Read kirikeni Job 33 Bible Online

Job 33 - kirikeni bible

Job 33

¹Se mịọkụ, Job, gbẹlẹma poki à nyana ḍukoḅịaye mamgba ḅụ.

²À ḅụkarakaramamẹ ị̀ kuḅie simeaye ma ḍuko.

³Ị̀ya ọkwẹịnmgbọlụ mamgba karakaramẹ, à pịkị karakaraye mị ḍukoaḅẹ.

⁴Tamụnọ Ḅe tẹmẹ mị ị̀ mịẹmẹ, se pịkị ḍumo se ị̀ pịrịmẹ.

⁵Ị́ ineda ḅịa ḅẹḅẹ ị̀ pẹkẹrẹ. Ị́ya ḅẹrẹ ma karakarama.

⁶Ị́rị́ na ị̀rị̀ na gbọrịye-ẹ Tamụnọ Ḅe tọrụkuḅu, mine mamapụ ma aḅaịn ḅụ ọ̀ wa tẹmẹ pakụmaḅomẹ.

⁷Anịgose ị́ ị̀ ḍikiḅalafaḅịaye ofori-ẹ; à kụrọ ị́ pụnụma-ẹkẹ.

⁸Mịọkụ mị ị́ ḍuko se à naaye-ẹ:

⁹“À ḅẹrẹsi nyanakẹ; ma àrị iriye mịẹkẹ. À mịẹye ofori-ẹ, à pịkị mịẹirima ḅụ pọkọ waraḅẹ.

¹⁰Ọkụma Tamụnọ Ḅe ẹmbẹ ḍọkị ị̀ dapaka aḅẹ se tarakaḅọ ḅara se ị̀ mịẹmẹ.

¹¹Ori ikoli se ị̀ ḅụọma ịkasịmẹ; à kọn nwẹngị la-ọkụ-la-ọkụ ori ẹnyẹmẹ.”

¹²Ọkụma à ḍuko ị́ pịrịaḅẹ, Job, ị́ ḅara simẹ. Tamụnọ Ḅe ọ̀ ḍụḅatẹịn ḅẹḅọ ḅẹḅọ nẹngịmẹ.

¹³Cheye gose ị́ yese Tamụnọ Ḅe pụnụma-ao na ngịsị wa se ò suarịye ma ọ̀ pẹkẹrẹ-pẹkẹrẹkẹ?

¹⁴Tamụnọ Ḅe sịkịna sịkịna ori ọkwẹịn ọkwẹịnmẹ nwọḅẹ sọ, ò ḍukoye poki gbọrịḅọ sọ ofori-ẹ.

¹⁵Tomoni ḍin ḅie mọnọ àrị sịkị, Tamụnọ Ḅe ọ̀ ḍawọḅụ na tẹmẹ ḅie ọrịaye ḅụ na ọkwẹịn ọkwẹịnmẹ.

¹⁶Ori ini mịẹmẹ ò ḍukoye ini nwọ poki, se oria ḅerijine ọkwẹịn ma inia ḅalafamamẹ.

¹⁷Tamụnọ Ḅe ori ọkwẹịnmẹ se inia nwẹngị irima ma kiki se pịkị ini ḍụamẹ inia opuaye mịẹ ma ḅie.

¹⁸Ò ḅi-ẹkẹ ini ini kankọsịma; ori ini ḍụamẹ fị mị na mịnaḅụ na ḅie.

¹⁹Tamụnọ Ḅe obi na oju akụ na se tomoniḅọ ḅe sẹịnmamẹ se ọ̀ datekeremaḅịaye gose.

²⁰Fịye pụkọ obiḅọ ḅe ḅụ ḅarị ofori-ẹ, iḅitẹịn fịye mị ḅoju ḅarị ḅẹlẹkẹ.

²¹Oria oju kwẹrị-kwẹrịfa aḅẹ; ị́ ineda oria oju ịmgbema ọrịḅịa;

²²ọ̀ fịapụma sẹkiri mun-ẹtọn-aḅẹ.

²³Ḅụpalịka enjẹlḅọ ḅo ḅarachụa ọ̀ pịrịḅịa— Tamụnọ Ḅe kịẹnḅịa ọkụ oforika enjẹlapụma ḅie gbọrịḅọ anị tomonima nwẹngị na gbẹịn-a fịrị ma se inia ḅiekoroma koromaḅọ ḅe-ẹ.

²⁴Ḍikiḅụgerere ḅụ enjẹlḅọ ḅe nwọ ḅẹḅịa, “Ómine ọ̀ ḅụ ḅarasin! Orikẹ anị fịapụma sẹkiri munḅịa ḅọḅe. Mịanga anị ini omoni ḅara ḅie ọ̀ pẹkẹrẹ pakụmaḅoḅịaye-ẹ.”

²⁵Oria oju anị ịwọ ḅụ sẹnịḅịa se pịkị kụrọḅịa;

²⁶ọ̀ tẹkẹḅịa sịkị, Tamụnọ Ḅe ori ọ̀ naaḅịa; ò ḅieḅẹlẹ ḅụ Tamụnọ Ḅe tẹkẹḅịa; Tamụnọ Ḅe ọ̀ pịkị kpoto ye se ọrụtọn ọ̀ pịrịḅịa.

²⁷Ọrụḅọḅọ tomoni ogbo ḅie ḅẹḅịa, “À nwẹngị irimasam. À karakaraye mịẹkẹ, ọkụma Tamụnọ Ḅe ori ị̀ wẹrịsomẹ.

²⁸Ori ị̀ kikimẹ fịapụma sẹkiri mun ḅụ, se à pa ḍumo waraḅẹ.”

²⁹Tamụnọ Ḅe pa ḅarị-ḅarị mamgba mịẹ-aḅẹ;

³⁰ò tomoniḅọ ḍumo ḍụaḍụamẹ, se ḍumo mị ḅe ḅẹlẹ se ọ̀ pịrịmẹ.

³¹Mịọkụ, Job, à ḍukoarịye poki; yawụma sime se àrị ọkwẹịn.

³²Ọkụma ị́ ḍukoye nyanamẹ nwọ ḅẹḅẹ, ye àrị anị naa à ḅieḅẹlẹ ḅaraḅụ ḅereni ọkịḅịa na ị́ karakara ḅụ omi-ẹ.

³³Ọkụma ọkọkẹ nwọ ḅẹḅẹ, yawụma sime se ị̀ poki, se à se ị́ ḍieḅịa ị́ ḅara-wẹrịma nemi nyanaḅịa ọkụ.