Read kirikeni Job 5 Bible Online

Job 5 - kirikeni bible

Job 5

¹Oloku ḍiki, Job. Ḍiki nweni ị́ pẹkẹrẹḅịa otuḅo. Anị nyọ ị́ tọrụ pịkị daḅịa enjẹlḅọ omi?

²Ḅụḅalaḅala se ị́ ḅụ pịrị se ịganị se ị́ ḅo fị mị anị oḅori mịẹmịẹye-ẹ, nemi anịa ḅie ofori-ẹ.

³Ḅụkeke nyana oḅoriapụ àrị ọrịsam, ọkụma à ḅụnemika worinime gbo inia warịma sẹịnmamẹ.

⁴Inia owuapụ awọma ini dein ọrị ẹkẹ jenejene; sịsẹ ini ḍụaḅịaḅọ ofori-ẹ ḅẹrẹkọn warị ḅie.

⁵Ḅurupụkọtarịapụ ma yenemikapụ ma ḍipiaye ma fịḅịa— ịga ḅie sẹnịarị chịnmgbọlụ mamgba sọnị se mengi-pụkọtarịapụ ma oria ngọma sọlịḅịa.

⁶Si kiri ḅie ḅụ sopakapakakẹ, anị ḅụfụka sọ kiri ḅie sopaka-ẹka ọkụ-ẹ.

⁷Ẹn-ẹn ngịsị! Tomoniḅọ ḅe anị ḅụfụka deki ọ̀ ḅụ pịrịye-ẹ, fịnị anana fịnị ḅie fin paka ọkụ.

⁸Ị̀rị̀ nemikase ị́rị́ ọkụma, à tọrụ pịkị Tamụnọ Ḅe daḅịa se ị̀ya ḅẹrẹ mị se ò ḍieḅịa.

⁹Ò mịẹmịẹ opuaye ma, wa ineda árị kaịnḅokẹ, pịkị oria ḅụgbiripumaye ma kuluma nyanakẹ.

¹⁰Ori ene se kiri sẹịnmamẹ se mengi se ele ma ḅụ saramẹ.

¹¹Iin, Tamụnọ Ḅe anị ḅụ-iderimaḅọ ḅe iwoma iwoma ye-ẹ pịkị ḅieḅẹlẹ se kururuarịapụ mamgba pịrịpịrịye-ẹ.

¹²Epeleti owuapụma tọnye mamgba ọ̀ pịkịmẹ, se ye nemiapụ ma ini tu ḍẹịn ma ḅie ini koromẹ, mịẹso sịkị ini mịẹ se inia ḅarasọye ofori-ẹ;

¹⁴ọkịmun eneogboin lasọ ini kanakana ḅie iriaḅẹ.

¹⁵Ọkụma Tamụnọ Ḅe fị ḅara ḅie ori igweinḅọ ḅe ḍụapakụmamẹ; ye ḅara oforikaḅọ ḅe ò ḅereni ẹkẹ ini ọ̀ pụnụma.

¹⁶Ò kuḅie se gbanaye se igweinḅọ ḅe pịrị se sitịḅịnyanaḅọ ḅe ḅịpị gbẹịnmẹ.

¹⁷Ḅieḅẹlẹ sime Tamụnọ Ḅe datekeremaḅọ ḅe pịrị! Tọrụ fụrụmama ori ịganị ị́ pịrị sịkị.

¹⁸Tamụnọ Ḅe anị yese ò se ị́ lama yema fịnaḅịaye-ẹ; ọ̀ ḅara anị ine yese ị́ lamaḅịa, ọ̀ ḅara anị pịkị ine ị́ gwọḅịa.

¹⁹Sịkịna sịkịna ori ị́ ḍụaḅịa ḅụfụka ḅie;

²⁰ḅuruḅaa ḅo sịkị ọ̀ mịẹḅịa ị́ ḍumoḅịa, se pịkị ọmụ ḅie fị ḅụ ị́ kokoḅịa.

²¹Tamụnọ Ḅe gọlịapụ ḅịpị ḅie ọ̀ mịẹḅịa ị́ karịpakaḅoḅịa; ori ị́ ḍụaḅịa fa mị ḅoḅịa sịkị.

²²Ị́ kụrọkụrọ-amịẹmịẹaye na ḅurupụkọtarị na nwọ ḍẹrịḅịa se ị́ piri ḅie owoi nama ḍikiḅalafa ẹkẹ.

²³Ị́ soku àrị ozuma ḅie ḍụparị paka ẹkẹ; piri ḅie owoi nama pịkị se ị́ mịẹmịẹye ofori-ẹ.

²⁴Anịsịkị ị́ya ikowarị ḅie ị́ deinma angaḅịa; ị́ya ananama ị́ nwọ ḍikiḅịa sịkị árị koko waraḅẹ.

²⁵Osuein ịnyanya ḅein ọkụ ḅein ḅara ị́ nwọse tọn awọ yiḅịa.

²⁶Fịturu mịẹ ịpịamgba mgbọlụ ḅịa se mun soku sịkị la ọkụ, mị ị́ kpọḅịa ọkụ-ẹ.

²⁷Job, wa opu sịkị ọkị mịn mị ḍawọsam. Karakaraye-ẹ, anịgose mịọkụ anị ọkị.