Read kirikeni Job 39 Bible Online

Job 39 - kirikeni bible

Job 39

¹Tụndụ ḅie oḅorima yi sịkị ị́ nemi? Piri-tụḅụra yi àrị anga jene ị́ ọrịsa?

²Àrị ḅụlọ ḅie arịa ayamburama awọma deki lasịkị ị́ nemi? Arịa yi sịkị ị́ nemi?

³Àrị ḅo sombi se arịa awọma yi sẹkiri koromaḅịa sịkị ị́ nemi?

⁴Piri ma ḅie arịa awọma kụrọ se sẹnịḅịa; se nwẹngị soḅịa ḅarị vinpịkị ḅoẹkẹ.

⁵Tụḅọ piri-yepụra asụnma mịẹ àrị arịa ḅụ nyana? Tụḅọ àrị finma se àrị nwẹngị ma ḅọrọ?

⁶Ị̀rị̀ onwun-ele se àrị pịrịmẹ àrị se anga nyọ mịẹmẹ, se ḅereni àrị pịrịmẹ àrị fụn ḅein ḅele sẹrẹrẹ kiri ọgọnọ angamẹ.

⁷Àrị sime nyọma opuma fiefie-opuama ma ḅụ na sasamẹ, ineda àrị mịẹdeinma se àrị fịrịnwẹngịḅịa ḅọ ofori-ẹ.

⁸Tụndụ ọgọnọ anị osueinma simeye-ẹ arịa fịayema, àrị ịnyanya ọrị fịḅịa nyọ-ẹ.

⁹Piri owoi nambulo fịrịnwẹngị ị́ pịrị ḍụkụḅe? Ọ̀ gbọrị ḍin se ị́ya nama koko nyọ ḅụ sime ḍụkụḅe?

¹⁰Ị́ ineda ḍiki se ọ̀ kpọ se ori ozu fịrị nwẹngị ị́ pịrịḅe? Anịkanịka ọ̀ mịẹse ò funtanye jineḅe ị́ya ozuma ḅie?

¹¹Ị́ ineda kuḅie se oria opu ịnyọ ḅụ gbanaḅe se tọrụse ò ḍiki se ori ị́ya kụrọ fịrịnwẹngị ḅe?

¹²Ị́ tọrụse ò ḍiki-ao na ori ị́ya ozu ḅie ị́ sokusa fịayema jineḅo se àrị se ḅo yegugu nyọ sara?

¹³Ọjụ-feni ḅe oria pamba ma ḅie sarasarama fiearị ọkụ ḍiki! Ọkụma gbọrị ọjụ-feni sọ ofori-ẹ ineda pịnabo ḅe fin ọkụ finḅịa wu.

¹⁴Ọjụ-feni ma arịa anyị ma wẹrịsomẹ onwun-kiri ḅie kiriḅie ọwụ mị àrị ọfịrịmaḅịa ọkụ.

¹⁵Á ḅarị nemikẹ na ḅụọ ineda àrị nanga kọsịmaḅịa anịkanịka piri nama àrị ḅaa kọsịmaḅịa.

¹⁶Á mịẹ ḅara, ị́ ḅẹḅịa na, anyị ma árịayeka ọkụ, arịa ḅụ pakaye na árịa ịnyọ na papa famẹ.

¹⁷Ị̀rị̀ anị á mịẹse á ḅo yenemikaḅọ sọye-ẹ se nemi se á pịrịkaye-ẹ.

¹⁸Ọkụma á ḅo sakị mangị ḅịa sịkị, árị ineda asụn na á dọkụḅọ na ḍẹrịḅịa.

¹⁹Job, ị́rị́, asụnma mịẹse àrị kụrọ se arịa nangwọ ẹwẹrẹwẹ ma se àrị pịrị?

²⁰Ị́rị́ àrị mịẹse àrị igurube fuku ọkụ fuku se àrị arịa nyọfiema mị se tomoni ḅalafama?

²¹Àrị arịa ḅụọma se pẹsị kiri waramẹ; kuḅie-chịẹ-chịẹ-chịẹ ḅaraḅụ se arịa ịnyọmgba se mangị owu mun mẹ.

²²Ḅalafa fiearịye àrị nemikẹ, pịkị okola-agiji sọ ineda àrị depịkị-ẹkẹ.

²³Àrị dọkụarịapụ ma deki owuniayema ịrụa ḅie ḅịa pịkị pekele-pekele-aḅẹ.

²⁴Ḅụgeregere na ḅụchịẹtarịka na ḅụ, asụnma àrị mangị tọrọkọ mun aḅẹ; epelepe mị fie sịkị, àrị ineda chịẹkẹ.

²⁵Epelepe fie sịkị fie sịkị àrị nyọfiemamẹ; owu-onu ine arịa nini fụrụḅịa ma àrị nyọ kpekika simeogbo, se owutịḅịnị ma oloku se pịrị kụrọ mị naamẹ.

²⁶Ọgankwọ ḅe ori ị́ ḅara fin ọkụ ḍawọ-ao ọ̀ nwọ fin se oria pamba ma finjima chuku da sịkị?

²⁷Igo ḅe ori ị́ya fịrịtọn ḅịpị koru se ò mun gele tụndụma ọgọnọ oria warị nama?

²⁸Geletẹịn ḍụparịma ọgọnọ anị ori oria warị nama namaye-ẹ pịkịna tụndụ ḅịpịokolo ma ọgọnọ anị ori oria owuniwarị nama namaye-ẹ.

²⁹Anị nyọḅụ anị ọ̀ wẹrị ḅọlọ nyọ na kpeki nyọ na ḅụ ọ̀ ḅaa se kun pẹịḅịaye nwọ ẹnyẹ-ẹnyẹ ye-ẹ.

³⁰Igo ma fị ojuma ḍẹkịkelemamẹ, se kala igo ma pulo mị ḅumẹ.