Read kirikeni Job 34 Bible Online

Job 34 - kirikeni bible

Job 34

¹Ómine tomonima ómine opuma yenemimẹ, ọ́ pịkị opuma ọbịrịmẹ; mịọkụ à ḍukoarịye poki.

³Fị ḅụ ị́ ḅẹlẹ fịye nemiḅịa, ọkụma nemi ọkwẹịn ma naa ḅụ ị́ nemi nyanaḅo ẹkẹ.

⁴Mịna ḅara omi-ẹ ḅẹrẹ mị ḍukopẹlẹ.

⁵Job ḅe ḅereni ọkịmẹ na ọ̀ mịẹsiye ofori-ẹ, na Tamụnọ Ḅe karakara mị se ọ̀ pịrị ḍụkụkẹ.

⁶Ò gbelamẹ, “Cheye gose àrị iruo kọnḅe na à mịẹirimamẹ? Ye ḅakama ị̀ lamẹ, si ị̀ ḅụ ofori-ẹ nwọḅẹ sọ.”

⁷Job ḅe kịkẹma tomoniḅọ jene ómine ọrịsa? Ori osi nyana Tamụnọ Ḅe pịrịkẹ.

⁸Siye mịẹ apụ ogbo anị ọ̀ ḅụḅẹlẹye-ẹ se ọ̀ pịkị si apụ na nwẹngịma ḅọrọḅọrọmẹ.

⁹Ori ọkọḅẹmẹ na ngịsị anị gbọrị iḅi sọ mịẹkẹ tomoniḅọ Tamụnọ Ḅe tọnye ḍuko nwẹngị.

¹⁰Ómine ị̀ poki, ómine yekaịnḅo apụma! Kụrọmamgba Nyana Tamụnọ Ḅe ori ineda karakarakaye mịẹḅe?

¹¹Tomoniḅọ mịẹye ḅụ mịn ori nụḅọ gbẹịn-arịye-ẹ pịkị ò ḅi ḅara se ori na angamẹ.

¹²Kụrọmamgba Nyana Tamụnọ Ḅe ò siye mịẹmịẹkẹ; ngịsị ọ̀ si ḅẹrẹkọn gbọrịḅọ sọ pịrịpịrịkẹ.

¹³Tamụnọ Ḅe oria kụrọ jụmḅọ ḅara ori anị nyana ḅo? Tomoniḅọ ò se sẹkiri da kiri ḅụ koroma?

¹⁴Tamụnọ Ḅe nemikase ḍumo pịrị ịnyọ mị ọkị ọkụma,

¹⁵ḍumoḅọ goyegoye fịḅịa ini fị se pịkịma ḅo fọn sọḅịa.

¹⁶Mịọkụ ómine ị̀ poki, ó nemikase yenemimẹ ḅẹḅẹ.

¹⁷Ọ́ ḅẹrẹ ḅarasi kọn karakara Tamụnọ Ḅe ḍuko pịrị-ao? Ọ́ chịn ḅara ọ̀ karakara ḅẹrẹkọn ḅịpị mị ḍikiḅụnwọnwọ?

¹⁸Tamụnọ Ḅe ọ̀ ḅẹrẹsi kọn amanyanapụma na ḅẹrẹtọn apụma na pịrịpịrịmẹ ini ḅarị yeḅụsọka anịkanịka sitịḅịnyana sịkị.

¹⁹Ọ̀ ḅẹrẹtọn apụma ju sọsọkẹ anịkanịka ngọ nyanapụ ma ḅụ sọ se igwein apụma pụnụma-pụnụmakẹ, anịatịḅị ori anị nwenimgba tẹmẹye-ẹ.

²⁰Tomoniḅọ ineda ḅụnemika ḅaraḅụ ḍin ḅie fịḅịa. Tamụnọ Ḅe ori ineda tomoniḅọ ḅakụgbin se ò sokoro fịḅịa; Ịnyọ famaka ḅaraḅụ ori opuapụma ḅaasinmẹ.

²¹Tomoniḅọ nwẹngị ḅụọ goyegoye ori anị ẹnyẹmẹ.

²²Tamụnọ Ḅe tọrụkuḅu simịẹḅọ ḅe ḅọị ḅịa gbọrị sitẹịn kanakanasọ ofori-ẹ.

²³Tamụnọ Ḅe ọ̀ sịkị nyanakẹ sịkịpẹlẹ tomoni pịrị ọ̀ ḅẹrẹkọn ọ̀ pịrịḅịa sịkị.

²⁴Ọ̀ tatarị ḅẹrẹchuku ḍọkịḅọ so sịkị ọ̀ tịḅịnịma sin se jịn apụ se inia kirima ḍinmaḅịa sịkị ọ̀ nyanakẹ.

²⁵Anịatịḅị ini ye arịye ò nemimẹ; ori ini sumagbin se ini kọsịmaḅịa gbọrị ḍin ḅụ.

²⁶Ò fomuḅara se simịẹapụma pịrịmẹ nwenimgba tọrụkuḅu,

²⁷anịatịḅị ini ò ḍukonwẹngị ḅụ dachịẹsam se ọ̀ tọn aye mamgba sịkịsam.

²⁸Ini anịkanịka ḅara se igwein apụma mịẹse ini Tamụnọ Ḅe chịn owumẹ, se ọ̀ pịkị inia chịnḅịpị mị naamẹ ḅarachụa ḅụ.

²⁹Tamụnọ Ḅe nemikase tọnpẹlẹsam na ọ̀ gbọrịye sọ mịẹkẹ nwọḅẹ ọkụma, gbọrịḅọ sọ ofori-ẹ ò fiesimaḅịaḅọ. Ò nemikase ọ̀ tọrụ ḅọị ọkụma, tomoni ineda mịẹḅịaye ofori-ẹ.

³⁰Sẹ ma ineda mịẹḅịaye ofori-ẹ se Tamụnọ nemika apụma kiki se ini ḅarị ini pụnụma si ḅẹrẹtọn ini pịrị apụ sọ ẹkaye.

³¹Job, ị́ya sima ị́ àrị ḍukopakụma Tamụnọ Ḅe pịrịsa se pịkị ḅerenisa ị́ ḅarị pịkị siye mịẹ ẹkẹ?

³²Tamụnọ Ḅe ị́ ọ̀ ḅẹsa na ori ị́ya mịẹirima ma se ị́ ḍie, se ị́ ḅerenisa ị́ ḅarị siye mịẹ ẹkẹ?

³³Ị́ nwọ Tamụnọ Ḅe mịẹarịye ma ḅerenika sịkị, ị́ ineda tọrụse ò ḍikiḅe ori ị́ ḅiye mịẹ ị́ pịrị? Anị ḍukopẹlẹ mị ị́ ḅara omi-ẹ, ị̀ ḅarakẹ; mịọkụ ḍuko wa pịrị ị́ koromaḅo ọkụ.

³⁴Tịḅịḅie nyanaḅọ ineda jokoma ḅereniḅịa; ị̀ naa àrị yenemiḅọ ḅẹḅịa na

³⁵Job ḅe nemika ḅụ mị ori ọkwẹịn arịye-ẹ pịkịna ò ḍuko arịye ma koroma nyanakẹ.

³⁶Job ḅe ḍukoarịye mamgba se koroma ḅụ chu ọkụma; ị́ ọrịḅịa na siye mịẹḅọ ḅara mị ori ọkwẹịn àrị ọkụ-ẹ.

³⁷Nyana ḅerenika ọ̀ nwọse oria sima ḅụ chụamẹ; minemgba tọrụkuḅu ọ̀ Tamụnọ Ḅe kombomẹ.