Read kirikeni Job 24 Bible Online

Job 24 - kirikeni bible

Job 24

¹Cheye gose Tamụnọ Ḅe ọ̀ ḅẹrẹkọnḅịa sịkị mị tọnka, ḅẹrẹkọn fịrịnwẹngị ọ̀ pịrịarịapụ ma pịrịḅịa gbọrị ene?

²Tomoni ini se eke maḅụ elekima chụa ḍụparị ma sinmẹ mịẹse ini ḅaka kiri nyanaḅịa ḅara; ini anana furu se inia anana ogbo ḅie chụamẹ.

³Ini ḍapụ koroma fịsa awọmẹnịma nyana yepụra asụnma ọkịmẹ, se ḅarị deḅọ nyanaka eremeniḅọ ma fịsa gose árịa owoi nambuloma ọlọchịẹmamẹ ọkịmun árịa sa mị à nwọ gbẹịn sịkị la.

⁴Igwein apụma nyana gbẹịn ayema ini kikimẹ, se kụrọ ḅara se yenyanakapụ ma de mangịma mun ḅọịmẹ.

⁵Mịn mị ḅụ igwein apụma gelegele yepụra asụn kịkẹ ḅara se fịye ḍọkịma ḅọrọmẹ samịna onwun eleḅie; jịn anga ofori-ẹ ini ineda fịye ḍọkị inia awọ ma pịrịḅịa nyọ.

⁶Ini ma nyanaka ozuma ḅie mị ini ye soku fịarịye-ẹ, se ini sitịḅịnyanapụ irumịẹ chịnma ozuma ḅie sọ arịa mgbọlụma kaịn kpokponimamẹ.

⁷Ḍin ḅie ḅụgbẹịnye ofori ḅụ ini mọnọmẹ, se oḅoku dedeye sọ ofori-ẹ.

⁸Tụndụ ma ọgọnọ koro ene ini pisimamẹ, se ḍụparịma aka ḅụ ini kpokponima tịḅị kikimamẹ.

⁹Siye mịẹ owuapụ, ḍapụ nyanaka awọ ọkị se omoniapụ mịẹmịẹ se, igweinḅọ ḅe awọma ọkị se sagbẹịnmẹ.

¹⁰Ọkụma igwein apụma ini pakaḅịa sịkị se iniaḅụ gbẹịnḅịa ḅụchụaye ofori ḅụ; ini fịturu mịẹ ịpịamgba pẹlẹ àrị sịkị ḅuru ini tarịḅịa.

¹¹Ini oliv pọnjị pulo mịẹmẹ, se pịkị chịnmgbọlụ se ere iru mịẹmẹ, ọkụma inina-mịnaḅụ-na mengi ini tarị aḅẹ.

¹²Opuama ma ḅie yela se fịarịapụ ma owupakụmamẹ ḅarachụa gose, ọkụma Tamụnọ Ḅe inia tẹkẹma sịkịmẹ.

¹³Enekuḅu mị anị sịkịarị tomoni omi-ẹ; ini anị kaịnḅokẹ anịkanịka ini pịkị anị mun-arị anga ḍukomunkẹ.

¹⁴Ene ḅaḅụ niniḅọ ḅe ọ̀ sịsẹmẹ se paka mun igweinḅọ ḅe ḅaamẹ, se ḍin ḅụ ò furumẹ.

¹⁵Sẹfị ḅọ ḅe ò korumẹ ḅaso la; ori ọ̀ tọrụ gbẹịnmẹ nweni ori ọrị ẹka ḅara.

¹⁶Ḍin ḅụ furuapụ warịma kansọmẹ, ọkụma enekaka ini ḅọịmẹ se enekuḅu mị tọnmẹ.

¹⁷Ini enekaka mị ḅe ḅịa mị ḍiki ḅalafamẹ, ọkụma kanakana mị ḅalafamaye sọ ini pịrịkẹ.

¹⁸Sitịḅị nyanapụ ma opu mengi ini ọfịnsinmẹ, se ini nyana kirima Tamụnọ Ḅe worinime ḅụ àrị omi-ẹ, ini ḅarị inia ere irumịẹ chịnma ḅie mun fịrịnwẹngịkẹ.

¹⁹Sino ọwụ ḅie na otoku ḅie na maịn fa ọkụ, mịn siyemịẹḅọ ḅe ḍumo apụma ogboku maịn fa ọkụ-ẹ.

²⁰Inia nyengiapụ ma pembe ini se ḅiekoromakẹ mịọkụ; ngule ini pẹịsam se ini kan kọsịmasam, ḅịkị eje sime ọkụ.

²¹Anị ọkọ pakamẹ anịatịḅị ini deapụ nyanakapụma mịẹsimamẹ; se pịkị iḅiye mịẹ awọ nyanaka eremeni ma pịrịkẹ.

²²Tamụnọ Ḅe, oria ịnyọ ḅụ, kụrọnị ma kan kọsịmamẹ; Tamụnọ Ḅe mịẹmẹ—se sitịḅịnyanapụma fịmẹ.

²³Tamụnọ Ḅe ineda ḅereniḅịa ini koko se ini ḍumo, ọkụma sịkịmamgba ọ̀ tọrụmgbọlụma se iniaḅụ wẹrịmẹ.

²⁴Kalasịkị ḅụ sitịḅịnyanapụma mịẹye inia ḅarasọmẹ, ọkụma osuein kịkẹma ḅaraḅụ ini nyọnịmẹ, pẹlẹ koromasa ịpịamgba ịkpangị sime ọkụ.

²⁵Ineda pikiḅịaḅọ omi na mịn mị ọkọ sime mẹ? Ineda ḍukoḅịaḅọ omi, ḅẹ na ị̀ya ọkwẹịn ma karakarakẹ?