Read kirikeni Job 38 Bible Online

Job 38 - kirikeni bible

Job 38

¹Anịeso, irisi ḅie Nyanaḅọ Ḅe ọkwẹịn Job ḅe pịrịmẹ.

²Ị́rị́ tụḅọ se ị́ya yenemika, yeḅie ofori ọkwẹịn ma se ị̀ya nemi gbela-o?

³Tomoniḅọ ḅara se chịẹ mịọkụ se à se ị́ gbelaḅịaye ma pẹkẹrẹ.

⁴À sẹkiri mị tẹmẹ sịkị nde anga ị́ omi? Ị́ ọkọ nemimẹ ḅẹḅẹ, anị na gbolomaye ḍuko se ị́ pịrị.

⁵Tụḅọ tọnpẹlẹ anị ḍụḅa laḅịa ọkụ? Tụḅọ yetọn ḍiki mị se anịa ọgọnọ gbana se anị tọn? Anịa pẹkẹrẹ ḅịpị mamgba ị́ nemi?

⁶Tụḅọ ịbama ọlọ, sẹkiri dachịẹmaye ma? Tụḅọ sẹkiri mị ḅe-ọkọlọḅa-ḍụparị ma pike?

⁷Anị ene ḅoḅa sịkị, lolia ma gboloma nime chumẹ, pịkịna soḅie ayema ḅieḅẹlẹḅụ ḍorokumẹ.

⁸Tụḅọ onu ḅọkọ ma palị tọrụ mị ọlọchịẹma anị kiri ḅụlọ ḅie kan pakaḅo sịkị?

⁹Ị̀rị̀-ẹ, soḅuno se tọrụ mị gbẹịnḅọ ḅe pịkị kanakana ḅie anị fịna kpeḅọ ḅe.

¹⁰À mengi mị anịa eke tọn se anị ịkasị se onu ḅọkọ ma ọḅụju koromamẹ.

¹¹À ḍuko anị pịrịmẹ, “Mịanga kuno, ḅarị nwẹngị ḅọrọma! Mịanga ị́ya kụrọ ambura ma dachịẹma.”

¹²Job, jene ị́ya ḍumo ene mamgba ḅụ ị́ kụrọ se gbọrị ene pịrịsa anị ḅa?

¹³Jene ḅaasa ene mị ị́ anị ḅẹsa anị kiri mị finji se sitịḅịnyana apụma jike pakụma inia ḅọị nyọma ḅie?

¹⁴Enekaka mị mịẹse tụndụma na pẹsị-a nyọma na chịẹpakamẹ iko ḅụchụaye kpompaka ọkụ, aḅaịn ọgọnọ gịẹịnye tọn ọkụ.

¹⁵Enekaka mị opuma ḅịamẹ sitịḅịnyana apụma ḅụ pịkị ini kikimẹ kụrọye mịẹ ḅụ.

¹⁶Jene tọrụ mị ḅe gbun mị sakị tụḅụ mị ị́ mun sa? Jene abaji chuku ḅie kiri mị ọgọnọ ị́ nwẹngị sa?

¹⁷Jene fịapụma inia kanakana sẹkiri mị onu ḅọkọ nweni se ị́ ḍiesa?

¹⁸Sẹkiri mị ḅe ḍụḅa mị la-ọkụ ḅe koroma ị́ nyana? Ị̀ pẹkẹrẹ, ị́ nemikase nemimẹ ḅẹḅẹ.

¹⁹Enekuḅu mị ḅo anga ị́ nemi anịkanịka kanakana mị ḅara wẹrịma sakị ọkụ?

²⁰Ị́ ineda àrị nwẹngị mun laḅịa nyọ se àrị ḍieḅe, anịkanịka àrị depịkịḅe?

²¹Àrị iḅiọkụma nemimẹ ị́ ineda ḅịa, anịatịḅị ị́ opuma olomusam pịkị ini sẹkiri tẹmẹ sịkị ị́ omi-ẹ!

²²Jene ị́ kpaịnma ngọ koko ḅie ma na, à sino ma na opu-ene-mgbọlụ ma na se koroma nyọ lasa?

²³Àrị àrị se ḅụkarakarama ḅụfụka sịkị korumẹ, anị ọmụ na obu na sịkị ḅụ.

²⁴Jene anịju ị́ mun sa, ịrụa mị sakị pakaḅo anga, anịkanịka ịrụapakapaka nyọ fọrụ mị fie àrị anga?

²⁵Tụḅọ okolo pu koro-sara àrị ene pịrị pịkị nyọ mịẹḅelema soalagba-irisi mị pịrị?

²⁶Tụḅọ mịẹse ene koro gbọrịḅọ sọ angaka nyọ ḅụ?

²⁷Tụḅọ mengi se samịna-kpoin-kpoin nyọ sara, mịẹso sịkị osuein sopakaḅịa ọkụ?

²⁸Ene mị anịkanịka otita mị anị ḍaḅọ nyana?

²⁹Tụḅọ aịs mị na nwẹnẹnwẹnẹ-ene mị na nyengiḅọ,

³⁰anị mengi ma pịkị ḍụparị mịẹḅọ ḅe-ẹ pịkị tọrụ mị mịẹ anị kpo ḅọḅe-ẹ?

³¹Ị́ ineda Kpokponi ma Sọnọma lolia kpo ma kpọ gboloma ḅe, anịkanịka Ḍọkọḍọkọ lolia ma ịkasị ikoli ma fimaḅe?

³²Ị́ ineda sịkịna sịkịna ḅụ lolia ma ḅe nwẹngị datekerema ḅe pịkị Opu-Ḅịa-lolia mị na Kala-Ḅịa-lolia mị na da gbụkụkụmaḅe?

³³Ḅẹrẹtọn so ma pịrịarị olokoma ị́ nemi, se ị́ ineda ma olokoma se sẹkiri mị otomaḅe?

³⁴Ị́ ineda oloku soḅuno ma pịrị se àrị mịẹse ene mengi sara ị́ pisimaḅe?

³⁵Se ị́ nemikase tọn-so-wakam mị pịrịmẹ se anị ḅịa ọkụma anị ị́ damaḅo se ḅẹḅẹ, “Ị́ya fịrị ḅie omi-ẹ?”

³⁶Tụḅọ ḍuko pịnabo ḅe pịrị Naịl Tọrụ mị kọpụḅịa sịkị, anịkanịka ḍuko owoi-ọḅọkọ ḅe pịrị na ene koroḅịa sịkị lasam?

³⁷Tụḅọ opuma yenemiso ọkụma ineda soḅuno ma kịẹnḅe, se àrị pịkị se ene koromaḅe,

³⁸anị fọn mịẹkụrọma se anị ḅo okpokpo-okpokpo-sọ ene mị?

³⁹Ị́ fịye ḍọkị chịrịḅa ḅe pịrị fịḅe, se fịye pụkọ tarị chịrịḅa awọma ḅụlọ ḅeinmaḅe

⁴⁰àrị arịa pokolo ma ḅie ḅọị simearịogbo, anịkanịka àrị arịa ikpuma ḅie nama ọbị simearịogbo?

⁴¹Anịḅọ tụḅọ fịye se kurukịara ma pịrịfịarịḅọ àrị fịyepụkọtarị ḅụ gelegelema ḅọrọarị sịkị, arịa ayamburama awọma fịye gose owu ị̀ pịrịarị sịkị?