Read kirikeni Job 40 Bible Online

Job 40 - kirikeni bible

Job 40

¹Job, ị́ Kụrọmamgba Nyana Tamụnọ Ḅe na tụḅụrụmẹ; ị́ ḅarasinḅe mịọkụ, anịkanịka ị́ anị pẹkẹrẹ ḅe?

³Nyanaḅọ, à yenemika ḅara se ọkwẹịnmẹ. Àrị ineda che pẹkẹrẹ ḅe? À ḍukoḅịa kpọkpọ gbọrị ye sọ ofori-ẹ.

⁵À ḍukogbẹịn ọkụ nẹngịma ḅara à nwọse ọkwẹịnsam.

⁶Anị irisi mị ḅie Nyanaḅọ Ḅe pịkị gbọrị sịkị se ọkwẹịn Job ḅe pịrịye-ẹ.

⁷Tomoniḅọ ḅara se chịẹ mịọkụ se à se ị́ gbelaḅịaye ma pẹkẹrẹ.

⁸Ị́ ḍuko finji-ẹtọn-ao na à karakarakẹ— ị́ ị̀ se karakaraka anga koroma se ị́ ḅụ se karakara anga koroma-o?

⁹Ị́ à kụrọ ọkụ kụrọ? Ị̀ pụkọ soalagba fie ọkụ fiemẹ ị́ pụkọ anị ineda ọkọ fieḅe?

¹⁰Ọkọ-ẹ nwọ ḅẹḅẹ, sịsẹ chịẹ ị́ya kun na opu na ḅụ; se opu na boma na se ị́ ḅụ ḅirima.

¹¹Anị nyọ opu aye mịẹapụ ma ḍiki; ị́ya ịganị ọsụn pakụma se ini mịẹiderima.

¹²Iin, ini ḍiki se ini ọkị iderima; sitịḅịnyanapụma chịẹ nyọ ini kọsịma.

¹³Kiriḅie inimgba ḍipi; fịapụ sẹkiri ḅie ini fịna.

¹⁴Anịọkụma ị̀rị̀ anị tatarị ị́ tokoniḅịaye-ẹ se ḅereni ọkịḅịa na ị́ ọmụḅaraiḅi nyana ị́ ḅụ pịrịsam.

¹⁵Bẹhịmọt opu nama ḅe ḍiki; ị̀rị̀ ọ̀ tẹmẹ mẹ pịkị ị́ tẹmẹ mẹ. Nambulo osuein fị ọkụ anị ori osuein fịfị ọkụ-ẹ,

¹⁶ọkụma che ịnyọ ọ̀ ḅụ omi, che kụrọ oria ịsịan ma ḅie omi!

¹⁷Ò tumo mị awụ chịn chịẹ ọkụ chịẹmẹ, se ọ̀ ḅụọ ịsịanma kụrọmẹ.

¹⁸Oria ịmgbema alapẹlẹka kụrọ ọkụ kụrọmẹ, anịsịkị ọ̀ ḅụọma ikulele chịn kịkẹmẹ.

¹⁹Ori à tẹmẹaye mamgba ḅụbuanmatẹịn mẹ! Ọ̀ tẹmẹḅọ ḅe kẹngẹ anị ori inumaḅịaye-ẹ.

²⁰Se ò kokoḅịa osueinma chịngịma ọgọnọ mị àrị pakaye-ẹ, anị ḅalafama piri-a nama ti àrị nyọ mị.

²¹Ịgaga piri-a chịnma chuku mị ọ̀ ḅọlọlọ sime simeye-ẹ, se ikpuma ḅie sime nangwọ osueinma ḅie anị ọ̀ ḅọị ḅọị ye-ẹ.

²²Tọrụ aka sime wilo ejema na ịgaga chịnma na ḅieju nyọma chuku mị ọ̀ tịḅịkikima kikimaye-ẹ.

²³Owoi mengi ọ̀ ḅalafama famakẹ; Jọdan mengi mị sọ ọ̀ tọrụ sara ọkụma anị oria ojumgba deinma deinmamẹ.

²⁴Tụḅọ ineda ọ̀ tọrụmgbọlụ pụnma se ò kunḅe? Anịkanịka tụḅọ ineda ḍẹịn ḅie ò nini ḅụ ò tuḅoḅe?