; ị́ ọkọ ye mẹ ḅẹḅẹ, ori ị́ ḅẹlẹmaḅịa.

²²Oria ḍieaye ma ọkị; ị́ kuḅie oria ọkwẹịn ma koko.

²³Iin, ḅụiderima ḅara ḅụ vinpịkị Tamụnọ Ḅe damamun se ị́ya warịḅie mịẹ siaye mamgba àrị kuluma nyana.

²⁴Ị́ya goli mamgba tan wokuma; ị́ya iḅitẹịn goli mamgba ọkị mun fịḅịsa ideri mengi ḅụ sara.

²⁵Ye Kụrọmamgba Nyana Tamụnọ Ḅe ị́ya goli sọ, se ye tan-kpokponimasa seleḅa ọ̀ nwọ sọ ị́ pịrị.

²⁶Anịsịkị ị́ kuḅie se Tamụnọ Ḅe ḅụ sịkịmamgba gbanaḅịa se ị́ ḍọkịḅo ọrịḅịa na ori anị ị́ya ḅieḅẹlẹ-ẹ.

²⁷Ị́ tẹkẹ sịkị, ori ị́ pẹkẹrẹḅịa, se ị́ ḅereniaye ma ị́ nwọ gbẹịnḅịa.

²⁸Ị́ mịẹye goyegoye ḅịrị ị́ pịrịḅịa, se enekuḅu ị́ya ateli ma ḅụ ḅịaḅịa.

²⁹Tamụnọ Ḅe opuaye mịẹ apụma iderimamẹ se ḅụ-iderimapụ ma ḍụamẹ.

³⁰Ị́ mịẹ siye ofori-ẹ ḅẹḅẹ ori ị́ ḍụaḅịa, nemikase ị́ karakaraye mịẹ ọkụma.