Read kirikeni Job 23 Bible Online

Job 23 - kirikeni bible

Job 23

¹À pa Tamụnọ Ḅe dapaka pịkị ḅẹrẹsuamẹ; àrị ineda ị̀ya ḅiefie mị ọlọchịẹma ẹkẹ.

³Aye, mgbọkụ àrị ọ̀ ḍọkịḅoḅịa nyọ à nwọ nemi ọkụma, se pịkị ò sime nyọ munḅịa ọkụ nemi ọkụma.

⁴Àrị ị̀ya ḅẹrẹ mị se ọ̀ tọrọkọ koroma ḍukoḅịa se ị̀ ḅara iḅiḅịaye mamgba à nwọse ọ̀ tọrọkọ koromaḅịa.

⁵À ḅiḅịa ò ḍukoḅịaye à nwọ naa, se ọ̀ pịkị ị̀ pẹkẹrẹḅịa ọkụ na.

⁶Tamụnọ Ḅe oria ịnyọ mgba ọ̀ nwọse ị̀ dapakaḅe? Ẹn-ẹn, ori ị̀ pokiḅịa àrị ọkwẹịn àrị sịkị.

⁷À karakara ḅụ omi-ẹ; àrị ineda Tamụnọ Ḅe na ḅẹrẹ ḍukoḅịa; ò ḍiepakụmaḅịa ngịsị à mịẹ siye oforika ọkụ.

⁸Àrị ọ̀ ḍọkịmẹ ịrụapakapaka nyọ ḅụ, ọkụma anịju Tamụnọ Ḅe ori ofori-ẹ; à pịkị ori ọrịkẹ àrị ịrụasọsọ nyọ ọ̀ ḍọkị sịkị.

⁹Tamụnọ Ḅe Ọgọnọju na Chukuju na ọ̀ fịrịnwẹngịaḅẹ, ọkụma à pa ori ọrịkẹ.

¹⁰Anịsọ ị̀ya nwẹngị ḅụọ goyegoye Tamụnọ Ḅe ò nemimẹ; ò nemikase ị̀ ḍaḍiki ọkụma, ọ̀ ḍọkịḅo ọrịḅịa na à siyemịẹkẹ.

¹¹À kuḅie-se-gbana-ḅaraḅụ ọ̀ sẹlẹ ateli mị nwọ ḍuko nwẹngịmẹ; se ngịsị pịkị nwọ da pịkị nwọ da ḅara se nwẹngịkẹ.

¹²Tamụnọ Ḅe tọnye tọnye mị à mịẹmịẹye-ẹ; ò ḅiye anị à ḍuko nwẹngịarịye-ẹ, ị̀ kuḅie tọn ayema kẹ.

¹³Ò ḍinmaḍinmakẹ. Ori na tụḅụrụḅịaḅọ ofori-ẹ anịkanịka ọ̀ mịẹḍọkịye ḅụ ò kikiḅịaḅọ ofori-ẹ.

¹⁴Ọ̀ mịẹḅịa gose ọ̀ tọn ị̀ pịrịsaye mị; anị mị anị ọ̀ tọn ḅakaye ma ḅụ gbọrịye-ẹ.

¹⁵Ḅalafa ḅụ ị̀ ḅụgeregeremẹ ọ̀ tọrọkọ.

¹⁶Kụrọmamgba Nyana Tamụnọ Ḅe ị̀ya kuḅie kụrọ mị kansam. Tamụnọ Ḅe-ẹ, kanakana mị kẹ, ị̀ mịẹse à ḅalafa arịye-ẹ— kanakana mị ị̀ tọrụgbẹịn sọ.