Read kirikeni Job 41 Bible Online

Job 41 - kirikeni bible

Job 41

¹Ị́ ineda inji-arị se tịḅịtịḅịtịḅị nama ḅe kunḅe anịkanịka ḍiki se ọ̀ ḅịpị ḅie ḅẹlẹ mị kpọ se ò jineḅe?

²Ị́ ineda ḍiki se ò nini ḅie chu anịkanịka inji-arị se oria amgba ḅie chuḅe?

³Ori ị́ tẹkẹḅe na ọ̀ ḅụ ḅarasin se ò so-ẹ? Ori ị́ ḅara ḍikiḅụgerere ḅiḅe?

⁴Ori ị́rị́ na ḅịpịogbosọ ḍọkịḅe se ḅereni ị́ pịrịḅe na ọ̀ fịrịnwẹngị ị́ pịrị gbasoḅịa?

⁵Ị́ ọ̀ kpọ koromaḅe feni tọkụ ḅaraḅụ, se ori ị́ya fịrịnwẹngị eremeni awọma na titi simeḅe?

⁶Inji-a kọnị ò se tuḅokọn ḅe? Tuḅoni ọ̀ pẹlẹ dẹrị ḅe?

⁷Ị́ ineda sụḅa se oria ojuakpakpa mị elekima ḍiki ḅe anịkanịka opu sụḅa se ọ̀ tịḅị temi tolu ḅe?

⁸Ḅara se gbọrị-sịkịḅụ ọ̀ lama ḍiki, ị́ ḅarị ineda maịn karama-ẹkẹ ngịsị; owu mị ị́ se ḅieḅarama-ẹkẹ!

⁹Tịḅịtịḅịtịḅị nama ḅe ọrịḅọ kuḅie kụrọ nyanaka ḅụ sokoro kiri korokoromẹ.

¹⁰Ori ịganịsa ḅẹḅẹ, ọ̀ ḅalafamasam; gbọrịḅọ sọ ofori-ẹ dadama ọ̀ tọrọkọ chịẹ-chịẹḅọ.

¹¹Tụḅọ ọ̀ dapaka se ḍumoḅe? Gbọrịḅọ sọ ofori-ẹ inedaḅịaḅọ sẹkiri mị ḅie.

¹²Ye à tịḅịtịḅịtịḅị nama ḅe ḅụọma gbakịmaye na ọ̀ kọn kụrọ la-ọkụ na ḍuko ị́ pịrị.

¹³Ineda oria ojuakpakpa mị pịnịḅịa ḅọ ofori-ẹ anịkanịka ọ̀ chụa kụrọ owuni ḅụchụaye ma kan tolutoluḅọ ofori-ẹ.

¹⁴Tụḅọ ineda ọ̀ mịẹse ori oria amgba ma finjiḅe, ọ̀ chụa ḅalafama aka ma ẹndẹ ma sime nyọ mị?

¹⁵Ò koku kụrọ ḍụparị kịkẹ agbọ ọrụrụ ḅaraḅụ, kpataịnma oju apụra mị oḅolo waraḅe.

¹⁶Gbọrịye gbọrịye ḅụ àrị kịkịma jịnye jịnye na kpechia so-ọkụma, ẹmbẹ arịa ḅụ ofori-ẹ.

¹⁷Àrị kpataịnma oḅoloma so-ọkụma ineda àrị sọkịsin sin ọkụ ofori-ẹ.

¹⁸Ọ̀ chịsa ọkụma, tọnjie ọ̀ tọrụmgbọlụ ḅie pakapakamẹ, ayama pakarị ịrụa ḅịa ọkụ.

¹⁹Ọ̀ ḅịpị ḅie fịnị-a ḅẹlẹ kọrị pakapakamẹ, pịkị anana okpokpo fin-pakapakamẹ.

²⁰Onwoin anị ò nini ḅie sara pakapakaye-ẹ, ḅẹlẹ chuku kọrị àrị samịnasa ịnyanya onwoin ḅara.

²¹Oria ọwụ mị fịnị pakụmapakụmamẹ; ọ̀ ḅịpị ḅie anị anị fin-fin pakapakaye-ẹ.

²²Ọ̀ kọngọ mị anị kụrọso ọkụma ori na bịamaḅọ goyegoye ò ḍikiḅalafafamẹ.

²³Oria ojukiri ḅụ lọkọ nyọ ofori-ẹ; anị kụrọ pịkị ikulele ininachịn ọkụ chịnmẹ.

²⁴Oria ḍụparị kuḅie mị ḅalafa nyanakẹ, anị ininachịn pịkị yegbẹịn ḍụparịmgbọlụ kụrọ ọkụ kụrọmẹ.

²⁵Ọ̀ sịsẹsa ḅẹḅẹ, kụrọtẹịn aye mamgba arịa ḅalafasam; ịnyọ ḅarị arịa ḅụ ofori-ẹ ḅalafaḅụ.

²⁶Ineda yese ọ̀ lamalamaḅịa okola-agiji ofori-ẹ; sụḅa, anịkanịka ḍẹịn anịkanịka agiji sọ ọ̀ ḅụ sọẹkẹ.

²⁷Ọ̀ ḅụ ikulele mị osuein lọkọ ọkụ lọkọmẹ; alapẹlẹka mị sọ ḅụrụchịn ḅutuḅutu ọkụ ḅutuḅutumẹ.

²⁸Ọ̀ mịẹse ọ̀ mangịḅịa ḍẹịn ofori-ẹ; ḍụparị se ò gbin mị anị ọ̀ ḅụ papa osuein ọkụ simemẹ.

²⁹Ọ̀ ḅụ imgbele anị papa osuein ye-ẹ, ọ̀ pịkị ḍẹrịḍẹrịmẹ tomoni sụḅa se ò gbin ọkụma.

³⁰Ọ̀ ḅụlọchuku ẹfẹfẹrị ma ini kẹngẹ ḅẹlẹ pẹkẹrẹ aye kịkẹmẹ; àrị iboma wọịwọị ọkụ anị tomoni ḅụkụlọ se nama ini jine nwẹngị ḅọrọ kiri ọkụ simemẹ.

³¹Ọ̀ mịẹse tọrụ mị pikiri pikirimẹ ḍarị àrị mengi sime ọkụ ọ̀ pịkị anị mịẹse anị kpụtụkpụtụma pulo ḅẹlẹ ḍarị ọkụ ḍarịḍarịmẹ.

³²Ọ̀ ḅọrọsa nyọ goyegoye ḅịa belele ateli pakụmapakụmamẹ tọrụ mị sọ pịkị ḅịaḅịa ambura ọkọkọ chụachụamẹ.

³³Tomonikiri mị ḅie se ori otomaḅịaye ofori-ẹ; ori anị ḅalafa nyanaka tẹmẹyema ḅụ gbọrịye-ẹ.

³⁴Opuayemịẹtẹịn namama pembe ori àrị ḍiki iderimamẹ; ori anị owoi nama mamgba ḅụ amanyanaḅọ-ẹ.