Read kirikeni Job 4 Bible Online

Job 4 - kirikeni bible

Job 4

¹Job, ị́ ịganịḅe à nemikase ọkwẹịn ọkụma? À ḅarị yawụma sime ẹkẹ.

³Ị́ ye se tọn apụ ḍiesam se pịkị ịnyọ se lọkọ ḅarama pịrịsam.

⁴Tomoniḅọ ḅụọ tọmbụlọ, nụḅọ oju lọkọ se ịnyọ nụḅọ ḅụ fasịkị, ị́ya ọkwẹịn ma ọ̀ mịẹkụrọma se ọ̀ chịẹmẹ.

⁵Mịọkụ ị́ya sịkị-ẹ, ḅụfụka ḅie sọ; pịkịna ị́ya oju opuma lọkọsam tọrụ se anịda.

⁶Ị́ Tamụnọ tẹkẹtẹkẹmẹ, ḍukoḅịaye pịkị ị́ya ḍumo ḅie ofori-ẹ; anịgose kụrọ kuḅie nyana tọrụse ḍikiarị ḍumo mị pịrị.

⁷Koroma mịọkụ. Karakaraye ḅụ sime se ḅo si fụḅara ḅie sọ gbọrịḅọ go.

⁸À nweni ọrịsam, kiri soku siye pịrị apụ se chịnmgbọlụ ḅara nwọse sitịḅị mị ḍipi; mịọkụ ini sitịḅị na siye na sokumẹ.

⁹Irisi ịganị ọkụ, Tamụnọ Ḅe oria ịganị ḅụ ini famamẹ.

¹⁰Sitịḅịnyana apụma chịrịḅa ḅe ekerea se ḅie de ọkụ anị ini ekerea ọkụ-ẹ, ọkụma Tamụnọ Ḅe ori ini yawụma se inia aka ma pọkọmẹ.

¹¹Se ye ḅaa pịkị yefịḅịaye nyanaka chịrịḅa ḅe fị ọkụ ini fịmẹ, se inia awọ mamgba galagalamẹ.

¹²Gbọrị sịkị fịrịfịrịma ḅịpị miniminima ḅomẹ, anị minimini so-ọkụma àrị ineda anị naakẹ.

¹³Ḍawọju ọkụ anị opuma ị̀ya mọnọ kikimẹ.

¹⁴Anị ị̀ ḅalafama, pịkị ị̀ya oju ḅaamẹ; ị̀ya oju mgba ḅalafaḅụ geregeremẹ.

¹⁵Fọrụ kalaye ị̀ tọrụ lamẹ, se oḅoku ijira ị̀ ḅụsaramẹ ḅalafaḅụ.

¹⁶Àrị anịju chịẹarịye ọrịmẹ; Ị̀ ḅụ buanmamẹ, ọkụma àrị ineda ḍukokẹ cheye otuḅo. Se yawụ nyọ mị ḅie à pụkọ naamẹ:

¹⁷“Tamụnọ Ḅe tọrụkuḅu karakaraḅọ omi? anịkanịka ọ̀ Tẹmẹḅọ Ḅe tọrọkọ fịafịaḅọ omi?

¹⁸Tamụnọ Ḅe, ò kuḅie se oria soḅie fịrịnwẹngịapụma ḅụ gbanakẹ; oria enjẹlapụma ḅụ pembe sọ ò si ọrịmẹ.

¹⁹Ị́ chịn ḅara ò kuḅie se ini aḅaịn se tẹmẹḅọ ḅụ gbanaḅe, papa fọn ḅụ ḅoye, anị peri kọsịma ọkụ se kọsịmaḅịaye-ẹ?

²⁰Tomoniḅọ ineda dede ḅie ḍumoḅịa, ọkụma nweni lekirika ḅaraḅụ fịḅịa saso ma lakasimeogbo.

²¹Ọ̀ nyanaye goyegoye ini ọkị soḅịa; ọ̀ fị ọkụma ọ̀ ḅarị nemi nyanakẹ.”