Read kirikeni Job 28 Bible Online

Job 28 - kirikeni bible

Job 28

¹Olulu omi-ẹ ini seleḅa sokuarị nyọ; Jịn anga omi-ẹ ini goli sanị àrị nyọ.

²Tomoni kiri ḅie ikulele soku pakụmamẹ Pịkị ḍụparịma ḅụ kọpa sanịmẹ.

³Tomoni gbuntẹịn kanakana nyọma ḅie ye ḍọkịmẹ. Kiri chuku ma ḅie ini ye ḍọkịmẹ Ini pịkị kanakana kiri mị ḅie ḍụparị sokumẹ.

⁴Gbọrịḅọ sọ ngịsị ma angaka ḅọlọ nyọ ḅụ Anịkanịka tomoni ngịsị ma nwẹngịḅọrọka nyọ, Tomoni kiri ḅie gbun olulu sokumẹ yela ḍụparị gose. Anịanga ini gbọịnma fịrịnwẹngịmẹ, Ọgọnọ ḅụ ini ḍiki kpọ olulu mị ḅie chu se ḍiki ma ini kapụma nwọ ọlọmẹ.

⁵Kiri mị ḅie fịye sẹnị pakamẹ, Ọkụma anị gbọrị kiri ḅie anị Ye mamgba pikiri pakaḅo kọsịye-ẹ.

⁶Kiri ḅie ḍụparịma ḅie yela ḍụparị omi-ẹ, Se anịa fọn ḅie goli omi-ẹ.

⁷Gbọrị igo sọ ḅọrọ olulu ma sọ ateli ọrịkẹ, Pịkị gbọrị ẹdẹlẹ sọ fin anị nyọ ḅọrọkẹ.

⁸Gbọrị chịrịḅa sọ anịkanịka jịn-a kụrọ nama sọ Arịa gbọịn ateli ma ḅọrọkẹ.

⁹Tomoni kụrọtẹịn ḍụparịma sokumẹ, Tụndụ ma soku sin mun chuku lamẹ.

¹⁰Ini tụndụma kantolu ḅọrọ sịkị, Ini yela ḍụparị ọrịḅomẹ.

¹¹Ini soku mun ideri mengi ma tụḅụ ma lamẹ Se ḅọịye sokupakụmaḅo enekuḅu lamẹ.

¹²Ọkụma ndeju wa nemi ḍọkịḅo ḅe? Ndeju wa ineda ḍawọ se nemi ḅe?

¹³Nemi mị tomoni ogbo ḅie wa anị ḍọkịḅo ẹkẹ; Anị jokoma laye nemiḅọ ofori-ẹ.

¹⁴Abaji ma na tọrụ ma na ḅe owoloma Ọkọ ḅẹmẹ na nemi mị anị nyọ ḅụ ofori-ẹ.

¹⁵Ini ineda seleḅa anịkanịka goli na se anị fẹ-ẹkẹ.

¹⁶Iḅitẹịn goli na yela ḍụparị na Ineda anị laye na gbasịkẹ.

¹⁷Anị yela goli nẹngịmẹ na goli tẹrẹye anịkanịka iḅitẹịn goli ọmọngọ nẹngịmẹ.

¹⁸Nemi mị laye ḅakatẹịn Kịlarị anịkanịka karamịnị-ịla anịkanịka opuma yela olo nẹngịmẹ.

¹⁹Ị́ ineda iḅitẹịn yela ḍụparị na yoriyori goli na Se nemi mị laye na otoma ẹkẹ.

²⁰Anịọkụma nemi mị ḅe chuku ndeju omi? Ndeanga wa ineda ḍawọ se nemiḅe?

²¹Ḍumo nyanaye goyegoye sọ ineda anị ọrị ẹkẹ, Fin ḅọrọ àrị feni sọ.

²²Fị na fa na sọnị Ḅerenimẹ na ḅeri ḅụ mị ini anị ọwụmaye-ẹ.

²³Tamụnọ Ḅe kẹngẹ mị nyọ mị nemiye-ẹ, Nemi mị ini nwọ ḍọkịḅoḅịa nyọ,

²⁴Anịatịḅị ori anị tomonikiri mị ḅe ịkọlị ma ọrị, Pịkịna so chuku ḅie sime aye mamgba ọrịye-ẹ.

²⁵Tamụnọ Ḅe fọrụ mị anịa kụrọ se anị pịrị sịkị Ọ̀ pịkịna tọrụ mị ḅe nangwọ na finji na tọn mẹ;

²⁶Tamụnọ Ḅe ene mị koroḅịa nyọ tọn sịkị, Ọ̀ pịkịna soalagba-ḅuno na ḅọrọḅịa nyọ ma tọn mẹ;

²⁷Anịsịkị anị ò nemi mị ọrị se anị laye ḍaḍikiye-ẹ— Ò ḅo ḅara pụnụ anị pịrịmẹ.

²⁸Tamụnọ Ḅe nwọse tomonima ḅẹmẹ, “Ó nemi nyana ḅiḅi, ọ́ Nyanaḅọ Ḅe ḍikiḅalafaḅịa. Ó yekaịnḅo ḅiḅi, ó simịẹmịẹye ḅụ ḅụsinḅịa.”