Read kirikeni Job 30 Bible Online

Job 30 - kirikeni bible

Job 30

¹Ọkụma mịọkụ ị̀rị̀ ḍin se nẹngịapụ ị̀ se kpọtiaḅẹ! Inia ḍapụma yeḅụsọka so ọkụma à ḅereni ẹkẹ ini ḅarachụa ị̀ya obirima pịrị se àrị ananama koru.

²Ini anị ịnyọ opuma ḅụ fasa owuapụ-ogbo-ẹ, ḅakama fịrịnwẹngị ị̀ pịrị ịnyọ nyanakapụ.

³Ini igweinmẹ se fịye ini tarị-so-ọkụma ini samịna chịn-ịkuno tokuruḅịa— ḍin ḅie, opu piri ḅie, gbọịn nyọ ḅụ.

⁴Ini onwun ele ḅie chịnma bura pakụma se àrị fịmẹ, kọrọ chịnma pembe sọ, fị ḅẹlẹka kuno ma.

⁵Nwenimgba oloku ḅụ ini demẹ, ini furuapụ tịḅị oloku ọkụ.

⁶Ini pokoloma ḅie angamẹ, tụndụ aka ma ḅụ ini soku ḅụkụ ma ḅie.

⁷Opu-a piri ma ḅie ini nama oloku ọkụ olokuma ḅọrọmẹ se pịkị finma ḅọrọmẹ piri ma ḅie.

⁸Yeḅụsọka ḅe ẹrẹ nyanaka pịkị tọrụ oforikapụ! Ama ḅie ini ini demẹ.

⁹Mịọkụ ini ḅo ị̀ ḍẹrị aḅẹ; à ḅo yeḅụ oforika pịkị ḍẹrịye sọsam inia ḅụḅụ.

¹⁰Àrị inia ḅụnwọnwọmasam; ini chịnmẹ ini opuma iḅi ị̀ nẹngịmẹ, se ḅo fụla se ị̀ tọrụ saramẹ.

¹¹Tamụnọ Ḅe ori ị̀ mịẹlọkọma pịkị ḅarị ḅarachụa nyana ị̀ pịrịka ẹrẹchị, ini kụrọma tọrụ pịkị ị̀ damẹ angana angana ḅụ.

¹²Mịn kpo mị dada ị̀ dapakamẹ; ini mịẹse à mangịmẹ; inia kuluma owu ini nwọse ị̀ pakamẹ.

¹³Ini ị̀ pẹlẹma ị̀ya ateli ma pụnmamẹ se ị̀ simaḅịa ọkụ ḍọkịmẹ; pịkị ini kikiḅịaḅọ ofori-ẹ.

¹⁴Ini ị̀ya ḅụḍụa ḅọkọ ma kantolumẹ se sọḅo ị̀ pụnụmamẹ;

¹⁵opu ḅalafa ị̀ nẹngịmasam; ị̀ya osi fọrụ ḅara se ḅọrọsosam, se ị̀ya mịẹyeḅarasọ mị soḅuno ḅara se ḅọrọsam.

¹⁶Mịọkụ à fị ẹtọn aḅẹ; ị̀ya tọrụsiọrị ma ḅie ḍụaḅọrọma ofori-ẹ.

¹⁷Ḍin ḅụ ị̀ya imgbe mamgba fụkamẹ; ị̀ onwoin àrị fụka mị pẹlẹkẹ.

¹⁸Tamụnọ Ḅe ị̀ kọngọ ọlọ se ị̀ fọngọlọmẹ, ọ̀ kụrọḅara se ị̀ya ḅụchụayema ọlọ se pụrụkụ mẹ.

¹⁹Ori ị̀ se ọpọtọkọ ḅie gbinmẹ; àrị iḅi ịlọlị nẹngịkẹ.

²⁰Àrị ị́ chịnmẹ, Yei Tamụnọ, ọkụma ị́ ḅifiekẹ; à pịkị ị́ tẹkẹ sịkị, ị́ tọrụ pịkị ị̀ ḍikikẹ.

²¹Ị́ tọrụgbẹịnma siḅara se ị̀ mịẹ-aḅẹ; ị́ya kụrọmamgba ị́ se ị̀ tọrụsiọrịmamẹ.

²²Ị́ ḅereni fọrụ mị pịrịmẹ anị ị̀ vukumasin; fiearị irisi mị ḅie ị́ ị̀ se gbinma ḅọrọmẹ.

²³À nemimẹ ị́ ị̀ se ị̀ya fị mị jua aḅẹ; anị sime ọrụḅọḅọ pịrịye mị.

²⁴Ị́ che gose kọsịsa tomoniḅọ dapaka, ineda gbọrịye sọ mịẹka se ḍikiḅụgerere ḍọkịarịḅọ?

²⁵Ḅụfụka ḅie sime apụma àrị ini na owu pịkị ḅarachụa ḅi apụma ḍikiḅụgerereka?

²⁶À tọrụ se ḅieḅẹlẹ na enekuḅu na ḍikimẹ, ọkụma tọrụsiọrị na kanakana na mị àrị ọrịye-ẹ.

²⁷Ḅụḅalaḅala na oju akụ na ị̀ kankọsịmasam; imbikia-imbikia ḅe tọrụsiọrị à nwọ ọrịsam.

²⁸Àrị ngịrị ḅụ kanakana ḅie nwẹngịma ḅọrọmẹ, ịrụa ḅịa ị̀ lakẹ; à tomoni ogbo ḅie chịẹ se ḅarachụa ḍọkịmẹ.

²⁹Ị̀ya owupụkọ kururu nyana pịkị kpọngọlọmẹ piri obiri anịkanịka ọjụ-feni owupụkọ kịkẹmẹ.

³⁰Ị̀ya ojuapụra ḍinma ḅo kurukurusam; obi ị̀ dọkịma aḅẹ.

³¹Gbọrị sịkị à ḅieḅẹlẹma nime naamẹ, mịọkụ ḍụẹịn ḍin na owu na kẹngẹ mị à naa arịye-ẹ.